Ronald Pofała jedzie ŭ Minsk śledam za Hida Vestervele

Siońnia ŭ Minskim mižnarodnym adukacyjnym centry adkryvajecca biełaruska-niamieckaja sustreča «Minski forum» na temu «Biełaruś i Jeŭraźviaz paśla kryzisu: vykliki i šancy ŭ śfierach palityki, ekanomiki i hramadstva». Z hetaj nahody ŭ Minsk pryjaždžaje kiraŭnik viedamstva fiederalnaha kanclera Niamieččyny, fiederalny ministr pa asablivych daručeńniach Ronald Pofała.

Paśla ministraŭ zamiežnych spravaŭ Polščy i Niamieččyny Radasłava Sikorskaha i Hida Vestervele ŭ Miensk prybyvaje adzin z samych hałoŭnych ministraŭ niamieckaha ŭradu Ronald Pofała. Jon maje namier sustrecca z pradstaŭnikami apazicyi, hramadzianskaj supolnaści i patencyjnymi kandydatami ŭ prezidenty. Kancler Niamieččyny Anhieła Mierkiel uchvaliła hety vizit spadara Pofały i ŭdzieł u «Mienskim forumie».

Daradca-pasłańnik ambasady Niamieččyny Pieter Detmar adznačyŭ:

«My spadziajemsia, što vizyty abodvuch ministraŭ paspryjajuć nie tolki novamu prahresu ŭ dačynieńniach pamiž Niamieččynaj i Biełaruśsiu, ale i ŭ stasunkach Biełarusi ź Jeŭraźviazam. My, pradstaŭniki ambasady, z nadziejaj nazirajem za situacyjaj i čakajem, što pieramovy i prysutnaść abodvuch ministraŭ pryviaduć da stanoŭčych vynikaŭ dla abodvuch bakoŭ».

Staršynia «Minskaha forumu» doktar Rajner Lindner adznačyŭ, što «Minski forum», jaki pravodzicca ŭžo 13-y raz, heta sioleta dobraja mahčymaść napiaredadni prezidenckich vybaraŭ «abmierkavać napružanyja pytańni palityčnaha, ekanamičnaha i hramadskaha charaktaru». U tym liku dačynieńni Biełarusi ź Jeŭraźviazam i Rasijaj. Pavodle spadara Lindnera, supracoŭnictva abjadnanaj Jeŭropy ź Biełaruśsiu budzie zaležać ad praviadzieńnia svabodnych i demakratyčnych vybaraŭ:

«Taksama abmiarkoŭvajecca pytańnie vizavaha režymu i čakajecca jaho spraščeńnie, pierahlad hetaha režymu. I prośba da Bruselu nia ŭviazvać vyniki vybaraŭ i pytańnie vizaŭ. Bo spraščeńnie vizavaha režymu — heta dla nasielnictva Biełarusi, dla luboha čałavieka ŭ hetaj krainie. Bo ŭ tym, jak pravodziacca vybary, nie vinavatyja vybarcy».

Adnoj z padziejaŭ «Minskaha forumu» stanie prezientacyja biełaruska-niamieckaha słoŭnika na 70 tysiač słovaŭ i vyrazaŭ, jaki vyjšaŭ nakładam tysiača asobnikaŭ. Spadar Lindner skazaŭ, što pasprabuje atrymać paćvierdžańnie Ministerstva adukacyi Biełarusi, što słoŭnikam buduć karystacca ŭ navučalnych ustanovach. Adzin ź jaho aŭtaraŭ Lavon Barščeŭski paviedamiŭ, što praca nad słoŭnikam pačałasia ŭ 1992 hodzie i ŭ apošni čas jon byŭ dapoŭnieny sučasnaj ekanamičnaj leksikaj. Słoŭnik nadrukavany z dapamohaj niamieckaha boku: «Heta bazavy słoŭnik. Kožnaje nastupnaje pieravydańnie možna dapracoŭvać, papraŭlać. Ale ŭžo jość baza, słoŭnik biełaruska-niamiecki, jaki budzie šmat hadoŭ vykarystoŭvacca i słužyć. Na žal, biełaruskaja dziaržava hetymi rečami nie cikavicca. I nijakaha ŭkładu jana nie rabiła».

Na vokładcy słoŭnika dva ściahi: niamiecki i nacyjanalny biełaruski — bieł-čyrvona-bieły.

• 0
• 0
• 0
• 0
• 0
• 0
• 0
• 0