U abaronu Śviatoha Jazepa

Sprava klaštaru bernardynaŭ, jaki haradzkija ŭłady sa zhody Minkultury majuć prystasavać pad hatelny kompleks, imkliva nabiraje abaroty. Navukova — metadyčnaja rada pa pytańniach historyka —kulturnaj spadčyny pry Ministerstvie kultury 18 krasavika ŭchvaliła hety prajekt. Abaroncy klaštaru, u svaju čarhu, rychtujucca da aktyŭnaj abarony.

U minułuju subotu načalnik upraŭleńnia pa achovie historyka‑kulturnaj spadčyny i restaŭracyi Ministerstva kultury Vasil Abłamski paviedamiŭ žurnalistam, što ŭ Ministerstva prajektnyja prapanovy ab rekanstrukcyi abjektaŭ byłoha klaštaru bernardynaŭ nie pastupali. Pry hetym jon abvierhnuŭ infarmacyju pra toje, što budynak planujecca prystasavać pad hatelny kompleks.

Aktyvisty ruchu abarony pomnikaŭ rascanili heta, jak časovuju pieramohu, jakuju, adnak, treba macavać. Staršynia Tavarystva achovy pomnikaŭ Źmicier Kaśpiarovič pieraściaroh, što ŭłady nia raz užo nibyta sastupali, kab potym davieści zadumanaje da kanca. Što i adbyłosia nieŭzabavie.

Užo ŭ sieradu 18 krasavika vyjaznaja navukova‑metadyčnaja rada pa pytańniach historyka‑kulturnaj spadčyny pry Ministerstvie kultury ŭchvaliła pieradprajektnuju prapanovu pa rekanstrukcyi i prystasavańni budynkaŭ byłoha klaštaru bernardynaŭ u hatelny kompleks. Aŭtary prajektu — specyjalisty pradpryjemstva «Mienskprajektrestaŭracyja». Jany miarkujuć aktyŭna vykarystoŭvać padziemnuju prastoru dla raźmiaščeńnia parkoŭki, spartova‑azdaraŭlenčaha dziełavoha centraŭ. Dvarovuju prastoru abiacajuć zachavać.

Aŭtary prajektu admovilisia ad pieršapačatkovaj idei vykarystańnia škła ŭ afarmleńni fasadaŭ, niecharakternaj dla taho času linii «łamanych» dachaŭ.

U sieradu na telekanale ANT byŭ pakazany zaspakojvajučy siužet, u jakim prajekt rekanstrukcyi padajecca jak całkam biasškodny.

Źmicier Kaśpiarovič miarkuje, što hety adnačasovy dazvoł Minkultu i paśpiešlivaja lehitymizacyja barbarskaha prajektu ŭ dziaržaŭnych ŚMI śviedčać pra imknieńnie ŭładaŭ davieści zadumanaje da kanca. Ciapier abaroncy klaštaru pavinnyja vykanać usie jurydyčnyja pracedury. Adnak, kali heta nia daść plonu i pracy ŭsio ž raspačnucca, daviadziecca pierachodzić da bolš aktyŭnych dziejańniaŭ, kaža staršynia Tavarystva achovy pomnikaŭ. Varta adznačyć, što katalickija vierniki Miensku sabrali ŭ abaronu śviatyni bolš za dziesiać tysiačaŭ podpisaŭ. Štodzionna a 18:20 na prystupkach kaścioła Śv. Jazepa (vuł. Kiryła i Miatoda, 4) prachodziać malitvy za viartańnie kaściołu. Dziejničaje admysłovy sajt, jaki akumuluje ŭsiu infarmacyju pra akcyju. Na Radaŭnicu na prystupkach budynku kaściołu prajšła akcyja salidarnaści z adabranym u katalikoŭ kaściołam.

Sp. Kaśpiarovič miarkuje, što adnaho tolki zboru podpisaŭ niedastatkova: «Kali b u abaronu kaściołu nia tolki padpisalisia tysiačy ludziej, ale j vyjšli jaho baranić, to ź viernikami musili b ličycca». Kaściolnym uładam taksama čas dałučacca. Dla ich było b dobrym šturškom, kali b u Miensk pačali pryjazdžać kataliki z usioj Biełarusi, kaža Źmicier. Adnak kaściolnyja ŭłady pakul nie navažvajucca na kanflikt z uładami.

Supracoŭnik katalickaha vydaviectva «Rro Christo» Mikoła Hrakaŭ tłumačyć heta palitykaj biełaruskaha Kaściołu, jakaja nie praduhledžvaje vynasu prablemaŭ, kštałtu pytańnia viartańnia katalikam kaściołu śv. Jazepa, na ŭsieahulnaje abmierkavańnie śvieckich i katalickich uładaŭ. Heta źviazana ź siońniašniaj sytuacyjaj vakoł kaściołu i niežadańniem kaściolnych jararchaŭ dalej jaje abvastrać.

• 0
• 0
• 0
• 0
• 0
• 0
• 0
• 0