Ekanamist Kruk: Rasijski kredyt stabilizuje situacyju, ale nie vyrašyć jaje

U Biełarusi praciahvajecca valutny kryzys. Jak možna prakamentavać zajavu Nacyjanalnaha banku ad 31 sakavika? Ci jość roznahałośsi pamiž Nacbankam i ŭradam adnosna valutna-finansavaj palityki? Jak upłyvaje valutny kryzis na ekanamičnaje žyćcio krainy?

Udzielniki: ekspert Biełaruskaha ekanamičnaha daśledča-adukacyjnaha centru Źmicier Kruk i žurnalist «Biełhaziety» Siarhiej Žbanaŭ.

Nakolki adekvatnyja dziejańni Nacbanku?

Valer Karbalevič: «Subjekty haspadarańnia, investary i prosta šarahovyja hramadzianie imknucca zrazumieć, što adbyvajecca na valutnym rynku i jakija jaho perspektyvy. Nakolki adekvatnyja ŭ hetaj sytuacyi pavodziny Nacbanku? Jak možna prakamentavać zajavu Nacyjanalnaha banku ad 31 sakavika?»

Źmicier Kruk: «Zajava Nacbanku 31 sakavika lehalizavała toje stanovišča na valutnym rynku, jakoje skłałasia ciapier. Vyjście bank bačyć u atrymańni rasiejskaha kredytu.

Kali ž interpretavać pazycyju Nacbanku hłybiej, to, kab pazbavicca admoŭnaha salda, patrebna nia tolki devalvacyja, a źmiena fiskalnaj, manetarnaj palityki, skaračeńnie finansavańnia dziaržprahram. Nacbank nie žadaje brać adkaznaść za devalvacyju tolki na siabie. Kali niama palityčnaj voli da reformaŭ, to pravodzić adnu devalvacyju biessensoŭna».

Karbalevič: «A toje, što Nacbank dazvoliŭ adchilacca pazabiržavamu kursu rubla na 10% — chiba heta nie devalvacyja de-fakta?»

Kruk: «Nie. Kali b Nacbank na aficyjnych tarhach źniziŭ kurs, to tady b heta była devalvacyja de-fakta. Toje, pra što vy kažacie, — heta de-fakta zamacavańnie množnaści abmiennych kursaŭ.

Dasiul banki pradavali valutu pa vyšejšym kursie, maskirujučy heta niejkimi kamisijnymi i inšymi płaciažami. Ciapier svaim rašeńniem takoje stanovišča Nacbank zrabiŭ paŭlehalnym».

Siarhiej Žbanaŭ: «Kali valutnyja resursy abmiežavanyja, to jość dva sposaby reahavańnia. Albo treba zdymać usie abmiežavańni i ŭsio addać na volu svabodnamu rynku. Adnak takaja palityka nie karystajecca padtrymkaj prezydenta.

Albo ŭvodzić abmiežavańni. Ale heta nie vyrašaje prablemu zabieśpiačeńnia ekanomiki valutaj. Jak u 1999–2001 hadach, treba brać kredyty (u Rasiei ci MVF) i adpuskać kurs. Treba pakazać udzielnikam rynku, što jaki b ni byŭ popyt, Nacbank svaimi intervencyjami zmoža jaho zabiaśpiečyć i ŭtrymać kurs na efektyŭnym uzroŭni. Biez takich resursaŭ zastajecca tolki dzialić valutnuju pajku».

Karbalevič: «Z zajavy vice-premjera Biełarusi Rumasa možna zrazumieć, što pazycyja ŭradu nie supadaje z pazycyjaj Nacbanku. Ci tak heta? U čym sutnaść roznahałośsiaŭ?»

