Uprava MHA «ZBS «Baćkaŭščyna» vystupiła z admysłovaj zajavaj.
Uprava MHA «Zhurtavańnie biełarusaŭ śvietu «Baćkaŭščyna» vykazvaje vialikuju zaniepakojenaść z nahody kryminalnaha pieraśledu Maładziovaha kłuba «Kryvičy» pry Irkuckim tavarystvie biełaruskaj kultury imia Jana Čerskaha i jaho staršyni — Aleha Rudakova i źviartajecca pa dapamohu ŭ adstojvańni jaho honaru i hodnaści da biełarusaŭ śvietu.
Jak stała viadoma, Śledčaje ŭpraŭleńnie Śledčaha kamiteta Rasijskaj Fiederacyi pa Irkuckaj vobłaści z padtrymkaj SOBRA i Śpiecnaza 12 krasavika kala 8.20 uvarvalisia ŭ maskach i z aŭtamatami ŭ kvateru staršyni Irkuckaha tavarystva biełaruskaj kultury imia Jana Čerskaha Aleha Rudakova i na siadzibu Tavarystva.
Pa infarmacyi Aleha Rudakova, supracoŭnikami pravaachoŭnych orhanaŭ u jaho na kvatery byli kanfiskavany 2 kamputary, noŭtbuk i niekatoryja knihi, u tym liku «Kto jesť kto v Vielikoj Otiečiestviennoj vojnie» na ruskaj movie. Na siadzibie ITBK byli kanfiskavany: kniha «Antybalšavickija paŭstańni na Biełarusi», piać kalandarykaŭ z vyjavami vajskoŭcaŭ BNR i BKA, a taksama nieviadoma kim pakinutaja knižačka pa sajentałohii i try numary haziety «Naśledije priedkov» za 2004 hod.
Alehu Rudakovu pradjavili Pastanaŭleńnie ab vobšuku, dzie było skazana, što zaviedziena kryminalnaja sprava, u jakoj jon fihuruje jak lidar «ekstremisckaj hrupiroŭki «Moładzievy kłub «Kryvičy». Ksierakopiju z Pastanaŭleńnia źniać nie dazvolili.
«U Pastanaŭleńni ab vobšuku napisana, što ja źjaŭlajusia duchoŭnym lidaram hetaj hrupoŭki, što ja “vybudavaŭ žorstkuju ijerarchiju i bieśpiarečnaje padparadkavańnie mnie, jak lidaru”, što ja vykładaju bajavyja vidy baraćby i zabaraniaju ŭ miežach hrupoŭki razmaŭlać na ruskaj movie i šmat čaho jašče, što, biezumoŭna, łuchta»,— paviedamiŭ Aleh Rudakoŭ.
Takija nieadekvatnyja dziejańni byli vyklikanyja tym, što pravaachoŭnyja orhany Irkucka zaviali kryminalnuju spravu ab ekstremiźmie suprać biełarusa Alaksieja Kuchty, aktyvista moładzievaha kłuba «Kryvičy», stvoranaha pry Irkuckim tavarystvie biełaruskaj kultury. Alaksieju Kuchtu vystavili abvinavačańnie pavodle artykuła «Uzbudžeńnie nianaviści albo varožaści, a taksama źniavaha čałaviečaj hodnaści».
Pa infarmacyi Aleha Rudakova, Alaksiej Kuchta raźmiaściŭ na svajoj asabistaj staroncy ŭ sacyjalnaj sietcy «Vkontaktie» prafašysckija i antysiemickija vykazvańni i fotazdymki.Taksama jon źjaŭlajecca maderataram staronki moładzievaha kłuba «Kryvičy» «Vkontaktie». Tam jon raźmiaściŭ film «Biełaruski rezistans» i fota dziejačaŭ BKA. Jon zrabiŭ heta pa ŭłasnaj inicyjatyvie, nie papiaredziŭšy pra heta Aleha Rudakova. Na dumku apošniaha, vyhladaje na toje, što Śledčy kamitet i Adździeł pa ekstremizmu vyrašyli vysłužycca.
U suviazi z hetaj kryminalnaj spravaj druhi raz za tydzień byli praviedzieny pieratrusy ŭ kvatery staršyni Irkuckaha tavarystva biełaruskaj kultury imia Jana Čerskaha Aleha Rudakova i na siadzibie Tavarystva.
Sproba pryciahnuć Aleha Rudakova da kryminalnaj adkaznaści jak lidara «ekstremisckaj hrupiroŭki «Moładzievy kłub «Kryvičy» vyhladaje absalutna nieabhruntavanaj i navat absurdnaj. Užo bolš za 15 hod Aleh Rudakoŭ niastomna pracuje na nivie papularyzacyi biełaruskaj kultury ŭ Prybajkalli. Jaho imia dobra viadomaje biełarusam va ŭsim śviecie.
Mierapryjemstvy, jakija pravodziacca ITBK i maładziovym kłubam «Kryvičy» źjaŭlajucca adkrytymi. Na ich prysutničajuć ludzi roznych nacyjanalnaściaŭ i vieravyznańniaŭ, pradstaŭniki orhanaŭ ułady i ŚMI. Videarepartažy pra dziejnaść Tavarystva rehularna pakazvajuć pa miascovych telekanałach.
