Nie stała instytuta, jaki stvaraŭ hienpłany Minska i vyznačaŭ zialonyja zony ŭ horadzie. Horadabudaŭnikoŭ padparadkavali prajekciroŭščykam daroh i raźviazak
«Minskhrada», jaki vyznačaŭ stratehiju raźvićcia dvuchmiljonnaha horada na praciahu amal tryccaci hadoŭ, dałučyli da «Minskinžprajekta».
Aktyvisty raniej užo zaŭvažali, što horadabudaŭničyja dakumienty, jakija raniej byli prerahatyvaj śpiecyjalizavanaha instytuta «Minskhrada», apošnim časam vykonvajuć niaprofilnyja prajektnyja arhanizacyi.
Tłumačeńnie pryčyny možna znajści ŭ abviestcy na sajcie «Minskhrada», jakaja kaža, što zhodna z rašeńniem Minharvykankama ad 24 śniežnia 2025 hoda arhanizacyja rearhanizujecca šlacham dałučeńnia da «Minskinžprajekta». Sam praces źlićcia jurydyčna musiŭ zaviaršycca jašče 23 krasavika 2026 hoda. A 1 maja — pierastać adkryvacca i sajt «Minskhrada» ź jaho archivam horadabudaŭničaj dakumientacyi pa Minsku i vakolicach, ale pakul hetaha nie adbyłosia.
Charakterna, što abviestku na sajcie «Minskhrada» supravadžaje malunak nadmahilla z vybitymi na im datami žyćcia: 18.04.1996-18.04.2026. Horadabudaŭničy instytut «pamior» na svoj 30‑hadovy jubilej.
Historyja «Minskhrada» pačałasia ŭ krasaviku 1996 hoda, kali majsterniu hienieralnaha płana vyvieli sa składu mahutnaha «Minskprajekta» i pieratvaryli ŭ asobnaje pradpryjemstva. Pieršapačatkova kalektyŭ składaŭsia ŭsiaho z troch dziasiatkaŭ architektaraŭ, ale z časam instytut razrośsia da sotni supracoŭnikaŭ i niekalkich bujnych majsterniaŭ.
Śpiecyjalisty «Minskhrada» ŭpieršyniu ŭ historyi horada raspracavali vyraznyja rehłamienty dla hramadskich, žyłych i łandšaftnych terytoryj, zamianiŭšy imi raniejšyja supiarečlivyja narmatyvy savieckaha času.
Za try dziesiacihodździ instytut stvaryŭ hienieralnyja płany stalicy 2003, 2010, 2016 i 2025 hadoŭ, a taksama raspracavaŭ bolš za sotniu detalovych płanaŭ dla kankretnych rajonaŭ. Mienavita tut prajektavali rekanstrukcyju histaryčnaha centra Minska i zakładvali horadabudaŭničyja abhruntavańni dla najbujniejšych inviestycyjnych prajektaŭ, uklučajučy šmatfunkcyjanalny kompleks «Minsk-Śviet».
Važnaj častkaj pracy instytuta była dziejnaść łandšaftna-ekałahičnaha adździeła. Śpiecyjalisty «Minskhrada» raspracavali ŭnikalnuju dla krainy schiemu ekałahičnych kalidoraŭ Minska, sutnaść jakoj palahała ŭ rehulavańni vyšynnaści zabudovy takim čynam, kab nie pierakryvać naturalnyja patoki vietru i ratavać ščylna zabudavany miehapolis ad pierahrevu i chimičnaha smohu.
Akramia taho, horadabudaŭniki ŭpieršyniu stvaryli schiemy azielanionych terytoryj ahulnaha karystańnia dla ŭsich rajonaŭ stalicy, jurydyčna zamacavaŭšy miežy isnujučych i pierśpiektyŭnych parkaŭ, skvieraŭ i haradskich lasoŭ.
Jany ž raspracavali schiemu achoŭnych zon dla asabliva achoŭnych pryrodnych terytoryj i schiemu vodna-zialonaha dyjamietra, jakaja ŭličvała pryrodny patencyjał haradskich rek i vadaschoviščaŭ. Na kampjutarach instytuta stvaralisia składanyja madeli prahnozu chimičnaha i akustyčnaha zabrudžvańnia ad transpartu i pramysłovaści dla roznych žyłych rajonaŭ.
«Minskinžprajekt», jaki pry kancy 2024 hoda adznačyŭ svajo piacidziesiacihodździe, histaryčna zajmaŭsia prajektavańniem vyklučna ŭtylitarnaj infrastruktury. Jaho kalektyŭ z amal čatyrochsot čałaviek śpiecyjalizujecca na prajektavańni voda-, ciepła-, haza– i enierhazabieśpiačeńnia, kanalizacyi, daroh, mastoŭ i puciepravodaŭ.
Nakolki zachavajecca struktura horadabudaŭničaha pradpryjemstva ŭ składzie inšaha instytuta, pakul nieviadoma, jak i toje, ci budzie kamuści sprava da aeracyi staličnaj zabudovy i zialonych terytoryj, kali asnoŭnaja zadača ciapier staić budavać aŭtamabilnyja darohi i raźviazki.
«Naša Niva» — bastyjon biełaruščyny
«My dajom Štatam toje, što jany chočuć». Rasijski kanał apublikavaŭ videa, jakoje nazyvajuć zapisam Ryžankova schavanaj kamieraj u mašynie14
Kamientary
Kali čytaješ padobnaje rabicca vielmi sumna, u što pieratvaryli ŭčorašni horad Miensk.
Usiaho nie achopiš, ale paru prykładaŭ pryviadu.
Park "Civali", była zakinutaja terytoryja, redkija naviedniki i fizkulturniki jaje naviedvali, ale heta byŭ pryrodny, žyvy aazis.
Paśla budavańni HC "Skała" i MAKDONALDSA ŭłady abaviazali akulturyć prylehłuju terytoryju. Dy źjaviłasia pakładzienaja plitkaj darožka, dy dla achvotnych zajmacca fizkulturaj stvaryli ŭmovy, ale samaje hałoŭnaje, pastavili krytyja altanki i ŭstalavali stacyjanarnyja manhały, što pryviało va ŭsplosku niastrymnaj radaści ałkašni sa śvitanku da zachodu vyśpioŭvajučy rasijskija hopnickija šlahiery zapivajučy harełkaj.
Pobač praz darohu z hadavalnika "stvaryli" park "Kosmas" zabyŭšysia i nie ŭspomniŭšy z pryčyny svajoj niepismienasti, što heta miesca vytoku maleńkaj rečki Myšanka.
Inšaje jak apisana vyšej.
Voś tak krok za krokam, Miensk pieratvaryŭsia ŭ ahramiastečka.
Z čym usich i vinšuju!