Paštovaja skrynka
Arciomu A. ź Viciebsku. «Piać ružaŭ» — praniźlivaja reč, ale mova jašče Vam nie dajecca.
Siarhieju B. z Homiela. A dzie ž «die modernen Sagen»? Dziońnik nia moža być samametaj. Tolki toje, što nielha nie zapisać, vartaje zapisu.
Uładzisłavu I. ź Viciebsku. Mała pišam, bo Vy nia pišacie. Dumki z dopisu paŭtarajuć idei Elizabet Badenter, uryvak z bestseleru jakoj «ChY. Mužčynskaja sutnaść» my drukavali ŭ 1997 hodzie. Mačyscki kodeks pavodzinaŭ i hamafobskaja idealohija isnujuć, i ŭžo hetym jany nam cikavyja, a hramadztvu karysnyja. Cenzuravać aŭtaraŭ my nia budziem.
Tacianie K. Internet stvaraje novuju myślenčuju sytuacyju: praŭdu stanovicca vielmi ciažka adroźnić ad niapraŭdy. Bo niemahčyma kantralavać aŭtarstva, bo kolkaść infarmacyi pieravyšaje krytyčnuju i nijakaja cenzura ci kvazycenzura niemahčymyja. Tamu kali ŭ Internecie pišuć, što «kamunisty jaduć dziaciej», ludzi nia vierać, bo jany bačyli šmat kamunistaŭ. Kali ž pišuć «amerykancy skidajuć na Juhasłaviju ŭranavyja bomby», dyk sioj-toj vieryć, bo, jak śćviardžajecca ŭ adnym ź pierakładaŭ «Pryhodaŭ Alisy ŭ krainie cudaŭ», «jon nie znajomy z pavadkami ichtyjazaŭraŭ».
Valerju S. ź Bieraścia. Heta ciapier u Biełarusi i pad inšymi takimi režymami ludzi hinuć tysiačami — bo niama čym lačyć, a tysiačy naradžajucca z strašnymi chvarobami — bo niama reaktyvaŭ, kab heta ŭ svoj čas pieradhadać, a miljony śpivajucca — bo nia majuć nadziei na dolu. A Vy nahladzielisia čužoha telebačańnia, i paŭtarajecie za imi. Hladzicie ž taksama polskuju TV, spadarožnikavyja eŭrapiejskija kanały, paraŭnoŭvajcie toje, što bačycie. Vojska, tankaŭ i samalotaŭ u pieraliku na čałavieka ŭ nas užo ciapier najbolš u Eŭropie, a tołku najmienš, a vy prapanujecie jašče vojska ŭzmacniać. Kali Vaš nastaŭnik vieryć u žydamasonskasyjanisckija zmovy, dyk jon prosta durny.
Jurju K. z Tryjestu. U elektronnym listavańni zručna karystacca biełaruskaj łacinkaj abo jaje «biezhačkovymi» varyjantami. Było b cikava, kab vy napisali, što dumajecie pra padziei ŭ Juhasłavii. Elektronnyja adrasy biełaruskich vydańniaŭ nastupnyja:
«Naviny» http://www.belarus.net/MassMedia/Newspaper/Svaboda/
«Arche» http://arche.home.by
«Biełaruski histaryčny ahlad» http://members.xoom.com/belhista abo http://pagina.de/bha
«Archiŭ najnoŭšaj historyi» http://members.xoom.com/_anh_
Pobač možna znajści j inšyja vydańni.
Adasiu Ł. ź Miensku. Hieroj apaviadańnia, «dziejnaja asoba kirmašovaha času», nie ŭjaŭlaje cikavaści.
Jurasiu B. ź Miensku. Ci možna dva razy adnym i tym samym palcam pakałupacca ŭ adnym i tym samym nosie?
Viktaru M. ź Miensku. Pasprabujcie napisać artykuł, ni razu nia ŭžyŭšy słovaŭ «treba» i «musim».
Źmitru S. ź Miensku. «...sens neŭtralizacyi nabyćcia lehitymnaści Łukašenkam — majstram plebiscytarnaj mabilizacyi elektaralnych masaŭ» — heta ž dysertacyja.
Kamientary