Šmatdzietnaja amierykanskaja siamja ŭciakła ŭ Rasiju ad «ŁHBT-prapahandy». Muž užo trapiŭ na vajnu

U siamji Dereka i Dyjany Chafman — try dački va ŭzroście 10, 11 i 12 hadoŭ. Pa słovach baćkoŭ, u ZŠA ich turbavała raspaŭsiudžanaść ŁHBT-kaštoŭnaściaŭ. Mienavita heta prymusiła ich u 2022 hodzie pierajechać z Aryzony ŭ bolš kansiervatyŭny Techas.

Adnak, jak raskazvaŭ Chafman u intervju RT, navat u Techasie jany nie adčuvali siabie ŭ biaśpiecy. Pierałomnym momantam stała razmova adnoj z dačok z adnakłaśnicaj, jakaja pryznałasia ŭ nietradycyjnaj aryjentacyi. Heta prymusiła baćkoŭ surjozna pieraasensavać svaju budučyniu ŭ ZŠA.

U 2023 hodzie siamja pačała razhladać mahčymaść pierajezdu ŭ Rasiju. Paśla vizitu ŭ Maskvu, jaki staŭ vyrašalnym, u sakaviku 2025 hoda Derek razam z žonkaj i dziećmi pierajechaŭ u padmaskoŭnuju Istru, dzie pasialiŭsia pobač ź inšymi vychadcami z ZŠA.

Adnak, niahledziačy na zahadzia spłanavany pierajezd, nichto ź siamji nie zdoleŭ avałodać ruskaj movaj navat na bazavym uzroŭni. U vyniku dzieci nie zmahli pajści ŭ škołu, a baćki — znajści pracu.

Praź niekalki miesiacaŭ paśla pierajezdu 45-hadovy Chafman pryniaŭ rašeńnie zaklučyć hadavy kantrakt ź Ministerstvam abarony Rasii.

Pavodle Dyjany, muž doŭha šukaŭ sposab trapić u armiju i prachodziŭ sumoŭi ŭ niekalkich ustanovach.

U svaim videazvarocie Derek raskazaŭ, što hałoŭnaj pryčynaj padpisańnia kantraktu była mahčymaść chutkaha atrymańnia hramadzianstva:

«Kali ja padpišu kantrakt na hod i adsłužu jaho, ja i maja siamja atrymajem rasijskaje hramadzianstva. Zvyčajna heta zajmaje ad piaci da šaści hadoŭ. Heta doŭhi šlach. Kali ja padpišu kantrakt, my zmožam atrymać hramadzianstva adrazu. I heta vielmi važna. Buduć ilhoty. Spadziajusia, dziaŭčynki zmohuć chadzić u škołu, i ja zmahu pracavać. (…)

Akramia hramadzianstva i hrošaj, dla mianie vielmi važnaja pavaha, toje, što my zasłužyli svajo miesca tut, u Rasii, zasłužyli hramadzianstva. (…) I nichto nie skaža, što my tut čužyja».

Pavialičyć

U adnym ź videa, jakoje Dyjana apublikavała prykładna miesiac tamu na svaim jutub-kanale, žančyna raskazvała, što jaje muž znachodziŭsia ŭ łahiery dla navabrancaŭ, dzie prachodziŭ vajskovuju padrychtoŭku.

«Jon byŭ na navučańni paru tydniaŭ. I my dumali, pakolki ŭ jaho jość siertyfikaty zvarščyka i vialiki dośvied u budaŭnictvie i zvarcy, jaho adpraviać na rabotu, dzie jon budzie ŭ biaśpiecy, ci, pa mienšaj miery, nie budzie joj padviarhacca. Ale, na žal, my nie ŭpeŭnienyja, što tak budzie», — dzialicca žančyna.

«Jon jeść kožny dzień, ale niašmat. Pa-pieršaje, u jaho prablemy sa straŭnikam, pa-druhoje, ježa suchavataja, i z napojaŭ dastupnaja tolki vada. Usio heta pryvodzić da taho, što jon amal nie jeść i pačynaje chudnieć. Tamu jon adnačasova i krychu radujecca, i nie vielmi. Bo jak ni kruci, ciažka trymacca, kali narmalna nie jasi», — raskavaje DeAna.

Žančyna taksama tłumačyć, što ludzi ŭ kamientarach nie razumiejuć realnaj situacyi: mnohija miarkujuć, što siamja atrymała vialikuju sumu hrošaj za kantrakt. Adnak, pa jaje słovach, heta nie adpaviadaje rečaisnaści.

«Nasamreč pracoŭnyja mihranty nie atrymlivajuć tych hrošaj, pra jakija piša na biłbordach i płakatach paŭsiul. Jany sapraŭdy atrymlivajuć bonus. Tak, atrymlivajuć. Ale, na žal, heta nie toj bonus, pra jaki vy dumajecie. I na žal, my ŭsio jašče majem zapazyčanaść za dom», — žalicca jana na pieršyja realii słužby muža ŭ rasijskaj armii.

Žančyna padkreślivaje, što vielmi ŭdziačnaja adnamu čałavieku, jaki zrazumieŭ, što siamja nie atrymała abiacanych vypłat, i vyrašyŭ dapamahčy: kupiŭ mužu dobryja boty i šmat vajskovaha ryštunku.

«Dziakujučy hetamu jon budzie bolš abaronieny, čym kali b karystaŭsia tym, što vydajuć u vojsku. U jaho ciapier budzie dobry šlem i broniekamizelka», — radujecca Dyjana.

U videa, apublikavanym 15 lipienia, jana koratka paviedamiła, što z mužam pakul usio ŭ paradku:

«Jon žyvy i zdarovy i ličyć dni, kali pryjedzie ŭ hości».

Žančyna taksama adznačyła, što ŭ bližejšy čas maje sustrecca z advakatam, kab pačać afarmleńnie dakumientaŭ dla siabie i dziaciej na časovaje pražyvańnie i atrymańnie hramadzianstva.

• 1
• 3
• 26
• 69
• 2
• 1
• 6
• 0