Polskaje MZS adkliča zhodu na pracu rasijskaha konsulstva ŭ Hdańsku. Pra heta zajaviŭ kiraŭnik polskaha źniešniepalityčnaha viedamstva Radosłaŭ Sikorski paśla vystupu ŭ Siejmie.
Jon nahadaŭ, što raniej u adkaz na padpały va Urocłavie i Varšavie byli zakrytyja konsulstvy ŭ Poznani i Krakavie, piša Reform.news.
«Ja zajaviŭ tady, što kali Rasija nie pierapynić svaje dyviersijnyja ataki na Polšču, a Rasija nie tolki nie spyniła, ale i ŭzmacniaje hetyja ataki. Jak ja ŭžo skazaŭ u svajoj pramovie, kali metaj špijonstva i dyviersijnaj dziejnaści źjaŭlajucca čałaviečyja achviary, to my majem spravu ŭžo nie z dyviersijaj, a ź dziaržaŭnym teroram. Tamu heta nie budzie našym poŭnym adkazam, ale ja ŭžo pryniaŭ rašeńnie adklikać zhodu na pracu apošniaha rasijskaha konsulstva ŭ Hdańsku», — skazaŭ jon.
Pavodle jaho słovaŭ, rasijski bok budzie aficyjna apavieščany pra heta paźniej siońnia abo zaŭtra.
Adkazvajučy na ŭdakładniajučaje pytańnie, Sikorski skazaŭ, što Polšča nie maje namieru razryvać dypłamatyčnyja adnosiny z Rasijaj.
«My nie płanujem razryvać dypłamatyčnych adnosinaŭ, jak i inšyja krainy nie razryvajuć ich u vypadku aktaŭ sabatažu abo teraryzmu na svajoj terytoryi. Nahadajem, što ŭ nas byŭ napad na pryvatny dom premjer-ministra Vialikabrytanii, dyviersii ŭ Hiermanii, Čechii i Bałharyi, a taksama zabojstvy ŭ šerahu inšych krain. Siońnia viečaram ja asabista pahavaru z Hienieralnym sakratarom NATO pa hetym pytańni. A zaŭtra ja praviadu bryfinh dla Rady pa zamiežnych spravach Jeŭrapiejskaha sajuza», — skazaŭ jon.
Ministr taksama dadaŭ, što MZS budzie damahacca dalejšych abmiežavańniaŭ na pieramiaščeńnie rasijskich dypłamataŭ. Havorka idzie pra atrymańnie imi dazvołu na vyjezd za miežy Mazavieckaha vajavodstva pry pajezdkach pa terytoryi Polščy.
Kamientary