Hruzčyka na chlebazavodzie zvolnili za fota z rastałym marharynam
Marharynu zakupili stolki, što jon nie ŭlez u ladoŭniu.
U Mahilovie zastaŭsia biez pracy aktyvist Partyi BNF Uładzimir Tryzunoŭ. Jon rabiŭ hruzčykam na chlebazavodzie.
Jak śćviardžaje aktyvist, zvolnili jaho za toje, što jon sfatahrafavaŭ, a potym apublikavaŭ u internecie fota taho, jak zachoŭvajucca na pradpryjemstvie pradukty, ź jakich piakuć słodyčy. Farmalnaja pryčyna zvalnieńnia Tryzunoŭ — prahuł.
Hruzčykam na chlebazavodzie Uładzimir Tryzunoŭ adpracavaŭ čatyry miesiacy. Jak zajaŭlaje aktyvist, svaich apazicyjnych pohladaŭ u pracoŭnym kalektyvie nie chavaŭ. Ubačyŭšy rastały marharyn, sfatahrafavaŭ jaho na mabilny telefon.
«Jaho zakupili zašmat. Jon nie ŭmiaščaŭsia ŭ ladoŭni. Jaho pierapracoŭvali na piačeńnie, jakoje vyrablajuć na pradpryjemstvie. Marharyn źbirali čym mahli i ratavali. Usie, chto pracavaŭ na źmienie. Jon raścioksia, rastaŭ. Ja sam udzielničaŭ u zbory hetaha rastałaha marharynu. Ja sam jaho źbiraŭ. Ja bačyŭ na ŭłasnyja vočy, što tam adbyvałasia. Tam byŭ nie tolki marharyn, ale i droždžy», — apaviadaje Uładzimir Tryzunoŭ.
Pa jahonych słovach, marharyn źbirali ŭ bočki, čany, a paśla vykarystoŭvali, choć pa normach jon pavinien zachoŭvacca ŭ chaładzilnikach.
Na samim pradpryjemstvie situacyju z rastałym marharynam kamientavać admaŭlajucca. Udakładnić pryčynu zvalnieńnia Uładzimira Tryzunova taksama nie ŭdałosia. U pracoŭnaj knižcy aktyvista paznačana, što jon zvolnieny za prahuł.
Kamientary