Małdaŭski aliharch Płachatniuk pryjazdžaŭ u Maskvu i Minsk z čužym pašpartam
Były ŭpłyvovy aliharch z Małdovy Uładzimir Płachatniuk, jaki ciapier aryštavany ŭ Hrecyi za ŭdzieł u admyvańni hrošaj praz schiemu pad nazvaj «małdaŭski łandramat» (kala $20 miljardaŭ rasijskich karupcyjnych srodkaŭ), nieadnarazova naviedvaŭ Maskvu i Minsk z padroblenym pašpartam. Pavodle rasśledavańnia vydańnia The Insider, jon vykarystoŭvaŭ falšyvaje imia — Michaił Taŭšanaŭ — i pry hetym sustrakaŭsia z vysokapastaŭlenymi asobami z Kramla.
Zhodna z aŭdyjozapisami, ź siaredziny 2024 hoda Płachotniuk vioŭ pieramovy z namieśnikam kiraŭnika Administracyi prezidenta Rasii Dźmitryjem Kozakam. Kreml razhladaŭ Płachotniuka jak važnaha hulca, jaki moh by paŭpłyvać na vybary ŭ Małdovie. Apošni vizit Płachatniuka ŭ Maskvu adbyŭsia ŭ krasaviku 2025 hoda.
Pry zatrymańni ŭ Płachatniuka znajšli bolš za 20 falšyvych dakumientaŭ, u tym liku ŭkrainskija, rasijskija i bałharskija pašparty. Jon svabodna pieramiaščaŭsia pad falšyvym imieniem i navat atrymlivaŭ indyvidualnaje absłuhoŭvańnie ŭ maskoŭskim hateli «Nacyjanal». Za dostup u fitnes jon płaciŭ asobna, kab znachodzicca tam adnamu, a masažny kabiniet jamu paraili nie naviedvać, bo tam pracavała žančyna z Małdovy, jakaja mahła jaho paznać.
U červieni 2024 hoda Płachatniuk tajemna prylacieŭ u Maskvu, kab sustrecca ź Dźmitryjem Kozakam. Jaho sustreču arhanizoŭvaŭ były rasijski handlovy pradstaŭnik u Małdovie, jaki havaryŭ pra heta ŭ pryvatnych razmovach. Padčas vizitu Płachatniuk praktyčna nie pakidaŭ hatelny numar i nasiŭ kiepku ź nizkim kazyrkom dy soncaachoŭnyja akulary, kab paźbiehnuć apaznańnia.
Pieramovy tyčylisia viartańnia Płachotniuka ŭ palityčnaje žyćcio Małdovy. Kozak nibyta papraknuŭ jaho, što kraina ŭ zaniapadzie častkova ź jahonaj viny, bo raniej jon mieŭ usiu ŭładu, ale jaje straciŭ. Płachatniuk adkazaŭ, što hatovy viarnucca i dapamahčy, ale biez padtrymki nie spravicca.
Miarkujučy pa prasłuchoŭkach, nastupnaja sustreča Płachatniuka i Kozaka adbyłasia ŭžo praz tydzień — u Minsku.
Jak vidać z danych ab pieralotach aliharcha, jana taksama była daloka nie apošniaj. Z tym ža pašpartam na imia Taŭšanava Płachatniuk prylataŭ u Maskvu ŭ lipieni i kastryčniku 2024 hoda, a taksama ŭ sakaviku i krasaviku 2025 hoda. Uvieś hety pieryjad byŭ vielmi burnym dla małdaŭskaj palityki i dla Kramla, jaki aktyŭna sprabavaŭ na jaje paŭpłyvać.
Kramloŭskaja padtrymka Płachatniuka była častkaj šyrejšaj stratehii ŭpłyvu na małdaŭskija vybary. U 2024 hodzie, napiaredadni refierendumu pa jeŭraintehracyi i prezidenckich vybaraŭ, Rasija padtrymlivała aliharcha Iłana Šora, jaki arhanizavaŭ razdaču hrošaj vybarcam — najaŭnymi, bankaŭskimi kartami, padarožžami i charčavańniem — kab schilić hałasy na karyść prarasijskich kandydataŭ.
Kali heta nie spracavała, Kraml pieraklučyŭsia na stvareńnie dvuch supraćlehłych palityčnych błokaŭ — adzin adkryta prarasijski (u jaho ŭvachodziać Ihar Dadon, Uładzimir Varonin, Iryna Vłach i Vasile Tarleŭ), a inšy nibyta prajeŭrapiejski, ale z palitykami, źviazanymi z Płachatniukom. Takim čynam Rasija spadziajecca achapić jak maha bolšuju častku vybarcaŭ z roznych łahieraŭ.
U Hrecyi pa zapycie Małdovy zatrymali aliharcha Płachatniuka
Maja Sandu abvinavaciła Rasiju va ŭmiašańni ŭ parłamienckija vybary ŭ Małdovie
U Małdovie admovilisia rehistravać vybarčy błok, jaki pravioŭ svoj źjezd u Maskvie
Były prezident Małdovy maryć paśla vybaraŭ adnavić adnosiny z Łukašenkam
Prezident Małdovy ahučyła infarmacyi pra płan destabilizacyi krainy. U im mieli ŭdzielničać i hramadzianie Biełarusi
Ciapier čytajuć
Były ministr kultury Rusłan Čarniecki znajšoŭ sabie padpracoŭku9
Kamientary