Rasijskaje kamiedyjnaje šou «Što było dalej» moža pierajechać u Kazachstan
Pryčyny — admova ŭ rehistracyi tavarnaha znaka «Što było dalej» (ŠBD) + 50‑hadovaja zabarona Saburavu na ŭjezd u Rasiju + zručnaść łakacyi dla asobnych haściej, piša Mash.
Departacyja Nurłana Saburava stała apošnim arhumientam dla pierajezdu dziecišča Labelcom u Kazachstan. Kamanda ŭžo abkatała zdymki ŭ respublicy — klikała Skryptanita, jaki suprać vajny, i błohiera Alaksandra Zubarava. Na hetych piłotach komiki zrazumieli: łakacyja adkryvaje cikavaje supracoŭnictva. Da taho ž novy kanał na Jutubie biez prablem manietyzujecca, bo zarehistravany za miažoj.
Prablemki ŭ aŭtaraŭ šou pačalisia zadoŭha da admieny Saburava: u pradziusara Maksima Marozava ŭ 2022‑m nie vyjšła atrymać tavarnyja znaki «Što było dalej» i «ŠBD». Raspatent nie znajšoŭ u šou ŭnikalnaści i spasłaŭsia na vielizarnuju kamandu: maŭlaŭ, zamacoŭvać pravy tolki za adnym niesumlenna. Marozaŭ sabraŭ videazvaroty Nurłana Saburava, Alaksieja Ščarbakova, Emira Kašokava, Illi Makarava i Tambi Masajeva sa zhodaj na rehistracyju znaka. Nie dapamahło, vierdykt nie źmianiŭsia.
Tady pradziusar pajšoŭ u sud z tym ža zapytam, paralelna sprabavaŭ dakazać, što Saburaŭ — tolki viadučy, da kiraŭnictva ŠBD dačynieńnia nie maje, rašeńniaŭ nie prymaje. Nichto nie pavieryŭ. Biez tavarnaha komiki mahli stracić brend.
Prajekt prydumaŭ, prafinansavaŭ i zapuściŭ u 2019‑m Viačasłaŭ Dusmuchamietaŭ.
Kamanda doŭha biłasia za ŭvahu rekłamadaŭcaŭ — admaŭlali z-za taksičnaści prajekta. Tolki praz hod šou pajšło ŭ plus. U 2025‑m ŠBD vyjšła na darahija rekłamnyja słoty — heta 35 młn rasijskich rubloŭ (450 tysiač dalaraŭ) za zvyčajny vypusk čystymi i 60 młn za navahodnija (775 tysiač dalaraŭ). Rekord za ŭsie intehracyi, užo paśla sychodu na Jutub, — 120 młn rasijskich rubloŭ (1,5 młn dalaraŭ).
Ciapier čytajuć
U turmie pamior były supracoŭnik KDB Mikałaj Varapaj, asudžany za špijanaž na karyść Ukrainy3
Kamientary