Stała viadoma, jakija harantyi źbirajucca dać ZŠA Ukrainie ŭ vypadku pryniaćcia mirnaha płanu

Havorka idzie pra asobny dakumient, jaki supravadžaje «mirny płan» z 28 punktaŭ, jaki amierykanski bok pieradaŭ Ukrainie 20 listapada i jaki praduhledžvaje, siarod inšaha, sastupku terytoryj i admovu ad siabroŭstva ŭ NATA.

U dakumiencie — apisańni harantyj havorycca, što ŭ vypadku budučaj «značnaj, naŭmysnaj i ŭstojlivaj uzbrojenaj ahresii» Rasii suprać Ukrainy jaje buduć razhladać jak pahroźlivuju dla miru i biaśpiecy transatłantyčnaj supolnaści i ZŠA, tamu sajuźniki pavinny adreahavać adpaviedna, uklučajučy vykarystańnie vajskovaj siły.

Zhodna z publikacyjaj, prapanova vyhladaje nastupnym čynam:

1. Hetaja ramka vyznačaje ŭmovy dla spynieńnia ahniu pamiž Ukrainaj i RF i daje harantyi biaśpieki, madellu dla jakich źjaŭlajucca pryncypy art. 5 Paŭnočnaatłantyčnaj damovy, adaptavanyja da abstavin hetaha kanfliktu i intaresaŭ ZŠA i jeŭrapiejskich partnioraŭ.

Złučanyja Štaty paćviardžajuć, što značnaja, naŭmysnaja i ŭstojlivaja (sustained) uzbrojenaja ataka z boku RF praz uzhodnienuju «liniju pieramirja» ŭhłyb ukrainskaj terytoryi budzie ličycca napadam, jaki pahražaje miru i biaśpiecy transatłantyčnaj supolnaści.

U vypadku takoha zdareńnia prezident ZŠA pavinien, vykonvajučy svaje kanstytucyjnyja paŭnamoctvy i paśla nieadkładnych kansultacyj z Ukrainaj, NATA i jeŭrapiejskimi partniorami, vyznačyć miery, nieabchodnyja dla adnaŭleńnia biaśpieki. Hetyja miery mohuć uklučać dapamohu ŭ vyhladzie padtrymki ŭzbrojenymi siłami, raźvieddanymi i łahistyčnaj padtrymki, ekanamičnyja i dypłamatyčnyja miery, a taksama inšyja kroki, jakija paličać adpaviednymi.

Aceńvać kožnaje zajaŭlenaje parušeńnie budzie sumiesny acenačny miechanizm z udziełam NATA i Ukrainy. Členy NATA, uklučajučy Francyju, Złučanaje Karaleŭstva, Hiermaniju, Polšču i Finlandyju, paćviardžajuć, što biaśpieka Ukrainy źjaŭlajecca składnikam stabilnaści ŭ Jeŭropie, i abaviazvajucca dziejničać uzhodniena z ZŠA ŭ adkaz na luboje ŭstanoŭlenaje parušeńnie, zabiaśpiečvajučy abjadnanuju i nadziejnuju pazicyju strymlivańnia.

2. Hetaja ramka nabyvaje moc z momantu padpisańnia i budzie zastavacca dziejnaj na praciahu 10 hadoŭ, z adnaŭleńniem pa ŭzajemnaj zhodzie. Za jaje vykanańniem budzie nazirać Sumiesnaja manitorynhavaja kamisija, jakuju ŭznačalvajuć jeŭrapiejskija partniory pry ŭdziele ZŠA.

Nižej pryvodziacca radki podpisaŭ dla Ukrainy, RF, ZŠA, ES i NATA.

Čynoŭnik ź Biełaha doma skazaŭ, što Rasiju prainfarmavali pra hety prajekt, ale pakul niezrazumieła, ci čakajecca, što jaho pavinien padpisać asabista kiraŭnik Kramla.

Surazmoŭca kaža, što prapanovu płanujuć abmiarkoŭvać ź jeŭrapiejskimi dziaržavami i jaje źmiest moža mianiacca. Pavodle jaho słoŭ, u administracyi Trampa ličać prapanavany prajekt harantyj vielmi vyjhryšnaj prapanovaj dla Ukrainy i dla jaje doŭhaterminovaj biaśpieki.

Śpiecpasłańnik Trampa Styŭ Uitkaf nibyta abmiarkoŭvaŭ hety dakumient z sakratarom RNBA Ukrainy Rustemam Umieravym u hetyja vychadnyja, a ŭ čaćvier dakumient pieradali ŭ piśmovym vyhladzie prezidentu Zialenskamu.

Axios interpretavali pračytany tekst jak pramoje abaviazacielstva ZŠA ŭmiašacca dla abarony Ukrainy ŭ vypadku novaha napadu RF, što moža nie spadabacca Trampavym prychilnikam, jakija prytrymlivajucca idei «Amieryka pierš za ŭsio». The Wall Street Journal u svajoj publikacyi zhadvali, što «harantyi» nie praduhledžvajuć pramych abaviazacielstvaŭ ZŠA pa vajennaj dapamozie Ukrainie.

• 1
• 2
• 4
• 14
• 0
• 0
• 9
• 0