Kreml zaćvierdziŭ Milinkieviča?

Voś kažuć: sumnyja vybary, usio ŭžo viadoma. Ale heta — kali bačyć tolki nadvodnuju častku ajsberha. Miž tym vynik elektaralnaj kampanii šmat u čym vyznačajuć padvodnyja płyni.

Pavodle paryskaj «Mond», nia chto-niebudź, a francuski ministar zamiežnych spraŭ F. Dust-Błazi, jaki byŭ u Maskvie ź vizytam 18—19 studzienia, padšturchnuŭ Kreml paŭpłyvać na Łukašenku, kab toj zaprasiŭ na vybary naziralnikaŭ ABSE.

Dumajecie, Zachad pieraaceńvaje svaju dyplamatyju?

Ale j sapraŭdy — sačycie za datami! — 18 studzienia biełaruskaje zamiežnapalityčnaje viedamstva abvieściła praź BiełTA pra zaprosiny naziralnikaŭ tolki ad SND, EŭrAzESu dy ADKB (žaleznyja tavaryšy!). I raptam praź dzień, 19-ha, na bryfinhu ŭ MZSie stanovicca viadoma, što ŭ śpisie zaprošanych fihuruje ŭžo i ciažkavymaŭlalnaje BDIPČ ABSE. Mo napiaredadni «mašynistka pamyliłasia» (tak vykručvalisia za časami Palitbiuro)?

Idziom dalej. Zhadajcie: z kim trochi raniej sustrakaŭsia Dust-Blazi ŭ Paryžy? Pravilna, ź Milinkievičam! Heta nahadvaje ŭžo lahičny łancužok.

A voś i nastupnaje źviano. Dniami «Moskovskije novosti» dali zrazumieć, što miž Zachadam i rasiejskim kiraŭnictvam, badaj, vymaloŭvajecca kansensus datyčna fihury Milinkieviča. Jon, maŭlaŭ, padajecca kampramisnaj kandydaturaj — demakrat, ale biez paźniakoŭskaha radykalizmu ŭ nacyjanalnym pytańni. Maskoŭskaje vydańnie padkreślivaje: tak, vyjhrać u Łukašenki na hetych vybarach nierealna, ale realna viarnuć apazycyju ŭ pravavoje palityčnaje pole.

Kreml, badaj, nasamreč nie chacieŭ by kłaści ŭsie jajki ŭ adzin košyk. Inšaje pytańnie, ci zdoleje apazycyja padrychtavać druhi košyk. Vynikam minułaj prezydenckaj kampanii byli tolki raźbityja nočvy. Adziny kandydat 2001 h. prahłynuŭ parazu, raspuściŭ zarodkavy «Majdan» na Kastryčnickim placy — i loh na dno.

Ciapier rubam paŭstaje pytańnie, ci budzie Milinkievič sapraŭdy adzinym. Inačaj kažučy, ci pojdzie na sastupku jamu Kazulin (jaki vidavočna adstaje pavodle rejtynhu dy kamandnaha patencyjału, ale razam z tym adciahvaje dolu niebahataha apazycyjnaha resursu). Darečy, dałučeńnie da lahieru abjadnanych demakrataŭ stała b dla Kazulina najlepšym abviaržeńniem versii, što jon jość kreaturaj kiroŭnaj kamandy.

Kali ž adziny nabiare de-fakta adsotkaŭ 30, to jaho ŭžo tak prosta nia zhornieš z palityčnaje doški. Faktyčna, jon nabyvaje tady imunitet, šmat macniejšy ad deputackaha. I zdolny stać jadrom dalejšaj kryštalizacyi apazycyjnych siłaŭ.

U takim razie, pavodle vyrazu adnaho z analitykaŭ, 19 sakavika ŭsio tolki pačniecca. U krainie moža skłaścisia inšaja palityčnaja kanfihuracyja. Apanenty ŭłady ŭžo nia buduć vyhladać takimi marhinałami. Źjavicca šaniec pakrysie vyprastać praklatuju śpiral maŭčańnia.

• 0
• 0
• 0
• 0
• 0
• 0
• 0
• 0