Maładaja kijeŭskaja para, što zahinuła padčas rasijskaha avijaŭdaru, rychtavałasia da viasiella

U Kijevie raźvitalisia z Marynaj — talenavitaj nastaŭnicaj anhlijskaj movy, jakaja viedała kala dziesiaci moŭ (uklučajučy karejskuju, kitajskuju i vjetnamskuju) i vielmi lubiła žyvioł. Jana i jaje kachany, 30‑hadovy były chakieist i kapitan kijeŭskaha fłarbolnaha kłuba Juryj Arłoŭ, stali achviarami maštabnaha rasijskaha abstrełu ŭ čaćvier, 14 maja. 

Kryłataja rakieta całkam razburyła ich šmatpaviarchovik u Darnickim rajonie, zabraŭšy žyćci 24 čałaviek. Historyju maładoj pary, čyje mary pra šlub i dziaciej źniščyŭ rasijski ŭdar, raspaviało ahienctva The Associated Press.

Paśla pačatku paŭnamaštabnaha ŭvarvańnia čatyry hady tamu Maryna Hamianiuk źjechała ŭ Čechiju, dzie paśpiachova skončyła navučańnie i vyvučyła vjetnamskuju movu. Siabry raspaviadajuć, što dziaŭčyna mieła vyklučnyja zdolnaści i viedała kala 10 moŭ, uklučajučy kitajskuju i karejskuju. Akramia taho, jana była vielmi čułaj: ratavała biazdomnych žyvioł i lubiła padarožničać.

U 2023 hodzie Maryna vyrašyła viarnucca ŭ Ukrainu, dzie praz dadatak dla znajomstvaŭ sustreła Juryja Arłova.

Niahledziačy na roznyja zachapleńni — jon žyŭ sportam, jana mastactvam — para była nierazłučnaj. Dziaŭčyna naviedvała kožny jaho niadzielny matč, Juryj vučyŭ jaje hulać u fłarboł, a jana jaho — anhlijskaj movie.

Para maryła stvaryć siamju, adnak zima ŭ Kijevie była ciažkaj z-za pastajannych abstrełaŭ. Jany časta razvažali pra pierajezd z Darnickaha rajona, dzie paśla ŭdaraŭ pa enierhietycy śviatło adnaŭlali paźniej za ŭsio, ale nie mieli na heta finansavych mahčymaściej.

Pavialičyć

Padčas raźvitańnia siabry Maryny nie strymlivali emocyj. Jany spadziavalisia pachavać paru razam, adnak cieła Juryja na toj momant jašče nie było hatova da pachavańnia.

«Jana była vielmi kłapatlivym čałaviekam. Mnie vielmi horka, jana mieła stolki mar. Jana pracavała ź dziećmi i sama vielmi chacieła mieć dziaciej kali-niebudź, kali nastupiać bolš biaśpiečnyja časy, — kaža Alesia Juchnovič, blizkaja siabroŭka. — Ja pavinna była dapamahać rychtavacca da viasiella, a ŭ vyniku dapamahała rychtavacca da pachavańnia. Heta žachliva».

Alesia taksama zhadała chviliny paśla trahiedyi 14 maja, kali napisała Marynie, jašče nie viedajučy pra strašnaje. 

«Ty nikoli nie dumaješ, što niešta moža zdarycca z kimści blizkim, i prosta pišaš im dla pieraściarohi. Ja nikoli b nie padumała, što heta budzie adzin z tych razoŭ, kali paviedamleńnie tak i zastaniecca niepračytanym», — kaža jana. 

Toj masiravany ŭdar vajskoŭcy nazvali adnym z najbujniejšych abstrełaŭ Kijeva za ŭvieś čas vajny.

Ranicaj 17 maja kamandujučy Siłami BPŁA Ukrainy Robiert «Madziar» Broŭdzi nazvaŭ ataku ŭkrainskich dronaŭ na Maskvu i vobłaść adkazam na hibiel mirnych ludziej u Kijevie i zajaviŭ, što «abaniemient na spakojnaje žyćcio dla rasijskaj stalicy anulavany».

• 0
• 0
• 0
• 0
• 0
• 17
• 4
• 0