Jak za piać hadoŭ źmianiłasia kamunałka ŭ adnoj biełaruskaj kvatery
BAR24 paraŭnaŭ realnyja žyroŭki adnoj baranavickaj kvatery za śniežań 2018 hoda i śniežań 2023 hoda.
Na praciahu apošnich dziesiaci hadoŭ kamunałka ŭ Biełarusi daražeła ŭ siarednim na 5 dołaraŭ štohod. Takaja suma była ŭstanoŭlena na zakanadaŭčym uzroŭni. «U metach udaskanaleńnia paradku rehulavańnia taryfaŭ na ŽKH, a taksama dziaržaŭnaj padtrymki nasielnictva». Tak havorycca ŭ aficyjnym dakumiencie.
Uletku 2023 hoda rost koštaŭ na kamunałku adviazali ad zvykłych 5 dołaraŭ. I pryviazali da bazavaj vieličyni. Z hetaha času razava pavyšać ceny na pasłuhi ŽKH dazvalajecca nie bolš jak na 0,5 bazavaj (18,5 rubla). Kali b usio zastałosia, jak raniej, razavaje pavyšeńnie składała b mienš za 16 rubloŭ (pa kursie Nacbanka).
Zdavałasia b, što takoje 5 dołaraŭ za hod? Adzin raz u kramu nie schodziš. Adnak, kali paraŭnać košty ŭ žyroŭkach, da prykładu, za piać hadoŭ, rost vychodzić istotny.
Kamunałka za piać hadoŭ padaražeła ŭdvaja
Žurnalisty ŭziali žyroŭki z adnoj i toj ža baranavickaj kvatery, atrymanyja ŭ śniežni 2018 i 2023 hoda (hł. fota). I paraŭnali košty na kamunalnyja pasłuhi.
Adrazu adznačym, što za hetyja piać hadoŭ u kvatery adbylisia niekatoryja źmieny. U pryvatnaści, stała na adnaho zarehistravanaha čałavieka bolš. Krychu pavialičyłasia spažyvańnie vady. I źmianiŭsia paradak raźliku za niekatoryja pasłuhi. Naprykład, techabsłuhoŭvańnie lifta stali ličyć nie pa kolkaści prapisanych u kvatery čałaviek, a pa kvadratnych mietrach płoščy. Tamu pry paraŭnańni zvažali mienavita na taryfy, a nie na vynikovy košt kožnaj pasłuhi.
Bolš za ŭsio za apošnija piać hadoŭ u hetaj kvatery vyraśli rascenki na kapramont. Taryf za hety čas pavialičyŭsia bolš jak u dva razy.
Amal udvaja vyras taryf na pasłuhi vodaadviadzieńnia ci kanalizacyi.
Rascenki na aciapleńnie, padahreŭ vady i vyvaz śmiećcia pavialičylisia za piać hadoŭ u siarednim u paŭtara raza.
Mienš za ŭsio za hety čas vyraśli košty na techničnaje absłuhoŭvańnie žyłoha pamiaškańnia — prykładna na tracinu.
U vyniku za piać hadoŭ žyroŭka ŭ adnoj i toj ža kvatery padaražeła ŭ 1,9 raza. Aficyjny zarobak u Baranavičach za hety čas vyras z 887 (kastryčnik 2018 hoda) da 1631,7 rubla (kastryčnik 2023-ha). Abo ŭ 1,8 raza.
«My dajom Štatam toje, što jany chočuć». Rasijski kanał apublikavaŭ videa, jakoje nazyvajuć zapisam Ryžankova schavanaj kamieraj u mašynie14
Kamientary
A ja kaja tam aficyjnaja inflacyja, nahadajcie-ka? :)