Padpisant lista z krytykaj Borys, Polščy: Napružanaść z palakami nahniatajecca zvonku

Kandydat miedycynskich navuk, hałoŭny ŭrač HTMA Biarozaŭskaha rajona Iosif Dziežyc byŭ siarod tych hramadzian Biełarusi polskaj nacyjanalnaści, chto padpisaŭ zvarot da kiraŭnictva Polščy.

U liście padpisanty adznačajuć, što «biełaruskaja dziaržava nikoli nie parušała i nie parušaje pravoŭ hramadzianaŭ». A «Borys i jaje nievialikaje atačeńnie nie ŭpaŭnavažany reprezentavać intaresy polskaj mienšaści», «jany dyskredytavali siabie parušeńniem zakonaŭ našaj dziaržavy».

«Naša Niva»: Iosif Adolfavič, možna zadać niekalki pytańniaŭ adnosna padpisanaha Vami zvarotu da kiraŭnictva Polščy?

Iosif Dziežyc: Ja ničoha nie padpisvaŭ.

«NN»: Nu jak ža? A zvarot hramadzianaŭ Biełarusi polskaj nacyjanalnaści?

ID: A, nu hety padpisvaŭ.

«NN»: A što padšturchnuła da hetaha?

ID: Nu heta majo ŭłasnaje mierkavańnie. Ja nie źbirajusia iści napierakor sumleńniu. U Biełarusi nasamreč stvorany ŭsie ŭmovy dla raźvićcia nacyjanalnych mienšaściaŭ. Usialakija sproby padzialić palakaŭ na «našych» i «nianašych» nakanavanyja na pravał. A to ciapier hetaja situacyja nahadvaje vyviaržeńnie vułkana.

«NN»: A chto vychodziŭ na Vas z takoj inicyjatyvaj?

ID: Nichto.

«NN»: Vy ŭ Sajuzie palakaŭ, jakim kiruje Stanisłaŭ Siamaška?

ID: Tak. Uznačalvaju biarozaŭskuju supołku. Jana naličvaje 43 čałavieki. Uvachodžu ŭ skład kiraŭnictva Sajuza. Siadzieŭ u prezidyumie padčas źjezdu. Mianie siabry pa televizary bačyli.

«NN»: A jakija mierapryjemstvie ładzicie?

ID: Zbory, pajezdki ludziej u Polšču. Voś apošnim časam u Hajnaŭku jeździli.

«NN»: A polski bok dapamahaje?

ID: Jakoje dapamahaje? Voś prachodziŭ naš źjezd u Hrodna. Byli pradstaŭniki ad ministerstva, abłaściej. A voś z polskaha pasolstva nikoha nie było.

«NN»: A kažuć ža, što isnujuć «čornyja śpisy» dla siabroŭ aficyjnaha SPB.

ID: Tak, jość takoje. Ale suprać nas nie ŭžyvałasia. Zaŭsiody vydavali vizu, kali prasili. U Polščy ŭ mianie pryjacieli daktary jość.

«NN»: A što Vy možacie skazać pra dziejnaść SPB na čale z Anžalikaj Borys?

ID: Ja jaje tolki pa televizary bačyŭ. Jana ihnaruje ŭsie našy pasiadžeńni. Jaje b mnohija chacieli pabačyć. Pierahavaryć na temy, jakija nas chvalujuć, abmierkavać. Nielha dzialić palakaŭ. My adna etničnaja hrupa, jakaja pavinna raźvivacca. A ciapier voś idzie takaja napružanaść, jakaja nahniatajecca zvonku. U Borys jość svaja pazicyja, nichto nie moža zabaranić joj jaje vykładać. Ale ciapier jana zajmajecca niejkim raździorhvańniem situacyi. My chacieli b pačuć jaje ź pieršych vusnaŭ. Moj varyjant vyrašeńnia pytańnia — kruhły stoł.

«NN»: A kali vy pryjšli ŭ Sajuz?

ID: U 2005 hodzie. Na tym źjeździe, dzie abirali Borys, mianie nie było. Ale byŭ na dvuch nastupnych — u Vaŭkavysku i Hrodna.

• 0
• 0
• 0
• 0
• 0
• 0
• 0
• 0