Vučnia šostaha kłasa pastavili na ŭlik za toje, što jeŭ siemki. Baćka pajšoŭ u sud
Baćka vučnia nie źmiryŭsia z rašeńniem kamisii pa spravach niepaŭnaletnich i praz sud dakazaŭ: brudnaja padłoha — heta nie nahoda klajma dla syna.
U redakcyju «Mocnych Navin» źviarnuŭsia minčanin ź niezvyčajnaj historyjaj: jamu pryjšłosia praz sud dakazvać, što jaho syn-šaścikłaśnik — nie chulihan.
Mužčyna raspavioŭ, jak praz zvyčajnyja siemki dzicia pastavili na ŭlik u milicyju, i ŭ kolki heta abyšłosia dziaržavie.
Sama historyja adbyłasia letaś. 13‑hadovy školnik paśla ŭrokaŭ zajšoŭ u harderob i vyrašyŭ pajeści siemak.
Pa viersii škoły, łupińnie chłopčyk vyploŭvaŭ prosta na padłohu i nie źviartaŭ uvahi na zaŭvahi harderobščycy.
Administracyja navučalnaj ustanovy nie stała abmiažoŭvacca vychavaŭčaj hutarkaj i źviarnułasia ŭ Kamisiju pa spravach niepaŭnaletnich. Dziejańni dziciaci pryznali «drobnym chulihanstvam» (art. 19.1 KaAP), i padletka pastavili na aficyjny ŭlik.
Baćka nie pahadziŭsia z takim rašeńniem i pajšoŭ u sud.
Tam pryjšli da vysnovy, što siemki — heta pradukt charčavańnia, ich u škole možna jeści tolki ŭ stałovaj. U harderobie — nielha. Adnak parušeńnie praviłaŭ unutranaha rasparadku škoły — heta dyscyplinarnaja pravina, a nie «chulihanstva».
Sud pryznaŭ rašeńnie ab pastanoŭcy na ŭlik niezakonnym i abaviazaŭ kamisiju jaho admianić. Bolš za toje, administracyju rajona abaviazali vypłacić baćku dziciaci sudovyja vydatki. Pryncypovaja pazicyja mužčyny kaštavała biudžetu 1832 rubli.
«My dajom Štatam toje, što jany chočuć». Rasijski kanał apublikavaŭ videa, jakoje nazyvajuć zapisam Ryžankova schavanaj kamieraj u mašynie14
Kamientary