Džoli i Dep pieramahli biełaruskuju mafiju

U prakat vyjšaŭ tryler «Turyst», dzie hałoŭnyja hieroi, čyje roli vykonvajuć Anžalina Džoli i Džoni Dep, traplajuć u kałatniečy z mafijozi, atočanym «biełaruskamoŭnymi» najmitami.

Heta rymiejk francuzskaha trylera 2005 hoda z Safi Marso «Niaŭłoŭny». U stužcy havorka idzie pra amierykanskaha turysta (Dep), što sustrakaje ŭ ciahniku zahadkavuju pryhažuniu (Džoli), jakaja ŭciahvaje jaho ŭ vialikija niepryjemnaści sa špijonskimi zmovami, śpiecsłužbami, pahoniami i pierastrełkami. Ekšnu nadaje kałaryt asiarodździe hałoŭnaha złydnia — anhlijskajha mafijozi-miljardera Redžynalda Šo.

Sprava ŭ tym, što najmity-zabojcy, jakija na jaho pracujuć, na praciahu ŭsiaho filma havorać na biełaruskaj movie: «Zrazumieŭ», «Pajšoŭ ty»…

Ubačyć usio heta na ŭłasnyja vočy, a taksama pačuć biełaruskuju movu ŭ halivudskim trylery luby achvotny moža ŭ bolšaści minskich kinateatraŭ. Uvaha! U pirackich zapisach biełaruskaha maŭleńnia vy nie pačujecie.

«Šerłak»

Sieryjał BBC, druhoha siezona jakoha ź nieciarplivaściu čakajuć fanaty z usiaho śvietu, taksama vyznačyŭsia nieadnaznačnaj zhadkaj pra Biełaruś. Dla pačatku adznačym, što heta historyja, jakaja apisvaje pracoŭnyja budni sučasnych Šerłaka Chołmsa i doktara Vatsana ŭ nie mienš sučasnym Łondanie. Ich rasśledavańni źviazanyja z tajamničymi hrafici, trupami inviestbankiraŭ, SMS ź dziŭnymi podpisami, Maryjarci ŭ Skype…

U pieršym siezonie ŭsiaho try sieryi. Apošniaja pačynajecca z tytraŭ: «Minsk, Belarus».

Šerłak za spravu nie ŭziaŭsia i viarnuŭsia ŭ Łondan, razzłavany, što na jaho darozie nie źjaŭlajecca jarkich złačynstvaŭ.

— A jak ža sprava ŭ Rasii? — cikavicca doktar Vatsan.

— U Biełarusi, — udakładniaje Chołms. — Zvyčajnaje bytavoje zabojstva. Nie vartaje majoj uvahi.

Adznačym, što mnohija krytyki ŭžo nazvali «Šerłaka» najlepšym sieryjałam 2010 hoda.

«Špijonka»

Amierykanski telesieryjał z Dženifier Harnier u roli Sidni Brystau, dvajnoha ahienta SD-6 i CRU, jakaja źjaŭlajecca na zadańniach u roznych častkach śvietu, kožny raz u novym malaŭničym vobrazie. Hałoŭnaja siužetnaja linija — pošuk i adnaŭleńnie artefaktaŭ, stvoranych Majła Džakama Rambaldzi (1444–1496).

U piatym siezonie Sidni i jaje muž Von zajmajucca rasśledavańniem, źviazanym z sakretnaj arhanizacyjaj, viadomaj pad nazvaj Prarok Piać. U hetuju tajemnuju supolnaść uvachodziać vysokapastaŭlenyja asoby z usiaho śvietu, jakija dziela dasiahnieńnia ŭłasnaj mety — nieŭmiručaści — iduć na zabojstvy, vykradańni, terakty.

U adnoj ź sieryj hledačy ŭpieršyniu bačać usich udzielnikaŭ Praroka Piać. Heta adbyvajecca, kali tyja źbirajucca na tajemnaj sustrečy ŭ adnym z pasolstvaŭ, raźmieščanych u stalicy Biełarusi. Malunačak supravadžajuć tytry: «Minsk».

«Terminał»

Nu i narešcie «Terminał» — hałoŭnaja halivudskaja premjera 2004 hoda ad Styviena Śpiłbierha z Tomam Chenksam u hałoŭnaj roli. Pa siužecie hramadzianin niejkaj uschodniejeŭrapiejskaj krainy pad nazvaj Krakozija pryjazdžaje ŭ Ńju-Jork i prosta ŭ aeraporcie daviedvajecca, što ŭ jaho krainie adbyłasia revalucyja i ŭsie adnosiny ź joj pierapynienyja. A hałoŭnaje — jaho dakumienty niesapraŭdnyja. Ni adpravić nazad, ni vypuścić z aeraporta jaho nie mohuć.

Pilnyja hledačy nieŭzabavie razhledzieli: dakumienty ŭ hieroja Chenksa biełaruskija! U jaho ŭ rukach apynulisia pravy kiroŭcy z nadpisam: «Vadzicielskaje paśviedčańnie», miesca vydačy — horad Homiel.

Zrazumieła, heta nie poŭny pieralik zhadak Biełarusi ŭ zachodniaj kinapradukcyi. Možna ŭspomnić «Parol: ryba-mieč», dzie hieroj Džona Travołty kazaŭ, što ŭ luby momant moža kupić u Minsku jadziernyja bojehałoŭki. Ci sieryjał «Śpiecnaz», u adnoj z častak jakoha niamieckija bajcy śpiecpadraździaleńnia ŭstupili ŭ sutyčku ź biełaruskim AMAPam. Ci jašče što-niebudź.

Słava, viadoma, sprava dobraja, ale źlohku napružvaje, što ŭ pieravažnaj bolšaści vypadkaŭ naša kraina paŭstaje ŭ, miakka kažučy, nie samim vyhadnym śviatle.

• 0
• 0
• 0
• 0
• 0
• 0
• 0
• 0