Pradstaŭnictva «Rassupracoŭnictva» pravodzić u «Ruskim domie» ŭ Homieli vystavu «Hieroi našaha času», pryśviečanuju vajnie va Ukrainie. U dadzienym vypadku hierojami pradstaŭleny rasijanie, jakija adpravilisia na vajnu suprać Ukrainy, piša «Fłahštok».
«Ekspazicyja pryśviečana hieraizmu našych voinaŭ u chodzie «Śpiecyjalnaj vajennaj apieracyi» i hłybokim histaryčnym karaniam, jakija stahodździami złučajuć Branščynu, Danbas i ziemli sučasnaj Ukrainy», — śćviardžajecca ŭ aficyjnym pres-relizie.
Ideja i nazva vystavy abyhryvajuć nazvu ramana Lermantava.
Adkaznym za praviadzieńnie vystavy źjaŭlajecca Branski dziaržaŭny krajaznaŭčy muziej. Ekspazicyja — jaho prajekt. Na stendach, aproč inšaha, pakazana karta z zachoplenymi terytoryjami Ukrainy.
Kiraŭnik «Ruskaha doma» Alaksandr Maržuchin užo prezientavaŭ vystavu ŭdzielnikam tak zvanaha «Histaryčnaha kłuba», členam «Patryjotaŭ Biełarusi» i inšym naviedvalnikam. Prapahandysckuju ekspazicyju pakazvajuć nie tolki darosłym, ale i dzieciam — niadaŭna ŭ «Ruski dom» pryvodzili školnikaŭ siarednich kłasaŭ.
Heta pieršy zafiksavany «Fłahštokam» vypadak nastolki adkrytaj prapahandy rasijskaj vajny ŭ Homieli. Admietna, što miascovyja dziaržaŭnyja ŚMI nie advažylisia raskazać pra vystavu — materyjałaŭ pra jaje pakul nie było ŭ aficyjnaj presie.
«My dajom Štatam toje, što jany chočuć». Rasijski kanał apublikavaŭ videa, jakoje nazyvajuć zapisam Ryžankova schavanaj kamieraj u mašynie14
Kamientary