Suśvietny bank praciahnie padtrymku Biełarusi

Suśvietny bank paćviardžaje svoj namier praciahnuć akazańnie dapamohi Biełarusi ŭ raspracoŭcy i realizacyi kompleksnych i hłybokich strukturnych reform. Pra heta havorycca ŭ liście dyrektara adździeła Biełarusi, Małdovy i Ukrainy SB Čymiao Fana kiraŭniku biełaruskaha ŭrada Michaiłu Miaśnikoviču.

«Suśvietny bank hatovy praciahnuć akazańnie dapamohi ŭradu ŭ raspracoŭcy i realizacyi kompleksnych i hłybokich strukturnych reform u metach sadziejničańnia ŭmacavańniu kankurentazdolnaści i ŭstojlivamu rostu ŭ Respublicy Biełaruś», — cytuje list pres-słužba Savieta ministraŭ.

U praciah pracy, raspačataj u miežach Krainavaha ekanamičnaha miemaranduma, SB zapłanavaŭ prahramnuju techničnuju dapamohu pa pytańniach strukturnych reform. Heta dazvolić hnutka padyści da akazańnia kansultacyjnaj i analityčnaj dapamohi pa asobnych pryjarytetnych pytańniach ekanamičnaj palityki, jakija vyznačany ŭradam Biełarusi, ličać u banku.

Suśvietny bank taksama paćvierdziŭ hatoŭnaść akazvać dapamohu Nacyjanalnamu ahienctvu pa inviestycyjach i pryvatyzacyi «ŭ realizacyi prahramy pryvatyzacyi vaśmi kankretnych siarednich pradpryjemstvaŭ, kab prademanstravać pieravahi kankurentnych i adkrytych pracedur pryvatyzacyi».

U biudžetna-padatkovaj śfiery ekśpierty Suśvietnaha banka prapanujuć techničnuju dapamohu ŭ pytańniach refarmavańnia piensijonnaj sistemy i sistemy sacyjalnaj dapamohi, pavyšeńnia efiektyŭnaści dziaržaŭnych raschodaŭ na achovu zdaroŭja i adukacyju, udaskanalvańnia mižbiudžetnych adnosinaŭ i kiravańnia doŭham.

Asablivaja ŭvaha ŭ liście Čymiao Fan nadaŭ uvachodžańniu Biełarusi ŭ Suśvietnuju handlovuju arhanizacyju. Na jaho dumku, dałučeńnie Biełarusi da SHA «ŭjaŭlaje saboj unikalnuju mahčymaść źviazać reformy sa źniešnimi faktarami». Suśvietny bank, u svaju čarhu, hatovy akazać uradu Biełarusi «padtrymku ŭ hetym važnym pracesie».

«Dla ŭvachodžańnia ŭ SHA zapatrabujecca pryniać šyrokaje koła abaviazacielstvaŭ pa libieralizacyi ekanomiki i skaračeńni roli dziaržavy, što ŭzmocnić patrebu ŭ strukturnych reformach. My prapanujem arhanizavać pryjezd misii dla vyznačeńnia kankretnych kirunkaŭ, pa jakich patrabujecca padtrymka, a taksama abmiarkujem z patencyjalnymi donarami mahčymyja krynicy finansavańnia kompleksnaj prahramy padtrymki», — havorycca ŭ liście Čymiao Fana.

Jon taksama daŭ adkaz nakont zvarotu biełaruskaha ŭrada z prośbaj apieratyŭna raspracavać novuju stratehiju supracoŭnictva SB i Biełarusi, paabiacaŭšy abmierkavać hetaje pytańnie ŭ banku.

Dyrektar adździeła Suśvietnaha banka adznačyŭ prahres u raźvićci ekanomiki Biełarusi, dasiahnuty na praciahu minułaha paŭhodździa. Na jaho dumku, zaraz «važna praciahnuć makraekanamičnuju stabilizacyju za košt zachavańnia žorstkaj hrašova-kredytnaj i biudžetna-padatkovaj palityki ŭ metach strymlivańnia inflacyjnaha nacisku i ŭmacavańnia stanoŭčaj tendencyi ŭ častcy adnaŭleńnia bałansu źniešnich rachunkaŭ». Uličvajučy značnuju stupień niapeŭnaści ŭ źniešnim asiarodździ, Čymiao Fan ličyć, što dačasnaje źmiakčeńnie makraekanamičnaj palityki ŭ Biełarusi moža być spałučana sa značnymi ryzykami.

• 0
• 0
• 0
• 0
• 0
• 0
• 0
• 0