Ci heta dakładna možna jeści? 10 biełaruskich praduktaŭ, jakija vas ździviać
Biełaruskija vytvorcy davoli časta vypuskajuć navinki i ekśpierymientujuć z roznymi smakami. Časam spałučeńni atrymlivajucca vielmi niezvyčajnymi i bolš padobnymi na ježu, zhienieravanuju ChatGPT. Onliner sabraŭ 10 praduktaŭ, jakija možna nasamreč sustreć na palicach kram.
Syr z kavaju
Nie, heta nie sproba paśniedać śpiecham, a całkam realny pradukt, jaki vypuskajuć u Kareličach pad markaj «Navahrudskija dary». Kruhłaja hałoŭka syru nie vielmi vialikaja — ad 600 hramaŭ da kiłahrama, zvonku pasypanaja mołataj kavaj. Kavavy pach, darečy, prabivajecca praź indyvidualnuju ŭpakoŭku łustačak na pryłaŭku. Tłustaść całkam standartnaja dla syru — 50%.
Samiehreła, darečy, nie hatunak syru, a rehijon Hruzii. Jaho jašče nazyvajuć Miehrelijaj, adtul pachodzić syr sułuhuni. Jak raspaviali na pradpryjemstvie, pałavinki adroźnivajucca pa kolery, bo ŭ adnu ź ich dadadzieny charčovy farbavalnik — usio dziela estetyki, pa smaku jany adnolkavyja.
Cana — kala 34 rubloŭ za kiłahram.
Dla «Navahrudskich daroŭ» heta nie adziny kreatyŭny syr u partfieli. Takija čyrvonyja i zialonyja bruski ź piesta — heta taksama «ziemlaki» kavavaha syru. Jašče na sajcie vytvorcy jość «Sielehin» u krapinku ŭ dvuch varyjantach: z maślinami abo aliŭkami. Praŭda, u niekalkich minskich kramach žurnalisty ich nie znajšli.
Kaŭbasa z vuhalem
Varyjant dla tych, chto choča pryciahnuć pavyšanuju ŭvahu haściej da miasnoj talerki. Łustački vyhladajuć marmurovymi, jašče bolš pikantnaści vyhladu kaŭbasy dadaje toj fakt, što ciomnyja linii ŭzoru — heta vuhal. Nazyvajecca kaŭbasa Rotolo Di Lusso, vypuskajuć jaje ŭ Maładziečnie, na pradpryjemstvie «Vieles-Mit». Zavod, darečy, viadomy jašče i tym, što tut robiać katlety dla hamburhieraŭ Mak.by.
Marmurovaja kaŭbasa zroblena sa śvininy, jana varana-vendžanaja, u składzie sapraŭdy jość vuhal: chavajecca pad paznačeńniem Je153 — tak na movie dabavak nazyvajuć naturalny charčovy farbavalnik čornaha koleru, jaki robiać z draŭniny.
Košt — kala 28 rubloŭ za kiłahram.
Ružovy majanez
Hety pradukt jarka vyłučajecca na palicy z zapraŭkami: dazvoliŭ sabie być ružovym i adrazu mimikryravaŭ pa kolery pad miłyja biełaruskamu sercu sieladcy pad šubaj, chaładnik i boršč sa śmiatanaj.
Majanez u styli «Barbi» prydumali na Minskim marharynavym zavodzie, u prodaž jon pastupiŭ u kancy studzienia hetaha hoda. Va ŭpakoŭcy 300 hramaŭ praduktu tłustaściu 50%. Vytvorca zajaŭlaje, što abyšoŭsia biez štučnych aramatyzataraŭ i farbavalnikaŭ, a ružovy koler majanezu nadaŭ z dapamohaj buračnaha soku.
Kaštuje banka takoha majanezu kala 3,4—4,5 rubla.
Syrnyja šaryki
Suchi syr, jaki pa struktury nahadvaje porysty šakaład, vypuskajuć u Pastavach. Heta liniejka snekaŭ u vyhladzie šarykaŭ, usie smaki — niesałodkija: «Krevietka na hryli», «Taj-čyli», «Z vendžanaj paprykaj», «Z cybulaj», «Z vodaram vendžańnia». Jość jašče «Kłasičny» i «Z časnokam». Vytvorca zajaŭlaje, što robić šaryki biez dadatkovych tłuščaŭ mietadam vysušvańnia syru. U kožnym pakiecie — 75 hramaŭ praduktu tłustaściu 43%.
