Bieśpiłotnaja vajskovaja technika patrochu vyciaśniaje zvyčajnuju.
Mietady viadzieńnia vajny źmianiajucca. Siońnia ŭsio bolšaje miesca siarod ich zajmajuć technałohii, u katorych zadziejničanyja robaty, a nie ludzi.
Adna z krain, jakaja ŭkładaje vialikija srodki va ŭdaskanaleńnie svajoj armii – heta Izrail. Siońnia hetaja kraina raspracoŭvaje bajavyja mašyny, jakija buduć vykarystoŭvacca ŭ budučych vojnach. Izrail na praciahu amal 60 hod prymaje ŭdzieł va ŭzbrojenym kanflikcie. Hetaja akaličaść vymusiła krainu stać adnoj ź viadučych u halinie vajskovych technałohij i vytvorčaści samych raznastajnych vidaŭ zbroi. Zaraz dajšła čarha i da raspracoŭki vysokatechnałahičnaj bieśpiłotnaj techniki – čoŭnaŭ, naziemnych transpartnych srodkaŭ i latalnych aparataŭ.
Na siońnia armii bolš čym 40 krain u roznaj stupieni vykarystoŭvaŭć robataŭ. Navat «Chezbałła» vykarystoŭvała ich u apieracyjach suprać armii Izraila. Płanujecca, što praz 10-15 hadoŭ izrailskaja vajskovaja technika budzie na tracinu składacca ź bieśpiłotnych aparataŭ.
«My ŭstupajem u eru robataŭ. Heta dazvolić nam udzielničać va ŭsio bolšaj kolkaści misij i nie padviarhać pry hetym niebiaśpiecy žyćci našych žaŭnieraŭ» – adznačaje izrailski vajenny čynoŭnik Hiora Kac, vice-prezident abjadnańnia «Abarončaja technika».
U 2003 h. amierykanskaja armija ŭ Iraku mieła tolki niekalki bieśpiłotnch aparataŭ. Siońnia ich kolkaść padbirajecca da 20 tysiač. Ich vykarystoŭvajuć dla raźviedki, avijaŭdaraŭ i abiasškodžvańnia vybuchovych pryładaŭ. U 2009 hodzie VPS ZŠA padrychtavali bolš apierataraŭ bieśpiłotnikaŭ, čym lotčykaŭ źniščalnikaŭ i bambardziroŭščykaŭ.
Supiernikami Izraila ŭ raspracoŭcy robataŭ vajskovaha pryznačeńnia źjaŭlajucca ZŠA i Japonija, adnak armii hetych krain nie majuć takoj vostraj patreby ŭ robatach, jak Izrail. Važnaj asablivaściu izrailskaj techniki źjaŭlajecca lohkaść u kiravańni. Žaŭnier moža avałodać patrebnymi navykami ŭsiaho za niekalki miesiacaŭ, u toj čas jak padrychtoŭka apieratara amierykanskaha bieśpiłotnika zajmaje niekalki hadoŭ.
Vajskovych robataŭ u Izraili ŭžo pačali pradavać za miažu. U pryvatnaści, Sinhapur płanuje nabyć niekalki robataŭ-čaŭnoŭ.
Technika z dystancyjnym kiravańniem asabliva praduktyŭnaja ŭ łakalnych kanfliktach i tak zvanych asimietryčnych vojnach, u jakich suprać ZŠA vystupajuć asobnyja hrupoŭki bajevikoŭ. Z dapamohaj robataŭ možna źvieści da minimuma straty siarod asabovaha składu.
Ź inšaha boku, vajskovyja analityki śćviardžajuć, što vykarystańnie robataŭ i źnižeńnie kolkaści achviar siarod žaŭnieraŭ moža raźviazać ruki armii ZŠA albo Izraila. U takim vypadku raznastajnyja antyterarystyčnyja apieracyi buduć adbyvacca značna čaściej.
Pačynajuć hučać i hałasy tych, kamu mroicca niebiaśpieka vajny ludziej z robatami, apisanaj u znakamitym «Terminatary». Sučasnyja vajskovyja robaty ŭžo mohuć uzajemadziejničać pamiž saboj biez udziełu čałavieka. Chto viedaje, kolki im zastałosia da poŭnaj samastojnaści…
Ciapier čytajuć
Pačobut parazvažaŭ, ad čaho zaležyć budučynia Biełarusi1
Kamientary