Bolšaść biełaruskich arhanizacyj Litvy vystupajuć za sankcyi suprać Minska

«Kiraŭnik arhanizacyi, jakaja abjadnoŭvaje biełaruskija hramadskija struktury Litvy, Raman Vajnicki śćviardžaje, što biełarusy Litvy vystupajuć suprać uviadzieńnia ekanamičnych sankcyj u adnosinach da Biełarusi, ale za praciah dyjałohu z susiedniaj krainaj.

Tut, na našu dumku, patrebna ŭdakładnieńnie. Bo čałaviek nieabaznany paśla takich słovaŭ sapraŭdy moža padumać, što spadar Vajnicki vykazaŭ ahulnuju dumku biełarusaŭ Litvy, jakija razam ź im «plašuć pad dudku» biełaruskaj ambasady ŭ Litvie.

Miž tym, situacyja inšaja.

Nie ŭdajučysia ŭ hłybini, zrablu nievialikuju daviedku: Raman Vajnicki ŭznačaliŭ Zhurtavańnie biełaruskich hramadskich arhanizacyj Litvy (mienavitaja hetaja struktura majecca na ŭvazie pad arhanizacyjaj, jakaja «abjadnoŭvaje biełaruskija hramadskija struktury Litvy») ŭ 2009 h., paśla śmierci jahonaha kiraŭnika Lavona Muraški. Da hetaha Vajnicki byŭ (i zastajecca ciapier) kiraŭnikom Kłuba amataraŭ biełaruskaj narodnaj tvorčaści «Siabryna». Zhadanaje Zhurtavańnie, u asnoŭnym, składajuć filijały kłuba «Siabryna» ŭ Litvie. Raman Vajnicki «ścipła» ŭziaŭ na siabie prava vykazacca ad imia ŭsich biełarusaŭ Litvy, nie ŭdakładniajučy pry hetym, što ani «Tavarystva biełaruskaj kultury ŭ Litvie», ani «Tavarystva biełaruskaj movy», nie znachodziacca pad jaho kiraŭnictvam, hetaksama jak i «Vilenskaje tavarystva palitviaźniaŭ i źniavolenych», inšyja arhanizacyi i mnohija biełarusy Litvy, što paprostu nie ŭvachodziać u jakija-kolviek hramadskija arhanizacyi. Jany nie tolki nie ŭvachodziać u zhurtavańnie, a naadvarot, prytrymlivajucca supraćlehłych pohladaŭ, jak naprykład, kiraŭnik Tavarystva biełaruskaj kultury

Chviedar Niuńka, jaki vielmi kateharyčny ŭ acency situacyi, što skłałasia ŭ Biełarusi:

— Kali vizavyja miery nie dapamahajuć źmianić situacyju, treba pierachodzić da inšych, bolš žorstkich. Ludzi, jakija ciapier, pa sutnaści, załožniki ŭ rukach Łukašenki, nie vinavatyja, bo 19 śniežnia jany vyjšli na mirnuju akcyju, jakaja pieratvaryłasia ŭ pravakacyju z boku režymu. I ciapier padychodziać lubyja miery dziela vyzvaleńnia źniavolenych, — upeŭnieny Chviedar Jakubavič.

Niazhodnyja z Ramanam Vajnickim i siabry Vilenskaha tavarystva palitviaźniaŭ i źniavolenych.

12 sakavika ŭ Ryzie projdzie kanfierencyja biełarusaŭ zamiežža (Estonii, Łatvii, Litvy, Polščy i Rasii), na jakoj, upeŭnieny Raman Vajnicki, budzie pryniata zajava z zaklikam nie ŭvodzić sankcyi ŭ adnosinach da Biełarusi, jakuju razašluć kiraŭnikam dziaržaŭ i ŭ ŚMI.

Pra inšyja krainy kazać nie budu,

ale ad biełarusaŭ Litvy ŭ joj voźmie ŭdzieł tolki praŭładnaja hramadskaja arhanizacyja, jakoj kiruje spadar Vajnicki.

Vynikovyja zajavy takoj kanfierencyi vidavočnyja. I ŭ lepšych tradycyjach našaj dziaržavy ŭžo zahadzia jość upeŭnienaść, što jany buduć pryniatyja.

• 0
• 0
• 0
• 0
• 0
• 0
• 0
• 0