Najpryhažejšyja navabudy Minska - rejtynh pavodle apytańnia architektaraŭ
Pačuŭšy aznačeńnie «sučasnaja architektura Minska», mnohija chapajucca za serca. Sapraŭdy, budujecca ŭ stalicy šmat, ale pieravažna heta typovyja abjekty.
A čym z pabudovaŭ apošnich 20 hadoŭ možna sapraŭdy hanarycca?«Naša Niva» vyrašyła stvaryć rejtynh najpryhažejšych ź ich.
Znajści ekśpiertaŭ było nialohka. Architektary nieachvotna aceńvajuć pracy kaleh. Admovilisia ŭdzielničać, skažam, Leanid Levin i Armien Sardaraŭ. My ŭsio ž atrymali zhodu ad troch majstroŭ ź imionami i troch maładych architektaraŭ.
U składańni śpisa ŭdzielničali architektar Ihar Bajcoŭ, mastactvaznaŭca Siarhiej Chareŭski i papularny błohier Darriuss, jaki piša pra architekturu. A ź imi — maładyja architektary Alaksandra Bajaryna, Dźmitryj Sakałoŭ, Farchad Muładžanaŭ.
Lidar akazaŭsia biassprečnym.
1. «Minsk-Arena» («Biełdziaržprajekt») — 17 bałaŭ
Za «Arenu» prahałasavała absalutnaja bolšaść apytanych.
Ihar Bajcoŭ, vialiki prychilnik kłasičnaj architektury, aceńvaje «Minsk-Arenu» nastupnym čynam:
«Hustoŭny prajekt. U im niama niepažadanych detalaŭ, i, hałoŭnaje, «Minsk-Arena» vyhladaje zavieršana. Vielmi stylovaja reč».
Pry hetym inšy statusny prajekt apošniaha dziesiacihodździa, Nacyjanalnaja biblijateka, u top nie trapiła. Jaje nazvaŭ tolki adzin z ekśpiertaŭ.
2. Minski mižnarodny adukacyjny centr imia Jachanesa Rau (Rychard Pirškie i «TM Varabjova A.A.») — 15 bałaŭ
Samy stary budynak u našym rejtynhu adnosicca da pačatku 90-ch hadoŭ. Błohier Darriuss tłumačyć:
«Hety kompleks 1992—1994 hadoŭ možna ličyć pieršym uzoram sučasnaj architektury ŭ postsavieckim Minsku.Niamiecki architektar Rychard Pirškie supolna ź biełarusam Aleham Varabjovym, abyhryvajučy suprematyčnyja vobrazy, zmahli stvaryć budynak, jaki, z adnaho boku, parvaŭ z savieckim madernizmam 1960—80-ch, ale, ź inšaha boku, vyhladaŭ viartańniem da jaho karanioŭ. Na žal, ajčynnyja architektary ŭ dalejšym nie stali raźvivać hety ŭdały dośvied», — škaduje Darriuss.
3. Žyły dom («Deputacki dom») u zavułku Kazarmiennym («TM Školnikava B.E.») — 10 bałaŭ
Dom u dvarach u łuce Śvisłačy zaniaŭ treciaje miesca, bo za jaho prahałasavali ŭsie maładyja majstry. Musić, jany jaho vyvučali? Što ŭ im admietnaha, rastłumačyła Alaksandra Bajaryna — darečy, jana taja samaja architektarka, jakaja prapanavała azdobić Opieru kłumbami:
«Heta dušeŭny budynak. Kali jaho paraŭnoŭvać z žyłymi damami, jakija budujuć ciapier na Prytyckaha, to ŭ hetym prajekcie adčuvajecca sapraŭdnaja harmonija, jakoj brakuje žyllovaj architektury Minska».
4. Restaran «Džejms» («Minskhramadzianprajekt», Ivaška A.A.) — 9 bałaŭ
Dźmitryj Sakałoŭ, siabar praŭleńnia Biełaruskaha sajuza architektaraŭ, ličyć budynak restarana najcharašejšym na vulicy Surhanava.
«Ścipłymi srodkami dasiahnuty šykoŭny vynik, — raskazvaje spadar Dźmitryj. — U novabudoŭli na inšym baku toj samoj vulicy ŭkłali našmat bolš hrošaj, adnak tam brakuje hustu. Hałoŭnaja prablema ŭ Minsku ciapier — jakraz-taki ŭ hustoŭnaści, a
pa budynku spadara Ivaški vidać, što architektar maje svoj pohlad na toje, jakim musić być sučasny budynak, i jon zdoleŭ adstajać svaju pazicyju — a heta važna».