Cana — kala 5 rubloŭ.
Čypsy z syru
Jašče adzin kreatyŭ ad «Navahrudskich daroŭ» — čypsy z syru. Va ŭpakoŭcy 50 hramaŭ praduktu, jaki patrabuje zachoŭvańnia ŭ chaładzilniku. U kramach hetyja čypsy chavajucca ŭ adździele z syrami, u prodažy ŭ Minsku čaściej sustrakajecca kłasičny smak, choć na sajcie vytvorcy zajaŭleny jašče adzin: ź biełymi hrybami. U pieraliku na kiłahram ceńnik kusajecca: amal 160 rubloŭ.
Košt — prykładna 8 rubloŭ za pačak.
Marožanaje-dranik
Spałučeńnie smažanaj bulby i vanilnaha marožanaha niazvykłaje, ale ŭ jaho jość svaje fanaty. Na Minskim chładakambinacie №2 viasnoj vypuścili svaju viersiju takoha łasunku. Z vyhladu zvyčajny płambir u vafielnym ražku, ale sam ražok natchniony dranikam. Jaho piakuć z muki, cybulnaha parašku, suchoha bulbianoha piure i makaronnych krupaŭ.
Na pryłaŭkach takoje marožanaje ŭ «draniku» zaŭvažana z sakavika, va ŭpakoŭcy 75 hramaŭ praduktu.
Cana — 2—2,5 rubla.
Draniki ŭ parašku
Biełaruski vytvorca čypsaŭ «Mašpiščeprad» zrabiŭ chod kaniom i zaniaŭ nišu dranikaŭ z parašku.
U liniejcy jość čatyry smaki: kłasičny, z kropam, ź piercam, z morkvaj i časnakom. Adzin pačak suchoj sumiesi raźličany na dźvie porcyi pa 100 hramaŭ, a pryhatavać draniki možna za 15 chvilin, davodzić vytvorca.
Upakoŭka kaštuje kala 4 rubloŭ.
Chałva sa smakam skvarak i cybuli
Paekśpierymientavać z kłasičnym smakam chałvy ŭziaŭsia babrujski «Čyrvony charčavik». U vytvorcy chapaje davoli niezvyčajnych varyjantaŭ — naprykład, z sollu, piercam abo miataj.
Ale smak skvarak i karamielizavanaj cybuli vyłučajecca ŭ hetym šerahu. Efiekt śniadanku ŭ vioscy stvarajuć aramatyzatary «Karamielizavanaja sałodkaja cybula» i «Skvarki», u jakich jość cybula i časnok u parašku. U adnym pačku — 60 hramaŭ praduktu.
Cana — kala 1,5 rubla za pačak.
Miatnaja zhuščonka
Heta limitavanaja sieryja Hłybockaha małočnakansiervavaha zavoda. Za miatny smak adkazvaje aramatyzatar, za aŭtentyčny koler — farbavalnik chłarafił u składzie. U blašancy 380 hramaŭ praduktu.
Cana pytańnia — kala 4,5 rubla.
Cukar na pałačcy
Pieraasensavaŭ padychod da čajavańnia Haradziejski cukrovy kambinat: u jaho asartymiencie jość cukar, jaki davoli niezvyčajna vyhladaje i zdolny ździvić haściej.
Jon ledziancovy, u vyhladzie kryštaloŭ na draŭlanaj pałačcy, va ŭpakoŭcy amal 50 hramaŭ praduktu. Vytvorca kaža, što taki cukar padydzie dla lubych vidaŭ napojaŭ — ad harbaty i kavy da kaktejlaŭ i hlintviejnaŭ.
Ciapier čytajuć
«My dajom Štatam toje, što jany chočuć». Rasijski kanał apublikavaŭ videa, jakoje nazyvajuć zapisam Ryžankova schavanaj kamieraj u mašynie14
Kamientary
jak tolki źjaviłasia na NN, daloka nie hrebvała Słoŭnikami, kab bolš-mienš hramatna pisać.. dyk voś dla mianie taksama było ŭ svoj čas maleniečkim adkryćciom), što pišacca mienavita "skvarka"