«Vyzvaleńnie»: Palitviaźniaŭ raździavajuć dahała i ŭžyvajuć inšyja katavańni

Svajaki palitviaźniaŭ raspaviali jeŭrapiejskim dypłamatam ab žachlivych ŭmovach utrymańnia ŭ izalatarach KDB i MUS.

Inicyjatyva «Vyzvaleńnie», jakaja abjadnoŭvaje svajakoŭ palitviaźniaŭ pa «spravie 19 śniežnia», pieradała siońnia ŭ ambasadu Vienhryi, jakaja ŭ ciapierašni čas staršyniuje ŭ Jeŭrasajuzie, zvarot, u jakim zaklikaje Jeŭropu prajavić ćviordaść u pytańni nieadkładnaha i biezumoŭnaha vyzvaleńnia ŭsich palitviaźniaŭ. Zvarot taksama budzie pieradadzieny ŭ ambasady inšych krain Jeŭrasajuza. Pryvodzim tekst zvarotu całkam:

«My, svajaki palityčnych źniavolenych, źviartajemsia da Vas u strašny dla Biełarusi i ŭsich našych siemjaŭ čas.

Siońnia pa kryminalnaj spravie, zaviedzienaj paśla prezidenckich vybaraŭ 2010 hoda, prachodziać bolš za 40 čałaviek. Adzin ź ich — Vasil Parfiankoŭ — prysudžany da 4 hadoŭ stroha režymu. Hety žachliva žorstki prysud kančatkova zapeŭniŭ nas u tym, što ŭ Biełarusi adsutničaje niezaležnaja sudovaja sistema. Prysudy vynosiacca ŭ administracyi Łukašenki, i raźličvać na abjektyŭny razhlad spraŭ palitviaźniaŭ u sudzie nam nie prychodzicca.

Z momantu našaha minułaha zvarotu da Vas, kandydat u prezydenty Ŭładzimier Niaklajeŭ i žurnalistka, žonka kandydata ŭ prezidenty Andreja Sańnikava Iryna Chalip pieraviedzienyja pad chatni aryšt, 11 aryštantam była źmienienaja miera strymańnia na padpisku ab niavyjeździe. U turmach ŭsio jašče zastajucca 29 čałaviek. Heta — kandydaty ŭ prezidenty Andrej Sańnikaŭ i Mikałaj Statkievič, siabry ichničlenych vybarčych štaboŭ, žurnalisty i prosta aktyŭnyja hramadzianie.

Umovy ŭtrymańnia palitviaźniaŭ žorstkija i biesčałaviečnyja i mohuć być pryroŭnienyja da katavańniaŭ:

žorstkaje staŭleńnie kanvairaŭ sa śpiecpadpadździaleńniaŭ KDB, jakija chavajuć svaje tvary pad maskami,

šantaž i psichałahičny cisk na padślednych,

infarmacyjnaja błakada (mnohija rodnyja bolš, čym za 2 miesiacy, atrymali nie bolš za 2–3 listy),

nizkaja tempieratura ŭ kamierach (kala 8–12 hradusaŭ),

adsutnaść prybiralni ŭ mnohich kamierach.

Stała viadoma, što mužčyn vodziać na dopyty ŭ kajdankach.

Pracedura vobšuku ŭ mužčynskich kamierach adbyvajecca samym źnievažalnym čynam: mužčyn prymušajuć vynosić z kamier ŭsie rečy ŭ śpiecyjalnaje pamiaškańnie, a paśla raździavacca dahała.

U SIZA na Vaładarskaha ŭ 8-miascovych kamierach ŭtrymlivajucca pa 15–16 čałaviek, jakija vymušanyja spać pa čarzie.

Našyja blizkija biezabaronnyja pierad panujučym u krainie biezzakońniem. Uzmacniŭsia cisk na advakataŭ: 4 advakata, jakija abaraniali našych blizkich, byli pazbaŭlenyja licenzii. Ni adzin sa źniavolenych SIZA KDB nie mieŭ mahčymaści sustrecca z advakatam sam-nasam. A ź Mikałajem Statkievičam, Źmitrom Bandarenkam, Siarhiejem Marcalevym, Anatolem Labiedźkam i Paŭłam Sieviaryncam advakaty nie mohuć sustrecca z 29 śniežnia. Usio heta pazbaŭlaje viaźniaŭ sumleńnia niezaležnaj abarony padčas śledstva i ŭ sudzie.

Ni chatni aryšt, ni źmianieńnie miery strymańnia na padpisku ab niavyjeździe nie aznačajuć, što hetyja ludzi nie buduć asudžanyja i prysudžanyja da terminaŭ ad 5 da 15 hadoŭ. Dyktatura ŭ čarhovy raz sprabuje ŭvieści ŭ zman suśvietnuju supolnaść i źniać napružańnie padčas sudovych pracesaŭ. Prysudy palitviaźniam vynosiacca samyja surovyja i samyja niespraviadlivyja.

My zaklikajem Vas prajavić ćviordaść u pytańni nieadkładnaha i biezumoŭnaha vyzvaleńnia ŭsich palitviaźniaŭ.

U bližejšy čas pierad sudom paŭstanie pres-sakratar kandydata ŭ prezidenty Andreja Sańnikava, žurnalist Alaksandr Atroščankaŭ. Jon 10 hadoŭ pracavaŭ žurnalistam sajta charter97.org. Paśla stvareńnia hramadzianskaj kampanii «Jeŭrapiejskaja Biełaruś» Alaksandr Atroščankaŭ byŭ jejnym pres-sakratarom i redaktaram sajta. Padčas vybarčaj kampanii 2010 hoda staŭ pres-sakratarom Andreja Sańnikava. 19 śniežnia Alaksandr Atroščankaŭ byŭ u centry padziej, jak žurnalist i jak pres-sakratar, ale byŭ aryštavany, niahledziačy na toje, što vykonvaŭ na płoščy Niezaležnaści svaje prafiesijnyja abaviazki.

Pravaabarončaja arhanizacyja «Mižnarodnaja Amnistyja» pryznała Alaksandra Atroščankava viaźniem sumleńnia

Z momantu aryštu 19 śniežnia z Alaksandram było praviedziena tolki dva śledčych dziejańni: pradjaŭleńnie abvinavačańnia 29 śniežnia i znajomstva z materyjałami spravy. My chvalujemsia, što sud budzie vykarystany dla raspravy i poŭnaj izalacyi jaho jak čałavieka, jaki moh upłyvać na źmianieńnie situacyi ŭ krainie.

Prosim Vas nadać asablivuju ŭvahu sudu nad Alaksandram Atroščankavym, pieršamu sudu nad aktyŭnym siabram vybarčaha štaba kandydata ŭ prezidenty, i dałučycca da našych patrabavańniaŭ ab biezumoŭnym vyzvaleńni ŭsich palitviaźniaŭ.

• 0
• 0
• 0
• 0
• 0
• 0
• 0
• 0