5. «Alaksandraŭ-pasaž» — 8 bałaŭ
Biznes-centr «Alaksandraŭ-pasaž» mieścicca na praśpiekcie Niezaležnaści, pa dyjahanali ad Nacyjanalnaj biblijateki. Chadzili čutki, što
pačatkova prajekt aburyŭ harvykankam, bo «Pasaž» akazaŭsia ledź nie vyšejšym za biblijateku.Ciapier u hetym budynku mieściacca salidnyja kampanii — naprykład, firmovy sałon «Porše».
6. Biznes-centr Silver Tower (Karacienka I.B., Łašakievič A.S., Archanhielskaja V.Ł. «Architekturnaja studyja-7») — 7 bałaŭ
«Pa-pieršaje, tut adekvatna spałučajucca vyhlad budynka i jaho pryznačeńnie, — miarkuje Siarhiej Chareŭski. — Adrazu vidać, što heta ofisnaje pamiaškańnie. Jon aščadna azdobleny, trapna vykarystanyja vyjaŭlenčyja srodki, niama biazhłuzdaj rasfarboŭki.
I hety budynak zadaje ton usiamu rajonu: kali jedzieš pobač, jon stvaraje ŭražańnie, upryhožvaje hety rajon, vyhladaje «pa-bahatamu» i pry hetym stylova».
7. Štab-kvatera Biełaruskaj kalijnaj kampanii (2013, arch. Varabyeu partners) — 5 bałaŭ
Hety zašklony cud paŭstaŭ na bierazie Śvisłačy pad hatelem «Biełaruś». Ciapier zaviaršajucca pracy pa jaho azdableńni.
Pa mierkavańni błohiera Darriuss'a mienavita hety budynak — najcikaviejšy z usich novabudoŭlaŭ Minska. Pieršapačatkova prajekt byŭ jašče bolš składanym, ale navat paśla spraščeńnia budynak nie zhubiŭ aryhinalnaści.
Vynikovy rejtynh
padajecca pavodle padliku bałaŭ pa piacibalnaj škale. Za 1-je miesca naličvali 5 bałaŭ, za 2-je — 4, za 3-je — 3 i h.d.
Rejtynhi ekśpiertaŭ
Ihar Bajcoŭ, architektar
1. «Minsk-Arena»
2. Fasad «Pryjorbanka» (vuł. Charužaj)
Siarhiej Chareŭski, mastactvaznaŭca
1. «Minsk-Arena»
2. Biznes-centr Silver Tower
3. Dom-brama na pierasiačeńni vuł. Plachanava i pr. Rakasoŭskaha
4. Viežy-bliźniaty na vuł. Prytyckaha, kala st. mietro Kamiennaja Horka
5. Dom Miłasernaści na vuł. Skaryny
Darriuss, błohier, jaki piša pra architekturu
1. Štab-kvatera Biełaruskaj kalijnaj kampanii
2. Katedž u Ściapiancy
3. «Minsk-Arena»
4. Biznes-centr Silver Tower
5. Mižnarodny adukacyjny centr imia Jachanesa Rau
Alaksandra Bajaryna, architektarka
1. Mižnarodny adukacyjny centr imia Jachanesa Rau
2. «Alaksandraŭ-pasaž»
3. «Minsk-Arena»
4. Žyły dom u zav. Kazarmiennym
5. Biznes-centr Silver Tower
Dźmitryj Sakałoŭ, architektar, siabar praŭleńnia Biełaruskaha sajuza architektaraŭ
1. Mižnarodny adukacyjny centr imia Jachanesa Rau
2. Restaran «Džejms»
3. Žyły dom u zav. Kazarmiennym
4. «Alaksandraŭ-pasaž»
5. «Minsk-arena»
Farchad Muładžanaŭ, architektar
1. Mižnarodny adukacyjny centr imia Jachanesa Rau
2. Restaran «Džejms»
3. Žyły dom u zav. Kazarmiennym
4. «Alaksandraŭ-pasaž»
5. Nacyjanalnaja biblijateka
Ciapier čytajuć
«My dajom Štatam toje, što jany chočuć». Rasijski kanał apublikavaŭ videa, jakoje nazyvajuć zapisam Ryžankova schavanaj kamieraj u mašynie14
Kamientary