Kiraŭnička Centrvybarkama raspaviała, chto moža vyłučacca ŭ parłamient.
U parłamient majuć namier vyłučacca piersanalii jak miascovaha, tak i respublikanskaha značeńnia, paviedamiła kiraŭnik Centralnaj vybarčaj kamisii Lidzija Jarmošyna na pres-kanfierencyi ŭ Minsku 26 lipienia.
Pavodle jaje słoŭ, vyłučacca majuć namier staršynia pałaty pradstaŭnikoŭ Uładzimir Andrejčanka i jaho namieśnik Viktar Huminski, eks-kandydaty ŭ prezidenty Alaksandr Milinkievič i Viktar Ciareščanka, byłyja deputaty Uładzimir Navasiad i Valeryj Frałoŭ, lidary Ab`iadnanaj hramadzianskaj partyi i Partyi BNF Anatol Labiedźka i Alaksiej Janukievič.
Ciapier, paviedamiła Jarmošyna, zarehistravanyja 352 inicyjatyŭnyja hrupy. Dziesiać hramadzian zarehistravali dźvie i bolš inicyjatyŭnych hrup. Takim čynam, vyłučacca šlacham zboru podpisaŭ majuć namier 330 čałaviek, adznačyła kiraŭnik CVK.
Pavodle staršyni CVK, vyłučeńnie eks-kandydataŭ u prezidenty Mikałaja Statkieviča i Alesia Michaleviča niepravamocnaje.
Pavodle słoŭ Jarmošynaj, CVK atrymała aficyjnaje paćviardžeńnie tamu, što praz administracyju papraŭčaj ustanovy, dzie ŭtrymlivajecca Statkievič (śledčy izalatar Mahilova), jon nie pieradavaŭ nijakija listy ŭ vybarčyja kamisii. A inšaj mahčymaści padpisać dakumienty ab rehistracyi svajoj inicyjatyŭnaj hrupy ŭ Statkieviča nie było, padkreśliŭ kiraŭnik Centrvybarkama. Što da Alesia Michaleviča, to, pavodle słoŭ Jarmošynaj, jon usio jašče znachodzicca ŭ mižnarodnym vyšuku.
Kamientary