Michaił Vieler i francuzskija piśmieńniki vystupiać na Minskim knižnym kirmašy

Krainy SND, dalokaŭschodnija Kareja i Kitaj, blizkaŭschodnija Siryja i Iran, dalokija-blizkija Vieniesueła i Kuba, a taksama zachodnija knižnyja hihanty Niamieččyna i ZŠA — razam 26 dziaržavaŭ — voźmuć udzieł u Minskaj mižnarodnaj knižnaj vystavie-kirmašy, jakaja adbudziecca z 10 da 14 lutaha ŭ minskim vystavačnym paviljonie «BiełEkspa».

Francuzskaja kniha

Paśla Izraila i Ukrainy sioleta hanarovy hość — Francyja, jakoj admysłova dziela kirmaša padrychtavała šmat siurpryzaŭ. Pa-pieršaje, rasijskija dy biełaruskija pierakłady, a taksama francuzskamoŭnyja aryhinały na francuzskim stendzie padčas kirmaša možna biez možna budzie nabyć biez nacenki.

«Vy nie ŭbačycie na našym stendzie Mapasana i Fłabiera, jakich biełaruski čytač užo peŭna pračytaŭ u biełaruskim ci rasiejskim pierakładach, a moža i ŭ aryhinale, — kaža Ludovik Ruaje, daradca pa kultury Ambasady Francyi ŭ Respublicy Biełaruś, —

Naš aryjencir  — sučasnaja francuzskaja litaratura — my pastarajemsia pakazać biełaruskamu čytaču sučasnych, papularnych aŭtaraŭ, takich jak Kryścijan Harsen i Anna Havalda».

Akramia hetaha na francuzskim stendzie adbudziecca šerah mierapryjemstvaŭ:

12 lutaha adbudziecca majstar-kłas pa ilustracyjach viadomaha ilustratara Ṕjera Karniuela (Pačatak 15.30).

13 lutaha litaraturnaja sustreča z historykam i piśmieńnikam Tjery Lencam «Jeŭrapiejskaja hieapalityka ŭ epochu Napaleona». Pačatak a 14-j.

Taksama 13 lutaha adbudziecca sustreča z Kryścijanam Harsenam. Jaho raman «Palot paštovaha hołuba», upieršyniu na rasijskuju movu pierakłali mienavita ŭ Biełarusi.

Na minski knižny kirmaš taksama zavitaje taksama piśmieńnica, što piša dla padletkaŭ — An-Mary Pol, knihu jakoj pierakłaŭ Źmicier Kołas (13 lutaha, pačatak sustrečy, a 11 ranicy).

Darečy,

kožny, chto nabudzie chacia b adnu knihu na stendzie Francyi, u ramakach łatarei zmoža pazmahacca za adzin z dvuch kvitkoŭ na kancert francuzskaj śpiavački Patrysii Kaas.

Rasijskaja kniha

Rasija, choć i nie źjaŭlajecca hanarovym hościem vystavy-kirmašu, ale ž svaimi stendami pavodle słovaŭ namministra infarmacyi Ihara Łapcionka zojmie takuju sama płošču, jak i haspadary, biełarusy. Akramia praanansavanaj ministram zamiežnych spravaŭ RF Siarhiejem Łaŭrovym prezientacyi knihi ab rasijskaj dyjaspary ŭ RB «Russkije v Biełarusi», samaj zapaminalnaj z rasijskich imprezaŭ, peŭna, budzie pryjezd našumiełaha ŭ kancy 90-ch hadoŭ aŭtara postpierabudovačnaha ramana «Samavar» Michaiła Vielera.

Biełaruskaja kniha

Kirmaš budzie prachodzić na tle nievialikaha paharšeńnia spravaŭ u vydavieckaj dziejnaści. Pavodle aficyjnych źviestak letaś u Biełarusi było vydadziena 12885 knižnych najmieńniaŭ ahulnym nakładam 22,8 młn asobnikaŭ, što na 2% mienš čym u 2008. Nie ŭ apošniuju čarhu heta źviazana z paharšeńniem stana vydavieckaj dziejnaści ŭ Rasii, jakaja źjaŭlajecca asnoŭnaj zakazčycaj biełaruskich vydaviectvaŭ. Namieśnik ministra infarmacyi Ihar Łapcionak źmianšeńnie tłumačyć tym, što samaje bujnoje vydaviectva krainy «Charviest» (pradstaŭnik rasijskaha «AST») kolkaść vydavanych knih skaraciła ažno ŭ čatyry razy i začyniła adzin z dvuch svaich padmaskoŭnych palihrafičnych kambinataŭ.

Biełaruskija prezientacyi adbuducca zbolšaha la stendaŭ dziaržaŭnych vydaviectvaŭ. Hetak, 13 lutaha adbudziecca prezientacyi vydańniaŭ «Mastackaj litaratury», siarod jakich knihi Uładzimira Karatkieviča «Lebiadziny skit» i Bykava «Apovieści». Pačatak a 12.30.

12 lutaha — prezientacyja rukapisnych knih supracoŭnika muzieja-zapaviednika «Zasłaŭje» mastaka Jurasia Małaša z demanstracyjaj słajd-filma «Suśviet z dušoju biełarusa». Pačatak a 12-j.

Ź niedziaržaŭnych prezientacyjaŭ — prezientacyja fotaalboma «Dikaja žizń v cientrie Jevropy» vydaviectva «Ryftur». Pačatak a 15-j.

Znoŭ ža 

13 lutaha vydaviectva «Biełaruskaja encykłapiedyja imia Piatrusia Broŭki» prezientuje 3-ci tom encykłapiedyi «Vialikaje Kniastva Litoŭskaje», pieršyja dva tamy, vychad jakich byŭ ciopła sustrety za miažoj na letašnim Vilenskim kirmašy. Akramia hetaha na Minskaj knižnaj vystavie buduć prezientavacca i inšyja encykłapiedyi vydaviectva «Historyja biełaruskaj knihi. Knižnaja kultura Vialikaha Kniastva Litoŭskaha» i «Haradyi miastečki Vialikaha kniastva Litoŭskaha», a taksama faksimilnyja vydańni albomu «Familnyja partrety kniaziej Radziviłaŭ» z histaryčnymi kamientarami.

Takim čynam, Minskaja mižnarodnaja knižnaja vystava-kirmaš u paviljonie «BiełEkspa» (Kupały, 27), 11–14 lutaha (10 lutaha VIP-dzień? uvachod pa zaprašalnikach, u astatnija dni vystavy ŭvachod — volny).

• 0
• 0
• 0
• 0
• 0
• 0
• 0
• 0