Kitaj spakvala pašyraje svaju marskuju jurysdykcyju na ŭschod ad Tajvania

Upieršyniu cyvilnyja sudny Kitajskaha ŭpraŭleńnia marskoj biaśpieki prajšli praz stratehičny praliŭ Bašy i pačali daśledavańnie i kartahrafavańnie marskoha dna na ŭschod ad Tajvania. Pavodle acenak mižnarodnych analitykaŭ, Piekin vykarystoŭvaje taktyku tak zvanaj «narezki salami», kali kantrol nad terytoryjami pašyrajecca nievialikimi krokami, jakija nie pryvodziać da adkrytaha vajennaha kanfliktu.

Hetyja dziejańni adbylisia nieŭzabavie paśla vizitu prezidenta ZŠA Donalda Trampa ŭ Piekin, padčas jakoha staršynia KNR Si Czińpin znoŭ padkreśliŭ, što tajvańskaje pytańnie zastajecca hałoŭnaj prablemaj u adnosinach pamiž dźviuma krainami.

Dyrektar prajekta SeaLight Stenfardskaha ŭniviersiteta Rej Paŭeł ličyć, što vychad kitajskich sudnaŭ za miežy tak zvanaha Pieršaha astraŭnoha łancuha staŭ važnym etapam u pašyreńni ŭpłyvu Kitaja. Na jaho dumku, Piekin imkniecca stvaryć novyja fakty na miescy i pradstavić vody na ŭschod ad Tajvania jak zonu svajoj jurysdykcyi.

Prezident Tajvania Łaj Cynde zajaviŭ, što sapraŭdnaj metaj hetych dziejańniaŭ źjaŭlajecca terytaryjalnaja ekspansija i sproba stvaryć uražańnie, što Kitaj vałodaje suvierennymi pravami nad vostravam.

Były kiraŭnik Abjadnanaha raźviedvalnaha centra Cichaakijanskaha kamandavańnia ZŠA Karł Šuster adznačyŭ, što vykarystańnie cyvilnych sudnaŭ zamiest vajskovych dazvalaje Piekinu pastupova zamacoŭvać svaju prysutnaść biez pramoha prymianieńnia siły.

Akramia palityčnaha značeńnia, daśledavańnie marskoha dna maje i vajskovaje pryznačeńnie. Atrymanaja infarmacyja moža palepšyć mahčymaści kitajskich padvodnych łodak pry dziejańniach u hetym rehijonie i dapamahčy vyjaŭlać padvodnyja kabieli suviazi.

Ekśpierty taksama nie vyklučajuć, što nastupnym krokam moža stać spynieńnie abo pravierka cyvilnych sudnaŭ, jakija nakiroŭvajucca na Tajvań. Asablivuju niebiaśpieku heta stvaraje dla pastavak zvadkavanaha pryrodnaha hazu, pakolki vostraŭ mocna zaležyć ad impartu enierharesursaŭ.

Dziejańni Kitaja ŭžo vyklikali krytyku z boku ZŠA i jeŭrapiejskich krain. Dziaržaŭny departamient ZŠA nazvaŭ ich destabilizacyjnymi, a Vialikabrytanija, Francyja i Hiermanija vystupili z sumiesnaj zajavaj, u jakoj vykazali zaniepakojenaść mahčymymi pahrozami svabodzie mižnarodnaha sudnachodstva.

Paralelna Piekin uzmacniaje svaju prysutnaść i ŭ Paŭdniova-Kitajskim mory, u tym liku kala ryfa Skarbara, jaki znachodzicca ŭ vyklučnaj ekanamičnaj zonie Filipin. Źjaŭleńnie tam kitajskich daśledčych płatformaŭ vyklikała pratest Maniły. Ministr abarony Filipin Hiłbiert Teadora zajaviŭ, što nie daviaraje śćviardžeńniam Piekina ab vyklučna navukovym charaktary misii, nahadaŭšy, što raniej Kitaj užo pieratvaraŭ padobnyja ryfy ŭ vajskovyja bazy.

Na fonie rostu napružanaści pasolstva ZŠA ŭ Manile paviedamiła pra pieradaču Filipinam čatyroch marskich bieśpiłotnych aparataŭ ahulnym koštam 13 miljonaŭ dalaraŭ. Jany pryznačanyja dla nazirańnia i achovy terytaryjalnych vod krainy.

• 0
• 0
• 0
• 0
• 0
• 0
• 0
• 0