100% lipa

Televizija radasna abvieściła, što vorahi režymu panarablali ŭžo pratakołaŭ, dzie pavodle ekzyt-połaŭ zafiksavana pieramoha Milinkieviča.

Pavodle ajčynnaj tradycyi, pierad vybarami vykryvańnie špijonaŭ dy zmoŭščykaŭ nabyvaje ŭdarny rytm kasavicy. Voś i sfalšavanyja pratakoły z ofisu niezarehistravanaha «Partnerstva» — jaki svoječasovy padarunak prapahandzie!

Styl znajomy. Nam demanstravali ŭžo niekali «levy» pistalet dy falšyvyja dalary ŭ spravie Maryniča. I litoŭskaha kurjera z 200 tysiačami dalaraŭ dla Skrabca. I niejkija biardanki ŭ sklepie — maŭlaŭ, zbrojny skład insurhientaŭ. I navat abiacali pakazać lahiery bajevikoŭ, schavanyja ŭ našych puščach.

Masavaja śviadomaść — reč kalejdaskapičnaja, frahmentarnaja. Jana nia nadta źnitoŭvaje padziei, redka schamianajecca praz paŭhodu-hod: a ci ž spraŭdziŭsia toj kampramat? U śviadomaści abyvatala zastajecca adno što spałoch. Dy pierakanańnie: navokał — vorahi, ad jakich abaronić tolki «baćka».

Tak što hałoŭnaje — «svoječasova» vyvalić valizu kampramatu, a tam choć trava nie raści.

«Niačesnaha» žurnaluhu orhany adšyvajuć: kyš, u nas tajamnica śledztva! A voś na dziaržaŭnuju televiziju aperatyŭnyja materyjały specsłužbaŭ traplajuć niby praz kanvejer. Słova «prezumpcyja», musić, ličycca pieražytkam.

Zrešty, jak utrymacca ad vykryvalnickaj spakusy, kali takija žaleznyja «vieščdoki»!

Składalnik padrobnych pratakołaŭ ščyravaŭ. Ale, žartujuć admysłoŭcy, spracavaŭ na ŭzroŭni pavajennaha buchhaltara z arytmometram «Feliks».

Jon staraŭsia, kab praŭdapadobnaść była «na ŭsie 100». I mienavita na hetym pahareŭ. Litaralna! Bo kali skłaści pakazčyki čatyroch kandydataŭ, vychodzić akurat 100%. A takoha nie byvaje.

Prafesar Aleh Manajeŭ paćvierdziŭ mnie: kab suma hałasoŭ za ŭsich kandydataŭ skłała 100% — nievierahodna! Jon nahadaŭ: paśla vybaraŭ-2001 7% respandentaŭ zajavili sacyjolaham jahonaha instytutu, što prahałasavali suprać usich (darečy, heta karelujecca sa źviestkami CVK).

Kali va Ŭkrainie Juščanka spaborničaŭ ź Janukovičam, ekzyt-poły (jakija, miž inšym, dazvalałasia ładzić i amerykanskim arhanizacyjam) davali blizu 3—4% «suprać usich».

Dyk niaŭžo 19 sakavika nichto ŭ nas nie prahałasuje henakim makaram? I niaŭžo nivodzin paźniakoviec nie źniasie aficyjnaha biuleteniu pad markaju «narodnaha hałasavańnia»?

Jak ni kruci, a televizija pakazała lipu. Stoadsotkavuju. Chto b za joj ni stajaŭ.

I jašče. Dziela čaho hipatetyčnyja zmoŭščyki hruba parušali kanśpiracyju, składajučy pratakoły tak zadoŭha da vybaraŭ? Kab potym nie marnavać času? Ale adkul viadoma, što ŭ biuleteniach budzie mienavita čatyry proźviščy? CVK ž raz-poraz strašyć, što moža skasavać čyjuści rehistracyju — naprykład, za złoŭžyvańnie pieradvybarčaj ahitacyjaj. I tady ŭsie zahadzia składzienyja pratakoły — katu pad chvost.

Kolki budzie proźviščaŭ u biuleteniach, moža viedać tolki toj bok, jaki prymaje rašeńnie. Uładny bok.

«Hazieta.Ru» dała siužet ab pratakołach pad źjedlivym zahałoŭkam: «KDB pravioŭ apytańnie hramadzkaje dumki». Niezaležnyja sacyjolahi taksama ćvierdziać pra imaviernuju pravakacyju specsłužbaŭ. Bałtyjski «Hiełap» zajaviŭ, što nijakaha ekzyt-połu 19 sakavika nie planuje. Ale słaba vierycca, kab jaho pratest ahučyli praź dziaržaŭnyja medyi. Chiba kali voŭk u lesie zdochnie.

Chutčej varta čakać novych sensacyjaŭ ad specsłužbaŭ. Šef KDB pryhraziŭ u sieradu, što ŭ apazycyjnych kubłach znojdziecca navat vybuchoŭka. Kali apazycyja nie supakoicca...

❏

SASKOČYŁA

Kali treba, KDB znojdzie

Adkazvajučy na pytańnie pra vybuchoŭku, jakuju planavałasia [apazycyjaj] užyć u chodzie planavanaj akcyi, Ściapan Sucharenka skazaŭ: «Nia dumaju, što paśla taho, jak my zrabili heta publičnym, jany pojduć na taki krok. Tym nia mienš, sytuacyju budziem adsočvać, i ŭ vypadku, kali jany ryzyknuć heta zrabić, my znojdziem vybuchoŭku».

Naviny.by

• 0
• 0
• 0
• 0
• 0
• 0
• 0
• 0