Ці гэта дакладна можна есці? 10 беларускіх прадуктаў, якія вас здзівяць
Беларускія вытворцы даволі часта выпускаюць навінкі і эксперыментуюць з рознымі смакамі. Часам спалучэнні атрымліваюцца вельмі незвычайнымі і больш падобнымі на ежу, згенераваную ChatGPT. Onliner сабраў 10 прадуктаў, якія можна насамрэч сустрэць на паліцах крам.
Сыр з каваю
Не, гэта не спроба паснедаць спехам, а цалкам рэальны прадукт, які выпускаюць у Карэлічах пад маркай «Навагрудскія дары». Круглая галоўка сыру не вельмі вялікая — ад 600 грамаў да кілаграма, звонку пасыпаная молатай кавай. Кававы пах, дарэчы, прабіваецца праз індывідуальную ўпакоўку лустачак на прылаўку. Тлустасць цалкам стандартная для сыру — 50%.
Самегрэла, дарэчы, не гатунак сыру, а рэгіён Грузіі. Яго яшчэ называюць Мегрэліяй, адтуль паходзіць сыр сулугуні. Як распавялі на прадпрыемстве, палавінкі адрозніваюцца па колеры, бо ў адну з іх дададзены харчовы фарбавальнік — усё дзеля эстэтыкі, па смаку яны аднолькавыя.
Цана — каля 34 рублёў за кілаграм.
Для «Навагрудскіх дароў» гэта не адзіны крэатыўны сыр у партфелі. Такія чырвоныя і зялёныя брускі з песта — гэта таксама «землякі» кававага сыру. Яшчэ на сайце вытворцы ёсць «Селегін» у крапінку ў двух варыянтах: з маслінамі або аліўкамі. Праўда, у некалькіх мінскіх крамах журналісты іх не знайшлі.
Каўбаса з вугалем
Варыянт для тых, хто хоча прыцягнуць павышаную ўвагу гасцей да мясной талеркі. Лустачкі выглядаюць мармуровымі, яшчэ больш пікантнасці выгляду каўбасы дадае той факт, што цёмныя лініі ўзору — гэта вугаль. Называецца каўбаса Rotolo Di Lusso, выпускаюць яе ў Маладзечне, на прадпрыемстве «Велес-Міт». Завод, дарэчы, вядомы яшчэ і тым, што тут робяць катлеты для гамбургераў Mak.by.
Мармуровая каўбаса зроблена са свініны, яна варана-вэнджаная, у складзе сапраўды ёсць вугаль: хаваецца пад пазначэннем Е153 — так на мове дабавак называюць натуральны харчовы фарбавальнік чорнага колеру, які робяць з драўніны.
Кошт — каля 28 рублёў за кілаграм.
Ружовы маянэз
Гэты прадукт ярка вылучаецца на паліцы з запраўкамі: дазволіў сабе быць ружовым і адразу мімікрыраваў па колеры пад мілыя беларускаму сэрцу селядцы пад шубай, халаднік і боршч са смятанай.
Маянэз у стылі «Барбі» прыдумалі на Мінскім маргарынавым заводзе, у продаж ён паступіў у канцы студзеня гэтага года. Ва ўпакоўцы 300 грамаў прадукту тлустасцю 50%. Вытворца заяўляе, што абышоўся без штучных араматызатараў і фарбавальнікаў, а ружовы колер маянэзу надаў з дапамогай бурачнага соку.
Каштуе банка такога маянэзу каля 3,4—4,5 рубля.
Сырныя шарыкі
Сухі сыр, які па структуры нагадвае порысты шакалад, выпускаюць у Паставах. Гэта лінейка снэкаў у выглядзе шарыкаў, усе смакі — несалодкія: «Крэветка на грылі», «Тай-чылі», «З вэнджанай папрыкай», «З цыбуляй», «З водарам вэнджання». Ёсць яшчэ «Класічны» і «З часнокам». Вытворца заяўляе, што робіць шарыкі без дадатковых тлушчаў метадам высушвання сыру. У кожным пакеце — 75 грамаў прадукту тлустасцю 43%.
