Ministr justycyi prapanuje ŭvieści kryminalnuju adkaznaść za ŭchileńnie ad vypłaty daŭhoŭ

Ministr justycyi Biełarusi Aleh Śližeŭski ličyć, što vyrašyć prablemu ŭchileńnia ad vypłaty daŭhoŭ možna z uviadzieńniem kryminalnaj adkaznaści dla daŭžnikoŭ, až da pazbaŭleńnia voli. Takoje mierkavańnie jon vykazaŭ u čas žyvoj telefonnaj linii ŭ haziecie «Respublika».

Ministr pryznaŭ, što ŭ Biełarusi jość prablema sa spahnańniem hrošaj z daŭžnikoŭ. «Spahnańnikam štohod viartajecca bolš jak 11% vykanaŭčych dakumientaŭ biez vykanańnia z aktam ab niemahčymaści spahnańnia», — skazaŭ Aleh Śližeŭski.

Jon ličyć, što značnaja kolkaść daŭžnikoŭ naŭmysna nie vypłačvajuć hrošy ni dziaržavie, ni na karyść jurydyčnych i fizičnych asob. «Hramadzianie ŭ svaich zvarotach adznačajuć, što daŭžniki raźjazdžajuć na darahich mašynach, žyvuć u asabniakach i šykoŭnych kvaterach. Razam z tym heta ŭłasnaść, jak vyśviatlajecca, aformlena na ich svajakoŭ i znajomych. Aficyjna takija ludzi abo nie pracujuć, abo ž śpiecyjalna ŭładkoŭvajucca na nizkaapłatnuju rabotu, pakolki pa normach hramadzianskaha pracesualnaha zakanadaŭstva ŭstanoŭleny nieapraŭdana nizki pracent utrymańniaŭ z zarabotnaj płaty daŭžnika — nie vyšej za 20%», — rastłumačyŭ ministr.

Atrymlivajecca, što daŭžniki byccam by nie ŭchilajucca ad vykanańnia rašeńnia suda.

«Razam z tym spahnańniki, u tym liku i dziaržava, atrymlivajuć kapieječnyja sumy pry najaŭnaści miljardnych daŭhoŭ. Liču, vyrašeńniem hetaj prablemy stała b uviadzieńnie kryminalnaj adkaznaści dla daŭžnikoŭ, až da pazbaŭleńnia voli.

Pavodle słoŭ ministra, u lutym hetaha hoda pačata rabota pa padrychtoŭcy prajekta zakona ab uniasieńni papravak u Hramadzianski pracesualny kodeks pa pytańniach vykanaŭčaha viadzieńnia pa spravie. U pryvatnaści Miniust prapanuje ŭnieści źmianieńni, nakiravanyja na pavieličeńnie pamieru ŭtrymańniaŭ z zarabotnaj płaty daŭžnika i pryraŭnavanych da jaje dachodaŭ pa ŭsich vidach spahnańniaŭ z 20 pracentaŭ da 50 pracentaŭ. Prapanavana taksama ŭvieści instytut dekłaravańnia daŭžnikom svajoj majomaści. «Instytut prymusovaha dekłaravańnia daŭžnikom svajoj majomaści daść mahčymaść u bolš apieratyŭnym režymie vyjaŭlać i nakiroŭvać spahnańnie na hetu majomaść, pry hetym sudovym vykanaŭcam nie budzie zatračvacca čas na nakiravańnie adpaviednych zapytaŭ u rehistracyjnyja orhany ab najaŭnaści ŭ daŭžnika majomaści (u pieryjad jakich daŭžnik moža ŭtaić svaju majomaść)», — ličyć Aleh Śližeŭski.

• 0
• 0
• 0
• 0
• 0
• 0
• 0
• 0