Karbalevič: Adnosiny Biełarusi z Zachadam pierachodziać u stadyju chałodnaj zimy

U 2011 hodzie adnosiny Biełarusi z Rasijaj, Jeŭrasajuzam i ZŠA buduć raźvivacca kanfliktna. Takuju dumku vykazaŭ u intervju BiełaPAN palitołah Valeryj Karbalevič.

«Z Rasijaj u Biełarusi adnosiny kanfliktnyja zaŭsiody pa aznačeńni z-za samoj madeli hetych adnosinaŭ. U madeli samoj Sajuznaj dziaržavy zakładzieny kanflikt, — skazaŭ ekśpiert. — Budzie toje, što my nazirajem apošnija hady, — uspyški svarak i prymireńni, znoŭ uspyški i znoŭ prymireńni».

U toj ža čas, miarkuje Karbalevič, płanaŭ pa źmienie ŭłady ŭ Biełarusi ŭ Rasii niama. «Zusim nie fakt, što na źmienu Łukašenku pryjdzie palityk, jaki budzie nastrojeny bolš prarasijska. A Rasija maje ŭžo bahaty vopyt u adnosinach ź inšymi dziaržavami, kali Rasii nie padabaŭsia niejki palityk i jana navat sadziejničała jaho źmienie, a novy palityk jašče bolš dystancyravaŭsia ad Rasii», — skazaŭ Karbalevič. U jakaści prykładu jon pryvioŭ Hruziju i Małdovu i padkreśliŭ, što, «apiokšysia na hetych prykładach,

Rasija budzie vielmi aściarožna dumać, ci varta mianiać Łukašenku».

Pry hetym, na dumku Karbaleviča, «navat kali b Rasija pryniała rašeńnie pa źmienie Łukašenki, u jaje niama ryčahoŭ i miechanizmaŭ dla źmieny ŭłady ŭ Biełarusi». «Rasija viedaje, jak, naprykład, sadziejničać prychodu da ŭłady patrebnych palitykaŭ u inšych krainach — dać hrošaj, dapamahčy z palittechnałohijami. Ale ŭ Biełarusi niama vybaraŭ, tamu takaja taktyka sensu nie maje. A inšych sposabaŭ źmieny ŭłady Rasija nie viedaje», — skazaŭ ekśpiert.

Jon ličyć, što Rasija praciahnie «cisk na samoha Łukašenku z tym, kab zrabić jaho bolš padatlivym».

Što da adnosinaŭ z Zachadam, to, na dumku Karbaleviča,

tut naśpiavaje surjozny kanflikt.

U toj ža čas jon ustrymaŭsia ad prahnazavańnia taho, jakija mienavita sankcyi moža ŭvieści ES u dačynieńni da Biełarusi. «Jašče tolki novaja palityka vypracoŭvajecca, tamu ja b nie staŭ pakul hadać.

Ale toje, što budzie ŭzmacnieńnie žorstkaści palityki ŭ dačynieńni da biełaruskaha kiraŭnictva, heta niesumnienna», — upeŭnieny ekśpiert.

Karbalevič taksama ličyć, što zatrymanyja 19 śniežnia eks-kandydaty ŭ prezidenty i ich prychilniki buduć vykarystoŭvacca biełaruskimi ŭładami dla torhu z Zachadam. «Łukašenka pasprabuje vytarhavać za ich vyzvaleńnie ekanamičnyja i palityčnyja dyvidendy ŭ Jeŭropy. Na pres-kanfierencyi Łukašenka zajaviŭ, što paśla taho, jak buduć pradjaŭleny abvinavačańni, niekatoryja mohuć być vyzvaleny da suda. Tak možna było zrazumieć ź jaho zajaŭ. Heta ŭ peŭnaj miery pačatak torhu z Zachadam», — skazaŭ Karbalevič.

• 0
• 0
• 0
• 0
• 0
• 0
• 0
• 0