Centrvybarkam na pasiadžeńni 5 lipienia pryniaŭ pałažeńnie ab paradku vykarystańnia srodkaŭ masavaj infarmacyi padčas vybarčaj parłamienckaj kampanii.
Jak paviedamiła staršynia CVK Lidzija Jarmošyna, kožnamu kandydatu budzie davacca pa 5 chvilin efirnaha času, jašče 5 chvilin — viadučamu. Heta značyć, kali ŭ debatach buduć udzielničać dva kandydaty, jany buduć doŭžycca 15 chvilin, 5 kandydataŭ — paŭhadziny.
Paradak praviadzieńnia debataŭ Jarmošyna nazvała samym ciažkim momantam dakumienta, bo kandydataŭ budzie šmat — jak miarkujecca, na kožnuju akruhu pa piać čałaviek, a ŭ Minsku — pa siem.
«Kali zychodzić z našych raźlikaŭ, to na debaty pa ŭsioj Biełarusi zapatrabujecca 219 hadzin — heta vielmi šmat z punktu hledžańnia ŭsprymańnia vybarščykam. Usie prablemy buduć vyrašacca ŭ pracesie. Nie vyklučana, što ŭ hetuju pastanovu z časam buduć uniesieny źmianieńni», — skazała kiraŭnik CVK.
Pavodle jaje słoŭ, u debatach kandydaty zmohuć bać udzieł jak asabista, tak i nakiroŭvać na ich svaich pamočnikaŭ.
Abjom prahramy nie pavinien pieravyšać dźvie mašynapisnyja staronki, ci čatyry tysiačy znakaŭ.Akramia taho, kožny kandydat u deputaty atrymaje mahčymaść biaspłatna apublikavać svaju prahramu ŭ adnoj z respublikanskich dziaržaŭnych haziet, a taksama ŭ abłasnoj, haradskoj abo rajonnaj.
Kandydatam u deputaty taksama budzie dadziena prava vystupleńnia pa telebačańni i radyjo. Pa telebačańni vystupleńni buduć tranśliravacca z 19.00 da 20.00, pa radyjo — z 18.00 da 19.00.
Parłamienckija vybary ŭ Biełarusi projduć 23 vieraśnia.
Kamientary