Цана — каля 5 рублёў.
Чыпсы з сыру
Яшчэ адзін крэатыў ад «Навагрудскіх дароў» — чыпсы з сыру. Ва ўпакоўцы 50 грамаў прадукту, які патрабуе захоўвання ў халадзільніку. У крамах гэтыя чыпсы хаваюцца ў аддзеле з сырамі, у продажы ў Мінску часцей сустракаецца класічны смак, хоць на сайце вытворцы заяўлены яшчэ адзін: з белымі грыбамі. У пераліку на кілаграм цэннік кусаецца: амаль 160 рублёў.
Кошт — прыкладна 8 рублёў за пачак.
Марожанае-дранік
Спалучэнне смажанай бульбы і ванільнага марожанага нязвыклае, але ў яго ёсць свае фанаты. На Мінскім хладакамбінаце №2 вясной выпусцілі сваю версію такога ласунку. З выгляду звычайны пламбір у вафельным ражку, але сам ражок натхнёны дранікам. Яго пякуць з мукі, цыбульнага парашку, сухога бульбянога пюрэ і макаронных крупаў.
На прылаўках такое марожанае ў «драніку» заўважана з сакавіка, ва ўпакоўцы 75 грамаў прадукту.
Цана — 2—2,5 рубля.
Дранікі ў парашку
Беларускі вытворца чыпсаў «Машпішчэпрад» зрабіў ход канём і заняў нішу дранікаў з парашку.
У лінейцы ёсць чатыры смакі: класічны, з кропам, з перцам, з морквай і часнаком. Адзін пачак сухой сумесі разлічаны на дзве порцыі па 100 грамаў, а прыгатаваць дранікі можна за 15 хвілін, даводзіць вытворца.
Упакоўка каштуе каля 4 рублёў.
Халва са смакам скварак і цыбулі
Паэксперыментаваць з класічным смакам халвы ўзяўся бабруйскі «Чырвоны харчавік». У вытворцы хапае даволі незвычайных варыянтаў — напрыклад, з соллю, перцам або мятай.
Але смак скварак і карамелізаванай цыбулі вылучаецца ў гэтым шэрагу. Эфект сняданку ў вёсцы ствараюць араматызатары «Карамелізаваная салодкая цыбуля» і «Скваркі», у якіх ёсць цыбуля і часнок у парашку. У адным пачку — 60 грамаў прадукту.
Цана — каля 1,5 рубля за пачак.
Мятная згушчонка
Гэта лімітаваная серыя Глыбоцкага малочнакансервавага завода. За мятны смак адказвае араматызатар, за аўтэнтычны колер — фарбавальнік хларафіл у складзе. У бляшанцы 380 грамаў прадукту.
Цана пытання — каля 4,5 рубля.
Цукар на палачцы
Пераасэнсаваў падыход да чаявання Гарадзейскі цукровы камбінат: у яго асартыменце ёсць цукар, які даволі незвычайна выглядае і здольны здзівіць гасцей.
Ён ледзянцовы, у выглядзе крышталёў на драўлянай палачцы, ва ўпакоўцы амаль 50 грамаў прадукту. Вытворца кажа, што такі цукар падыдзе для любых відаў напояў — ад гарбаты і кавы да кактэйляў і глінтвейнаў.
-
Вальфовіч назваў выбух дрона каля аўтобуса выпадковым, але позна. Прапаганда паспела знайсці вінаватых і абліць увесь свет дзярмом
-
«Я была ў шоку ад радасці і шчасця». Беларуска 15 гадоў шукала італьянскую сям’ю, у якой жыла дзіцём пасля Чарнобыля
-
У Белавежскай пушчы будуць рабіць канцэртную пляцоўку
Цяпер чытаюць
Сакратар Рады бяспекі заклікаў беларусаў устрымацца ад паездак у Расію8
Каментары
як толькі з'явілася на НН, далёка не грэбвала Слоўнікамі, каб больш-менш граматна пісаць.. дык вось для мяне таксама было ў свой час маленечкім адкрыццём), што пішацца менавіта "скварка"