Pasoł Irana: Sankcyi ZŠA da «Biełarusnafty» ŭviedzieny niapravilna

Sankcyi ZŠA ŭ dačynieńni da VA «Biełarusnafta» z-za kantrakta ź iranskaj kampanijaj NaftIran Intertrade uviedzieny na asnovie nierazumnaha i niespraviadlivaha zakona, zajaviŭ u interv`iu BiełaPAN pasoł Irana ŭ Biełarusi Siejed Abdała Chasiejni.

Nahadajem, 29 sakavika Dziardždepartamient ZŠA zajaviŭ ab uviadzieńni sankcyj u dačynieńni da VA «Biełarusnafta» z-za kantrakta biełaruskaha pradpryjemstva ź iranskaj kampanijaj NaftIran Intertrade. Dziarždepartamient ustanaviŭ, što ŭ 2007 hodzie VA «Biełarusnafta» zaklučyła kantrakt na 500 młn. dołaraŭ ZŠA ź iranskaj NaftIran Intertrade Company dla raspracoŭki naftavaha radovišča Džafiejr. Razam z tym zakon 1996 hoda praduhledžvaje nakładańnie sankcyj na kampanii, jakija inviestujuć bolš jak 20 młn. dołaraŭ.

Jak zaznačyŭ iranski pasoł, ZŠA ŭviali sankcyi na asnovie svajho zakona, jaki praduhledžvaje nakładańnie sankcyj na kampanii, što inviestujuć u Iran bolš jak 20 młn. dołaraŭ. Razam z tym, padkreśliŭ Siejed Abdała Chasiejni, Biełaruś i Iran stvaryli sumiesnaje pradpryjemstva, jakoje pracuje na naftaradžeńni Džafiejr. «100% finansavańnia zabiaśpiečvała iranskaja kampanija. Uvieś ab`iom inviestycyj prajekta roŭny 500 młn. dołaraŭ. K hetamu momantu ab`iom inviestycyj na pieršuju fazu prajekta skłaŭ 200 młn. dołaraŭ. Astatniaja častka finansavańnia — 300 młn. dołaraŭ — budzie ažyćciaŭlacca ŭžo za košt prodažu nafty, jakaja zdabyvajecca tam «, — skazaŭ jon.

Iranski dypłamat padkreśliŭ, što ZŠA ŭviali sankcyi «na asnovie niepraŭdzivaj i niapravilnaj infarmacyi». «Vyklikaje škadavańnie, što kraina, jakaja ličyć siabie adnym z suśvietnych lidaraŭ, dziejničaje takim čynam. Upeŭnieny, što ZŠA ŭ korani nie majuć racyi.

Im varta paprasić prabačeńnia ŭ Biełarusi, ale naŭrad ci jany heta zrobiać», — zaznačyŭ Chasiejni.

Kažučy ab sumiesnym biełaruska-iranskim prajekcie pa zdabyčy nafty na radoviščy Džafiejr, pasoł paviedamiŭ, što papiaredniaja faza prajekta ŭžo zavieršana i tam pačata zdabyča nafty. «Pačynałasia ŭsio z troch tysiač barelaŭ u sutki, ale pastupova ab`iom pavialičvajecca i pavinien dasiahnuć 30 tysiač barelaŭ u sutki», — skazaŭ Chasiejni.

Adkazvajučy na pytańnie ab mahčymym abmienie vizitami na vyšejšym uzroŭni pamiž Biełaruśsiu i Iranam, Chasiejni zaznačyŭ: «Takija rašeńni, jak praviła, prymaje Administracyja prezidenta. Jak tolki biełaruski bok vyznačyć terminy, my hatovy padrychtavać taki vizit u luby čas».

Chasiejni taksama padkreśliŭ, što Iran «z najvyšejšaj pavahaj hladzić na svaje adnosiny ź Biełaruśsiu i daražyć imi».

Jak raniej paviedamlaŭ BiełaPAN, Dziarždepartamient u suviazi z uviadzieńniem sankcyj u dačynieńni da VA «Biełarusnafta» adznačaŭ u svajoj zajavie, što «Złučanyja Štaty prymajuć dadatkovyja miery dla ŭzmacnieńnia nacisku na Iran za jaho admovu vykanać svaje mižnarodnyja abaviazacielstvy ŭ suviazi ź jadziernaj prahramaj».

«Adzin z klučavych elemientaŭ našaj stratehii fakusirujecca na iranskich mahutnaściach pa zdabyčy nafty i hazu, jakija, jak pryznajecca ŭ rezalucyi Savieta biaśpieki AAN № 1929, Iran vykarystoŭvaje dla finansavańnia svajoj dziejnaści pa raspaŭsiudžvańni [jadziernaj zbroi], a taksama dla maskiroŭki impartu tavaraŭ dvajnoha pryznačeńnia», — havaryłasia ŭ zajavie Dziarždepa. Padkreślena, što mienavita ŭ miežach hetaj stratehii i ŭviedzieny sankcyi ŭ dačynieńni da «Biełarusnafty». Takoje rašeńnie pryniata ŭ adpaviednaści z zakonam ab sankcyjach u dačynieńni da Irana 1996 hoda, dapoŭnienym zakonam ab usioabdymnych sankcyjach u dačynieńni da Irana, pryciahnieńni da adkaznaści i dyviestavańni (kanfiskacyi inviestycyj. — BiełaPAN.) 2010 hoda, — za jaje ŭdzieł u iranskim naftavym siektary, zaznačałasia ŭ paviedamleńni źniešniepalityčnaha viedamstva ZŠA.

Dziarždepartamient taksama nahadaŭ u hetaj suviazi, što ŭ vieraśni 2010 hoda ŭ adpaviednaści z zakonam ab usioabdymnych sankcyjach suprać Irana Złučanyja Štaty prymusili spynić inviestycyi ŭ iranski enierhietyčny siektar piać kampanij: Total (Francyja), Statoil (Narviehija), ENI (Italija), Royal Dutch Shell (Niderłandy) i INPEX (Japonija).

• 0
• 0
• 0
• 0
• 0
• 0
• 0
• 0