Aleh Rudakoŭ uznaharodžany šmatlikimi hanarovymi hramatami, u tym liku Hanarovaj hramataj Hubiernatara Irkuckaj vobłaści. Jon źjaŭlajecca siabram Kansultatyŭny Savieta pa spravach biełarusaŭ zamiežža pry Ministerstvie kultury Respubliki Biełaruś. U krasaviku 2010 hoda Ukazam № 195 prezidenta Respubliki Biełarusi za asabisty ŭkład u zachavańnie tradycyj biełaruskaj kultury Aleh Rudakoŭ byŭ uznaharodžany miedalom Francyska Skaryny.
Zhurtavańnie biełarusaŭ śvietu «Baćkaŭščyna» aburanaje dziejańniami Śledčaha ŭpraŭleńnia Śledčaha kamiteta Rasijskaj Fiederacyi pa Irkuckaj vobłaści, jakija navat pry najaŭnaści padstavaŭ dla ŭzbudžeńnia kryminalnaj spravy ŭ dačynieńni da sp. Kuchty, nie mieli ni padstavaŭ, ni maralnaha prava nanosić uron svaimi dziejańniami Alehu Rudakovu i Irkuckamu tavarystvu biełaruskaj kultury.
Uprava Mižnarodnaha hramadskaha abjadnańnia Zhurtavańnie biełarusaŭ śvietu «Baćkaŭščyna» zajaŭlaje što, Irkuckaje tavarystva biełaruskaj kultury imia Jana Čerskaha i stvorany pry ITBK moładzievy kłub «Kryvičy» zajmajucca vyklučna kulturnickaj dziejnaściu,u pryvatnaści dziejnaściu pa adradžeńni i papularyzacyi duchoŭnych i kulturnych kaštoŭnaściaŭ biełaruskaha naroda ŭ Prybajkalli, raspaŭsiudžvańni i padtrymcy biełaruskich nacyjanalnych zvyčajaŭ, ramiostvaŭ, abradaŭ i movy. Zhurtavańnie «Baćkaŭščyna» ščylna supracoŭničaje ź ITBK ad momantu stvareńnia Tavarystva ŭ 1996 hodzie.
Kiraŭnictva «Baćkaŭščyny» dobra viedaje asabista Aleha Rudakova i mnohich aktyvistaŭ ITBK.
Uprava Zhurtavańnia biełarusaŭ śvietu «Baćkaŭščyna» zaklikaje hramadskaść Biełarusi, arhanizacyi biełaruskaj dyjaspary pa ŭsim śviecie abaranić honar i hodnaść Irkuckaha tavarystva biełaruskaj kultury i jaje kiraŭnika Aleha Rudakova i dasyłać adpaviednyja zvaroty ŭ ambasadu Rasii ŭ Biełarusi i naŭprost u Prakuraturu Irkucka.
***
Daviedka:
Irkuckaje tavarystva biełaruskaj kultury imia Jana Čerskaha było stvorana Aleha Rudakovym u 1996 hodzie. Asnoŭnaja meta Tavarystva – adradžeńnie, zachavańnie i raźvićcio duchoŭnych i kulturnych kaštoŭnaściaŭ biełaruskaha naroda, raspaŭsiudžvańnie i padtrymka biełaruskich nacyjanalnych zvyčajaŭ, ramiostvaŭ, abradaŭ i movy.
Irkuckaja haradskaja maładziožnaja hramadskaja arhanizacyja “Moładzievy kłub “Kryvičy” (MK “Kryvičy”) aficyjna zarehistravanaja va Upraŭleńni Ministerstva justycyi Rasijskaj Fiederacyi pa Irkuckaj vobłaści 8 vieraśnia 2009 hoda. Dadzienaja arhanizacyja zajmajecca vyvučeńniem biełaruskich śviataŭ, ramiostvaŭ, piesień i tancaŭ.
U Irkuckaj vobłaści dziejničaje 11 adździaleńniaŭ ITBK. Akramia moładzievaha kłuba “Kryvičy”, pry ITBK dziejničajuć 6 biełaruskich falkłornych hurtoŭ, 3 dziciačyja falkłornyja studyi, 2 chareahrafičnych dziciačych ansambli, narodny biełaruski chor, 2 hurty aŭtentyčnych biełaruskich śpievaŭ. U siadzibie Tavarystva stvorany biblijateka biełaruskaj litaratury i muziej-majsternia “Biełaruskaja chatka”, dzie sabrany ŭnikalnyja ekspanaty ź biełaruskich viosak Prybajkalla. U muziei irkuckaja moładź zajmajecca staražytnymi biełaruskimi ramiostvami: sałomaplacieńniem, sensavaj vyšyŭkaj, tkactvam, pajasaplacieńniem, vycinankaj, rekanstrukcyjaj nacyjanalnych biełaruskich strojaŭ i inš.
ITBK rehularna ładzić adznačeńnie staradaŭnich biełaruskich śviataŭ, takich jak Hukańnie Viasny, Kamajedzica, Kupalle, Dziady, Kalady, pravodzić majstar-kłasy pa navučańni biełaruskim narodnym tancam, biełaruskija histaryčnyja viečaryny, etnahrafičnyja ekśpiedycyi pa biełaruskich vioskach Prybajkalla i inš. Štohod ładzicca abłasny Fiestyval-konkurs “Hučy, homan biełaruski”, na jaki źjazdžajucca kalektyvy z usiaho Prybajkalla.
U 2011 hodzie Rehijanalnaja hramadskaja arhanizacyja “Irkuckaje tavarystva biełaruskaj kultury imia Jana Čerskaha” zaniała pieršaje miesca ŭ konkursie na lepšy nacyjanalna-kulturny centr Irkucka, jaki pravodziŭsia administracyjaj horada.
Kamientary