Kitaj atrymaŭ dostup da pramysłovych sakretaŭ Hiermanii praz ekspart redkaziamielnych mietałaŭ

Ciapier, kab atrymać licenziju na ŭvoz hetych materyjałaŭ, niamieckija kampanii abaviazanyja pradstaŭlać Kitaju padrabiaznuju i kanfidencyjalnuju infarmacyju: schiemy vytvorčaści, fotazdymki pradukcyi, śpisy klijentaŭ, a taksama źviestki pra hadavyja abjomy vypusku. Pra heta piša vydańnie The Insider sa spasyłkaj na Bloomberg.

Prablema ŭ tym, što Hiermanija całkam zaležyć ad Kitaja — kala 95% redkaziamielnych elemientaŭ jana atrymlivaje mienavita adtul. Tamu firmy vymušanyja padparadkoŭvacca novym patrabavańniam, faktyčna raskryvajučy Piekinu svaje kamiercyjnyja sakrety.

Hetyja źviestki dazvalajuć Kitaju zrazumieć, jakija haliny i pradpryjemstvy ŭ Hiermanii najbolš uraźlivyja, dzie isnujuć «vuzkija miescy» ŭ łancužkach pastavak, i, pry nieabchodnaści, akazvać ekanamičny cisk abo navat paralizavać vytvorčaść.

Reakcyja ŭładaŭ i biznesu

Urad Hiermanii pryznaje pahrozu, ale, jak adznačaje Bloomberg, nie maje realnych instrumientaŭ upłyvu. Kampanii taksama ŭśviedamlajuć, što zaležnaść ad Kitaja niebiaśpiečnaja, ale pošuk alternatyŭnych pastaŭščykoŭ redkaziamielnych elemientaŭ budzie vielmi darahim — spatrebicca pierabudavać łancužki pastavak, łahistyku, kantrakty, mahčyma, navat źmianić technałohii.

Tamu biznes zajaŭlaje: my hatovyja dyviersifikavać pastaŭki, ale tolki kali dziaržava kampiensuje nam hetyja vydatki. Ułady ž u adkaz kažuć, što heta — adkaznaść samich kampanij.

«Zaležnaść robić nas uraźlivymi dla šantažu. My pavinny dyviersifikavać handlovyja i syravinnyja łancužki», — zajaviŭ Mierc.

Nastupstvy dla pramysłovaści

Tym časam małyja i siarednija pradpryjemstvy ŭžo sutykajucca sa spynieńniem vytvorčaści z-za zatrymak z kitajskimi licenzijami. Bujniejšyja kancerny pakul atrymlivajuć dazvoły svoječasova, ale admovilisia ad stvareńnia zapasaŭ, aścierahajučysia abvinavačańniaŭ z boku Kitaja ŭ kantrabandzie.

Piekin padazrona stavicca da tych, chto zakazvaje zanadta šmat syraviny: ułady mohuć vyrašyć, što kampanija zakuplaje lišniaje, kab pieradać hetyja materyjały amierykancam abo vykarystoŭvać u vajennych metach. U takim vypadku im mohuć admović u licenzii abo pačać pravierku.

Aficyjnaje tłumačeńnie Piekina

Piekin śćviardžaje, što novyja praviły nieabchodnyja dla «abarony miru», bo hetyja materyjały mohuć vykarystoŭvacca ŭ vajennaj śfiery. Adnak na praktycy heta — častka ekanamičnaha cisku na Zachad, anałah handlovych sankcyj, jakija ZŠA raniej prymianiali suprać Kitaja, adznačaje Bloomberg.

Pavodle danych analitykaŭ, Kitaj užo źbiraje infarmacyju, jakaja dazvalaje jamu acanić uraźlivaść abaronnaj pramysłovaści krain NATA.

• 3
• 0
• 2
• 8
• 2
• 0
• 7
• 0