Turfirmy prapanujuć źnižki biudžetnikam i biaspłatnyja avijabilety

Valutny kryzis i ahulnaja finansavaja situacyja ŭ krainie baluča udaryli pa turbiznesie — u takich umovach mnohija biełarusy zadumalisia, ci varta marnavać prychavanyja na adpačynak hrošy. Kab usio-tki schilić patencyjnych turystaŭ da kupli tura, turfirmy abiacajuć klijentam skidki i bonusy, časam demanstrujučy ŭ hetaj spravie vynachodlivaść i niestandartny padychod.

Niekatoryja z akcyj dla biełarusaŭ užo stali zvykłymi: naprykład, rańniaje braniravańnie abo akcyja «2+2=2» na bałharskich kurortach, dziakujučy jakoj baćkam nie davodzicca płacić za pražyvańnie svaich dziaciej. U toj ža čas siarod bonusnych prapanovaŭ turapierataraŭ znajšłosia miesca i dla bolš aryhinalnych varyjantaŭ.

Da prykładu, adna z turfirm uvajšła ŭ ciažkaje ekanamičnaje stanovišča biełarusaŭ i ciapier abiacaje źnižki 3–10% nie tolki pastajannym klijentam, maładym i piensijanieram, ale i… rabotnikam biudžetnaj śfiery. Napeŭna, jak najbolš paciarpiełym ad ekanamičnaha kryzisu.

Inšaja kampanija prapanuje svaim turystam pahulać u hulniu «sam sabie menedžar» — «miehaźnižka» 6% čakaje ŭsich, chto zahadzia samastojna padbiare sabie tur i pryjdzie ŭ ofis tolki dla taho, kab jaho zabraniravać.

Dobry padarunak mohuć atrymać u turfirmach amatary Hrecyi: tyja, chto kupić tur na traich na zajezdy 17 i 24 červienia, adzin z avijabiletaŭ atrymaje biaspłatna.

Adzin z bujnych turapierataraŭ prapanuje atrymać u dadatak da tura ŭ Kušadasy ahladnuju ekskursiju pa horadzie, a taksama biaspłatnaje naviedvańnie dyskateki, jakoje ŭklučaje tranśfier z hatela i nazad, uvachodny bilet i pryvitalny napoj.

Ščaślivyja ŭładalniki šmatrazovych šenhienskich viz mohuć raźličvać na dadatkovyja źnižki ŭ mnohich turfirmach: pa śpiecyjalnych cenach im prapanujucca červieńskija aŭtobusnyja zajezdy ŭ Čarnahoryju, a taksama ekskursijnyja i kambinavanyja tury pa Jeŭropie.

Turapieratary, jakija viartajuć u hetym siezonie taki biudžetny kirunak, jak Rumynija, abiacajuć svaim turystam biaspłatnuju vizu ŭ hetuju krainu, a taksama ciepłachodnuju prahułku pa Dunai.

Akramia taho, apošnim časam turfirmy pačali aktyŭna vykarystoŭvać dla prasoŭvańnia svajho praduktu papularnyja sajty, jakija prapanujuć kupić źnižkavyja kupony. Na fonie kuponaŭ na stryžki, manikiur, bukiety i saŭny prapanovy turfirmaŭ hladziacca, miakka kažučy, bledna. Niahledziačy na ŭsie namahańni i vialikija źnižki — da 50%! — turystyčnyja kupony asablivym popytam nie karystajucca.

• 0
• 0
• 0
• 0
• 0
• 0
• 0
• 0