Pačaŭsia novy navučalny hod

Siońnia — pieršy dzień novaha navučalnaha hoda. Za školnyja party ŭ Biełarusi siaduć 950 tysiač vučniaŭ, u tym liku prykładna 86,3 tysiačy pieršakłaśnikaŭ.

Pieršy ŭrok novaha navučalnaha hoda pryśviečany temie «Biełaruś — kraina majoj budučyni». Pieršakłaśnikam buduć uručany knihi «Biełaruś — naša Radzima. Padarunak Prezidenta Respubliki Biełaruś pieršakłaśniku».

Kolkaść školnikaŭ sioleta źmienšyłasia na 33,4 tysiačy, pieršakłaśnikaŭ — praktyčna nie źmianiłasia.

U krainie naličvajecca 3.531 navučalnaja ŭstanova, u tym liku 214 himnazij, 29 licejaŭ, try kadeckija vučyliščy i šeść navučalna-piedahahičnych kompleksaŭ siaredniaja škoła (himnazija) — kaledž mastactvaŭ. U paraŭnańni ź minułym hodam kolkaść ahulnaadukacyjnych ustanoŭ skaraciłasia na 59. Razam z tym adkrylisia šeść novych siarednich škoł.

43% navučalnych ustanoŭ Biełarusi majuć ruskuju movu navučańnia, 52% — biełaruskuju, u astatnich — dvuchmoŭje. Pry hetym usie pradmiety na biełaruskaj movie vyvučajuć 18% vučniaŭ, na ruskaj — 77%, astatnija vučacca na dźviuch movach.

U novym navučalnym hodzie ŭ škołach uvodzicca dadatkovaja hadzina dla vyvučeńnia zamiežnaj movy. U ahulnaadukacyjnaj škole na jaje vyvučeńnie budzie advodzicca try hadziny ŭ tydzień, u himnazii — piać.

Jak zajaviŭ ministr adukacyi Alaksandr Radźkoŭ 20 žniŭnia na forumie piedahahičnych rabotnikaŭ ustanoŭ adukacyi ŭ Minsku, «patrebnaści ŭ vyvučeńni zamiežnych moŭ — heta patrebnaści ekanomiki». «My nacelenyja na ekspart, a dla taho, kab tavar pradać, treba jaho dobra zrabić, pryhoža ŭpakavać i damovicca ab prodažy, — dla hetaha patrebnyja movy», — patłumačyŭ ministr.

Ministr taksama padkreśliŭ važnaść raźvićcia fizkultury. «My zaŭvažyli, što dzieci iduć zaraz bolš da kampjutera i nie iduć na stadyjon», — skazaŭ jon. Kab źmianić situacyju, va ŭstanovach adukacyi buduć «nastojliva patrabavać» vykanańnia fizičnych narmatyvaŭ, paviedamiŭ Radźkoŭ.

Aprača taho, budzie praciahvacca praca nad ukaranieńniem u śfieru adukacyi sučasnych technałohij, zaznačyŭ Radźkoŭ.

Z 1 vieraśnia taksama ŭstupiŭ u dziejańnie zakon ab novych praviłach biełaruskaj arfahrafii i punktuacyi. U Minadukacyi śćviardžajuć, što sistema adukacyi da hetaha poŭnaściu hatovaja — jość adpaviednyja dapamožniki, słoŭniki, padručniki, nastaŭniki prajšli pierapadrychtoŭku. Kab źmiakčyć pierachod na novyja praviły, vykładčyki biełaruskaj movy na praciahu dvuch hadoŭ buduć vypraŭlać pamyłki, źviazanyja z novymi praviłami, ale nie buduć ich uličvać pry vystaŭleńni acenak. A na centralizavanym testavańni nie budzie pytańniaŭ, jakija b tyčylisia źmianieńniaŭ u arfahrafii i punktuacyi.

U novym navučalnym hodzie ŭ škołach, chutčej za ŭsio, zojmucca vyvučeńniem pravasłaŭnaj kultury.

Uviadzieńnie takich kursaŭ praduhledžana Prahramaj supracoŭnictva Ministerstva adukacyi i Biełaruskaj pravasłaŭnaj carkvy na 2011–2015 hady.

• 0
• 0
• 0
• 0
• 0
• 0
• 0
• 0