Kruk: «Tak, roznahałośsi paśla zajavy sp. Rumasa stali vidavočnymi. Tamu što ŭ Nacbanku i ŭradu roznyja funkcyi. Pierad uradam pastaŭlena zadača zabiaśpiečyć rost vałavoha ŭnutranaha praduktu. A pry ciapierašnich valutnych abmiežavańniach i množnaści kursaŭ vyrašyć hetuju zadaču ciažka. Tamu ŭrad i krytykuje Nacbank. To bok urad i Nacbank sprabujuć pieranieści adkaznaść adzin na adnaho».

Žbanaŭ: «Sapraŭdy, u kožnaha viedamstva svaje intaresy i funkcyi. Deficyt valutnych resursaŭ, ich abmiežavańnie źnižaje tempy rostu. I ŭrad hetym niezadavoleny, jon padšturchoŭvaje Nacbank da bolš rynkavaha kursu.

I naadvarot, Nacbank nie adkazvaje za inflacyju. A voś Rumas kaža, što inflacyja budzie na prahnoznym uzroŭni. A jana za niapoŭnyja try miesiacy składaje 5,4%. Heta bolš jak pałova prahnozu za hod».

Karbalevič: «Jakija nastupstvy valutnaha kryzisu dla ekanomiki krainy? Voś panižajecca mižnarodny kredytny rejtynh Biełarusi, rastuć ceny, paralizujucca niekatoryja sfery ekanamičnaha žyćcia. Voś, naprykład, pryjšło paviedamleńnie, što dylery pakul spyniajuć uvoz novych aŭtamabilaŭ».

Kruk: «Najbolš imavierny taki scenar. Kali nie ŭmiašajecca niejki palityčny čyńnik, to ciaham 2–3 tydniaŭ Biełaruś atrymaje rasiejski kredyt i kredyt EŭrAzES. Heta na peŭny peryjad (6–12 miesiacaŭ) stabilizuje sytuacyju. Buduć uviedzienyja abmiežavańni na impart, najpierš spažyviecki. Źnižeńnie realnych dachodaŭ za košt rostu cenaŭ taksama skarocić impart.

Ale ž takim šlacham niemahčyma vyrašyć prablemu biełaruskaj ekanomiki kanceptualna. I praz hod my možam viarnucca da siońniašniaj sytuacyi. To bok adkładajem vyrašeńnie prablemy. Heta niebiaśpiečny scenar, bo praz hod sytuacyja budzie ciažejšaja.

Siońniašniaja sytuacyja šmat u čym nahadvaje stanovišča ŭ 2008 hodzie. Ale tady daminavali vonkavyja čyńniki, a ciapier na pieršy plan vyjšli čyńniki ŭnutranyja.

Kab kardynalna raźviazać prablemu, nieabchodnaja źmiena ekanamičnaj palityki. Treba skaracić finansavańnie dziaržprahram. Minfin pra heta kaža, ale jość sumnieŭ, što heta adbudziecca. Zatym treba skaracić strukturny deficyt u ekanomicy, jaki stvarajecca za košt pramiežkavych tavaraŭ. Ale hety scenar, jaki byŭ by stanoŭčym dla ekanomiki, mienš imavierny».

Karbalevič: «Kali Biełaruś atrymaje rasiejski kredyt, to ci zachavajecca množnaść kursaŭ?»

Kurs: «Kali heta budzie tolki rasiejski kredyt u pamiery 1 młrd. dalaraŭ, to jość pytańni. A kali Biełaruś atrymaje jašče kredyt i ad EŭrAzES — 2 młrd. dalaraŭ, to množnaści abmiennych kursaŭ nia budzie. Na peŭny čas».

Žbanaŭ: «Ci chopić hetych kredytaŭ dla adnaŭleńnia sytuacyi na valutnym rynku? I na jaki čas? A množnaść kursaŭ možna likvidavać i ciapier, ustalavać adziny kurs. Pytańnie ŭ inšym: ci budzie pa takim kursie valuta na rynku, u abmiennych punktach? Ciapier jaje tam nia budzie».

• 0
• 0
• 0
• 0
• 0
• 0
• 0
• 0