U 2024 hodzie ahrapramysłovy kompleks Biełarusi nie vykanaŭ tracinu klučavych pakazčykaŭ, padziež bujnoj rahataj žyvioły vyras na 19%, a ekspart u Afryku sarvaŭsia.
Praŭładnyja ŚMI ścipła paviedamili pra «pośpiechi» ahrapramysłovaha kompleksu (APK), vyniki pracy jakoha ŭ sakaviku razhladalisia na kalehii Ministerstva sielskaj haspadarki i charčavańnia.
Pavodle infarmacyi BiełTA, na vynikovaj kalehii Minsielhasa była adznačana «ŭ cełym stanoŭčaja dynamika raźvićcia» APK. Ułady rapartavali pra poŭnuju zabiaśpiečanaść unutranaha rynku, vykanańnie asnoŭnych paramietraŭ charčovaj biaśpieki, pavieličeńnie ekspartnych pastavak praduktaŭ i rost abjomaŭ vałavoj pradukcyi.
Adnak, jak vynikaje z pastanovy kalehii «Ab vynikach raboty ahrapramysłovaha kompleksu za 2024 hod, acency kadraŭ pa vykanańni daviedzienych pakazčykaŭ i pastanoŭcy zadač na 2025 hod», jakuju publikuje «Biełpoł», krytyki tam hučała bolej, čym pachvały.
Tak, rost vałavoj pradukcyi sapraŭdy skłaŭ 3,4%, ale heta nie płanavyja 5,6%. Pry hetym nie vykanana bolš za tracinu metavych pakazčykaŭ (22 z 58).
Naprykład, nie vykanany pakazčyk pa nadojach małaka: pry płanie 6230 kiłahramaŭ na karovu ŭ Mahiloŭskaj vobłaści nadaili 4333 kiłahramy (69,6% ad płanu), u Viciebskaj — 4504 kiłahramy (72,3%).
U vyniku kalehija pryznała pracu kamitetaŭ pa sielskaj haspadarcy čatyroch abłaściej — Viciebskaj, Homielskaj, Minskaj i Mahiloŭskaj — niezdavalniajučaj.
Skaračeńnie pahałoŭja žyvioły — ahulnanacyjanalnaja prablema
Zhodna z dakumientam, za hod haspadarki stracili amal kožnuju vośmuju śvińniu (minus 11,9%) pry zadańni pavialičyć pahałoŭje na 6%.
Kolkaść bujnoj rahataj žyvioły skaraciłasia na 2,3% pry płanie rostu na 2%.
Prypłod cialat u cełym pa krainie skaraciŭsia na 20700 hałoŭ. Najhoršaja situacyja była ŭ Minskaj vobłaści — u 19 z 22 rajonaŭ hety pakazčyk byŭ admoŭny.
U paraŭnańni z 2023 hodam padziož bujnoj rahataj žyvioły vyras na 19,1%. Najhoršyja pakazčyki byli ŭ Mahiloŭskaj (rost na 35,4%), Minskaj (22,6%) i Homielskaj (22,3%) abłaściach.
Homielskaja vobłaść — simvał krachu «mocnych haspadarnikaŭ»
Asabliva ciažkaja situacyja — u Homielskaj vobłaści, ciapierašni kiraŭnik jakoj Ivan Krupko raniej uznačalvaŭ Minsielhas.
U 2024 hodzie vytvorčaść małaka ŭ vobłaści nie daciahnuła 16,5% da płana, miasa — 11,6%.
Siaredniesutačnaja pryvaha śviniej skłała 78,9% ad płana (525 h zamiest 665 h), bujnoj rahataj žyvioły — 76,6% (505 h zamiest 659 h).
Siaredni nadoj na karovu — 4480 kiłahramaŭ, ci 71,9% ad płana. Pahałoŭje śviniej za hod skaraciłasia amal na tracinu (minus 29,4%).
Situacyja z raślinavodstvam taksama dalokaja ad zdavalniajučaj. Vałavy zbor zbožža — mienšy na 26,7% ad płana, ilnovałakna — mienšy na 50%, harodniny — mienšy na 17%. Kormu dla žyvioły było narychtavana tolki 74,2% ad patrebnaha, uhnajeńniaŭ uniesiena 57% ad nieabchodnaha.
Ekspart u Afryku — mary zamiest realnaści
Ułady lubiać chvalicca praryvam u krainy «dalniaj duhi», adnak fakty śviedčać pra inšaje.
Naprykład, pastaŭki jałavičyny ŭ krainy Afryki skłali 86,1 tonu, ci 4,3% płana. Miasa ptuški było pastaŭlena 417 ton, ale heta tolki 29,8% ad płana. Najlepš vyhladajuć pastaŭki małočnaj syrovatki — 61,6% ad płana (369,5 ton).
A voś u Nihieryju z zapłanavanych 100 ton małaka i viarškoŭ (zhuščanych i suchich), ničoha nie pastaŭlena, jak i z 25 ton miasa ptuški ŭ Zimbabve.
Ciapier čytajuć
Chto tyja dva piersanažy, jakija nie pili ŭ mižvajennaj Vilni, jak Zośku Vieras abudzili ad letarhii i ci praŭdzivaja bajka pra Karatkieviča i restaran11
Kamientary
[Zredahavana]
A urožaj dieło takoje, vot budiet hod zasušlivym - i choť by siebie chvatiło.