«DNR» zaprašaje Biełaruś ekspartavać svaje tavary praz party akupavanych Maryupala i Mielitopala
Biełaruski bok moh by vykarystoŭvać party anieksavanaj «DNR» dla svaich ekspartnych pastavak. Pra heta zajaviła člen rasiejskaha Savieta Fiederacyi ad «DNR» Natalla Nikanorava, paviedamlaje «Sputnik».
Pavodle jaje słoŭ, pra vykarystańnie partoŭ i stvareńnie biełaruskaha transpartnaha chaba na Azoŭskim mory ŭ «DNR» «možna kazać nie tolki hipatetyčna». Jana skazała, što maje na ŭvazie najpierš maryupalski port.
«Kali kazać pra ŭzjadnanyja terytoryi ahułam, to heta jašče Mielitopal», — skazała Nikanorava.
Pa słovach Nikanoravaj, zacikaŭlenaść u padobnym supracoŭnictvie jość, bolš za toje, užo viadziecca peŭnaja praca ŭ hetym kirunku.
«Dumaju, što ŭ najbližejšaj budučyni my ŭbačym kankretnyja prajavy, vyniki hetaj dziejnaści, u hetym kirunku ŭ tym liku», — dadała jana.
Letaś TASS paviedamlaŭ, što pieršaje pradpryjemstva ź Biełarusi pačało adhruzku zbožža na ekspart praz marski port Maryupala. «Jano pieravalvaje na ekspart svaju sielhaspradukcyju: zbožža, techničnyja kultury. Jany pracujuć u nas užo kala dvuch miesiacaŭ, arandavali składskija pamiaškańni», — paviedamlała ahienctva.
Nazvu biełaruskaj kampanii i napramki pastavak nie ahučyli, ale adznačyli, što firma vyvučaje mahčymaści pieraaryjentavać na Maryupal uvieś abjom svajho ekspartu, pakolki hety transpartny kalidor akazaŭsia karaciejšy za inšyja mahčymyja.
Paśla zakryćcia praz sankcyi zručnych partoŭ Litvy biełaruski bok šukaje sposaby transparciroŭki svaich hruzaŭ. Razhladaŭsia navat varyjant pabudovy svajho porta ŭ Murmansku.
Kamientary