Ukraina hatova vystupić pasiarednikam pamiž Biełaruśsiu i Jeŭropaj
Ukraina hatova vystupić pasrednikam pamiž Biełaruśsiu i Jeŭraparłamientam dla narmalizacyi adnosin. Pra heta zajaviŭ śpikier Viarchoŭnaj rady Ukrainy Uładzimir Litvin 15 lutaha ŭ Kijevie na piatym pasiadžeńni Mižparłamienckaj Asamblei Ukrainy i Polščy.
«My prapanavali, što Ukraina hatova vystupać pasrednikam u znosinach pamiž Jeŭrapiejskim parłamientam i Biełaruśsiu, razumiejučy, što šlach izalacyi — heta samy prosty šlach, jaki nie daje nijakaha vyniku», — skazaŭ jon.
Litvin taksama adznačyŭ, što razumieje pazicyju Jeŭropy adnosna pracesu prezidenckich i parłamienckich vybaraŭ u Biełarusi, ale spadziajecca, što inicyjatyva ŭkrainskaha boku budzie padtrymanaja.
Akramia taho, staršynia Viarchoŭnaj rady Ukrainy ličyć nieefiektyŭnaj pracu prahramy ES «Uschodniaje partniorstva». «Pa maim hłybokim pierakanańni, stanaŭleńnie „Uschodniaha partniorstva“ jaŭna zaciahnułasia. U nas skłałasia ŭražańnie, pavažanyja kalehi, što pamianiali palityku susiedstva na „Uschodniaje partniorstva“ dla taho, kab vypracavać peŭnuju formu adstojnika dla dziaržaŭ, jakija hieahrafična, mientalna, histaryčna adnosiacca da Jeŭropy. Pieradusim ja maju na ŭvazie Ukrainu», — skazaŭ Litvin.
Jon vykazaŭ nadzieju, što efiektyŭnaja praca «Uschodniaha partniorstva» aktyvizujecca padčas staršynstva Polščy ŭ Jeŭrapiejskim Sajuzie. «Hety praces, ja maju na ŭvazie „Uschodniaje partniorstva“, užo maje patrebu ŭ reanimacyi, navat nie pačaŭšy svajoj pracy. My spadziajomsia, vierym i raźličvajem, što padčas polskaha staršynstva ŭ Jeŭrapiejskim Sajuzie hety prajekt pačnie pracavać», — padkreśliŭ Litvin.
Ciapier čytajuć
Prapahandysty pakazali mocna schudniełaha Vasila Vieramiejčyka15
Kamientary