Litva nie była hatovaja da adkryćcia tajvańskaha pradstaŭnictva, jano stała pamyłkaj — śpikier Siejma

Śpikier Siejma Litvy Juozas Olekas kaža, što Litva naležnym čynam nie padrychtavałasia da adkryćcia tajvańskaha pradstaŭnictva ŭ 2021 hodzie, i tamu heta była pamyłka. Pavodle słoŭ kiraŭnika parłamienta, kirujučaja kaalicyja, zajaŭlajučy pra heta, imkniecca nie da zakryćcia pradstaŭnictva, a da palapšeńnia supracoŭnictva z Tajbejem, piša LRT.

«My nie padrychtavalisia da pracy z Tajvaniem da pryniaćcia hetaha rašeńnia [ab adkryćci pradstaŭnictva], kab atrymać dastatkovuju ekanamičnuju addaču ad Tajvania. Pa-druhoje, my nie pracavali naležnym čynam z partniorami i sajuźnikami, kab zabiaśpiečyć bolš šyrokaje pryniaćcie rašeńnia, my zastalisia takimi adzinymi. (…) Mnie nieadnarazova davodziłasia kamunikavać z pradstaŭnikami inšych jeŭrapiejskich krain, jany pa-siabroŭsku padtrymlivajuć, ale nie iduć za hetym prykładam», — skazaŭ Olekas u prahramie «Forum LRT» u paniadziełak.

«My kažam, što pryznajom, što ŭ toj čas prymać takoje rašeńnie z takoj padrychtoŭkaj było pamyłkaj, patrabavałasia značna bolšaja padtrymka z boku sajuźnikaŭ», — adznačyŭ śpikier Siejma.

Pavodle jaho słoŭ, kiroŭnaja kaalicyja ni razu nie zajaŭlała pra nieabchodnaść zakryćcia tajvańskaha pradstaŭnictva i nie imkniecca da hetaha.

«Ci treba zaŭsiody maŭčać, zrabiŭšy taki krok? Heta skazana dla taho, kab my mahli ŭmacoŭvać ciapierašnija suviazi i z tajvańcami», — skazaŭ Olekas.

«Skazać, jak jość, nie hrech. (…) Toje, što ciapier robić urad, toje, što robić Ministerstva zamiežnych spraŭ, mnie zdajecca, heta nieabchodnyja rečy, jakija raniej byli niedastatkova zroblenyja. (…) Nieabchodna narmalizavać adnosiny z Kitajem i ŭmacoŭvać ekanamičnyja suviazi z Tajvaniem», — dadaŭ jon.

Ministr zamiežnych spraŭ Kiastucis Budrys śćviardžaŭ, što metaj Litvy ŭ adnosinach z Tajvaniem źjaŭlajecca «dobry płan ekanamičnaha supracoŭnictva».

«Ja pracuju nad hetym z Tajvaniem. (…) Heta narmalnaje dvuchbakovaje supracoŭnictva, takoje, jakoje my chočam u ekanomicy, kultury i inšych halinach. U halinie ekanomiki my chočam dasiahnuć peŭnych pakazčykaŭ i pracujem [nad hetym]», — skazaŭ kiraŭnik litoŭskaj dypłamatyi.

Pavodle słoŭ Budrysa, «niama takoha pytańnia na paradku dnia», jak zakryćcio tajvańskaha pradstaŭnictva.

* * *

Kali vy žyviacie ŭ Litvie, to možacie za chvilinu padtrymać «Našu Nivu» častkaj vašaha padachodnaha padatku. Heta nie budzie kaštavać vam ani centa.

Vy prosta pieranakirujecie 1,2% ad užo spłačanaha vami padatku pry padačy štohadovaj dekłaracyi.

Voś padrabiaznaja instrukcyja, jak heta zrabić, kali vy pracujecie ŭ Litvie.

• 2
• 1
• 0
• 2
• 0
• 0
• 0
• 0