Tramp pavinšavaŭ Pucina z «cudoŭnaj ździełkaj» pa abmienie źniavolenymi
Kandydat u prezidenty ZŠA Donald Tramp pavinšavaŭ kiraŭnika Rasii Uładzimira Pucina z abmienam źniavolenymi pamiž RF i krainami Zachadu, jaki adbyŭsia na hetym tydni. Pra heta Tramp havaryŭ padčas pieradvybarčaha mitynhu ŭ Atłancie.
Pa słovach Trampa, Pucin pierachitryŭ amierykanskich čynoŭnikaŭ u ramkach najbujniejšaj padobnaj ździełki z časoŭ zakančeńnia Chałodnaj vajny.
The Washington Post adznačaje, što na mitynhu Tramp nie zhadaŭ nivodnaha z amierykanskich źniavolenych, jakija byli vyzvalenyja ŭ vyniku ździełki — u tym liku reparciora Wall Street Journal Evana Hierškoviča, zaklučanaha ŭ Rasii bolš za hod tamu pa abvinavačańniach, jakija amierykanski ŭrad nazvaŭ sfabrykavanymi.
U svaich papiarednich kamientarach pa damovie jon taksama nie nazyvaŭ nivodnaha sa źniavolenych pa imieni, tolki krytykavaŭ amierykanski ŭrad.
«Boža, my zaklučajem žudasnyja, žudasnyja ździełki. Pryjemna havaryć, što my ich viarnuli, ale ci nie stvaraje heta drenny precedent?» — skazaŭ Tramp.
«Ja chacieŭ by pavinšavać Uładzimira Pucina z tym, što jon zaklučyŭ jašče adnu cudoŭnuju ździełku», — dadaŭ jon.
Tramp nieachvotna kazaŭ pra Hierškoviča na praciahu prykładna pieršaha hoda źniavoleńnia žurnalista, ale ŭ traŭni narešcie zaklikaŭ da jahonaha vyzvaleńnia, nahadvaje «UP».
Były prezident ZŠA nieadnarazova vychvalaŭsia svaimi blizkimi adnosinami z Pucinym i zajaŭlaŭ, što Pucin pavažaje jaho i nikoli b nie ŭvarvaŭsia va Ukrainu, kali b Tramp byŭ prezidentam.
Za apošnija miesiacy Tramp niekalki razoŭ publična zajaŭlaŭ, što dabjecca vyzvaleńnia Hierškoviča, jak tolki jaho abiaruć u listapadzie, i što Pucin zrobić heta «dla mianie, a nie dla kahości inšaha».
Tramp pačaŭ krytykavać pahadnieńnie paśla taho, jak prezident Bajden i vice-prezident Charys sustrelisia z vyzvalenymi źniavolenymi.
Ciapier čytajuć
Były ministr kultury Rusłan Čarniecki znajšoŭ sabie padpracoŭku9
Kamientary