Pivavary spadziajucca na śpiakotnaje leta

2 červienia kiraŭnictva piŭzavoda «Alivaryja» praviało pres-kanfierencyju, pryśviečanuju najnoŭšym dasiahnieńniam pradpryjemstva, a taksama źjaŭleńniu novaj firmovaj formy plaški dla hatunkaŭ piva siaredniaha koštavaha siehmientu.

Michaił Čečenieŭ, jaki źjaŭlajecca taksama kiraŭnikom savieta hildyi pivavaraŭ Biełarusi, paviedamiŭ, što ad pieršaha červienia košt piŭnoha soładu pavialičyŭsia prykładna na 30% i heta niepaźbiežna paŭpłyvaje na rost cenaŭ na pradukcyju biełaruskich brovaraŭ. Kiraŭnik «Alivaryi» taksama zaznačyŭ, što płanujemaja inflacyja za 2011 hod składzie kala 35%, što, u svaju čarhu, taksama akaža ŭpłyŭ na pavieličeńnie koštu pradukcyi hetaha biełaruskaha brovara.

Druhaja niaradasnaja navina dla biełaruskich pivavaraŭ — raspracoŭka novaha zakonu ab rekłamie, jaki moža istotna ŭskładnić žyćcio markietołaham biełaruskich vytvorcaŭ piva. Zakon pakul tolki prapracoŭvajecca, ale užo praduhledžvaje samyja radykalnyja miery — uklučna z poŭnaj zabaronaj na rekłamu piva.

«Spadziajusia, što da skrajnaściaŭ nie dojdzie. My starajemsia prymać udzieł u raspracoŭcy novaha zakonu, kantaktujem u hetaj spravie z parłamientarami», — paviedamiŭ žurnalistam M.Čečenieŭ.

Svoj adbitak na piŭny biznes nakłaŭ i valutny kryzis. Hienieralny dyrektar «Alivaryi» paviedamiŭ, što «Alivaryja» «nie stała źnižać koštaŭ na svaju pradukcyju, jakaja adpraŭlajecca na ekspart (u pieršuju čarhu ŭ Sankt-Pieciarburh, Maskvu, na Urał, u Rastoŭ).

Ekspart dla nas zaraz žyćciova nieabchodny — heta krynica valuty. Uładalniki („Alivaryja“ naležyć Carlsberg Group) z razumieńniem staviacca da situacyi, jakaja skłałasia ŭ Biełarusi.

Kiraŭnictva «Alivaryi» taksama pryznała, što va ŭmovach ekanamičnaha kryzisu biełarusy mohuć inačaj raschodavać svoj biudžet.

«Piva ŭ skłaŭšajsia situacyi moža stać mienš pryvabnym. U suviazi z hetym my spadziajemsia na śpiakotnaje leta,

Viartajučysia da asnoŭnaj temy pres-kanfierencyi, varta zaznačyć, što ŭžo ŭ bližejšyja dni piva starejšaha biełaruskaha brovaru možna budzie nabyvać u novych plaškach. Jany raspracavanyja hałandskaj firmaj Cartils i, na dumku markietołahaŭ «Alivaryi», pavinny pazityŭna paŭpłyvać na rost papularnaści brendu. Novyja plaški majuć bolš zručnuju formu, stylovyja etykietki i ciśnieńnie. Vyrablajucca ŭ Biełarusi i, pavodle kiraŭnictva kampanii, kaštujuć stolki ž, kolki i staryja, značyć nie akažuć upłyvu na košt pradukcyi.

• 0
• 0
• 0
• 0
• 0
• 0
• 0
• 0