Pavał Sieviaryniec. Małady front pieramienaŭ

Małady front pieramienaŭ

Chvala čutak i prahnozaŭ napiaredadni Sojmu Maładoha Frontu ŭściešvaje. Toje, što my čarhovy raz apynajemsia ŭ centry ŭvahi, jašče raz śćviardžaje rolu siońniašniaha MF u nacyjanalnym ruchu i ŭvohule Biełarusi. Nievypadkova, što sprečki razharelisia mienavita pierad prahramnym Sojmam 1 lipienia. Heta zakanamiernaść staleńnia, jakoje pieražyvaje Małady Front. Heta napružańnie j bol pieraradžeńnia. Paśla burnaj i jarkaj evalucyi 1996—2000 h., epochi stvareńnia j stanaŭleńnia, niepaźbiežna nadychodzić pakutlivy j vyrašalny vybar dalejšaha šlachu. Albo kanservacyja ŭ svajoj užo zaniataj utulnaj nišy (jana ź ciaham času robicca trunoj), albo pieraŭtvareńnie ŭ štości bolšaje, uzrastańnie j raźvićcio, jakoje patrabuje voli, vysiłkaŭ i vielizarnaj adkaznaści.

Nia budu ŭstupać u publičnuju dyskusiju sa svaimi siabrami j kalehami adnosna taho, što nas p a d ź ja ł ja je. Lepš zasiarodzicca na tych momantach, jakija ja d n a ju c siońnia ŭvieś Małady Front. Tut prapanujem uvazie čytačoŭ «NN» klučavyja frahmenty 10-staronkavaha prajektu «Małady Front pieramienaŭ», napisanaha da III Sojmu MF.

Staleńnie Maładoha Frontu

Biełaruś čakaje pieraŭtvareńniaŭ. Kraina prahnie źmienaŭ, i ŭsio hramadztva spadziajecca na maładych, źviazvaje abnaŭleńnie j Adradžeńnie ź junymi pakaleńniami.

My — Małady Front pieramienaŭ, jakich čakaje kraina. My — śvietapohladny front duchovaha abudžeńnia, jaki naradžaje ŭ spustošanych maładych dušach vieru j luboŭ, adčuvańnie svabody j adkaznaści, prahu dziejańnia j nacyjanalnuju salidarnaść. Małady Front — nia linija akopaŭ na miažy z Rasiejaj, nia vuličny bataljon u vajnie z asobna ŭziatym Łukašenkam, a dabravolnaje apałčeńnie biełaruskaj moładzi suprać dyktatury j imperyi, usiaho zła j biezduchoŭnaści ŭ dziaržavie j hramadztvie.

Małady Front prajšoŭ zakanamierny evalucyjny šlach ad stychijnaha vychadu na masavyja manifestacyi, praz vuličny radykalizm, palityčnaje šoŭ i ściob, praz kulturnictva i hramadzkaje pašyreńnie da ciapierašniaha idealahičnaha staleńnia j šmatvobraznaści dziejańnia. Na praciahu apošnich hadoŭ Małady Front znachodziŭsia ŭ epicentry zmahańnia za Biełaruś, u avanhardzie maładziovych nastrojaŭ, i razam ź im mianiałasia ŭsia niezaležnickaja moładź. Z štatnaj frakcyi BNF Małady Front pieratvaryŭsia ŭ najbujniejšy ruch, u jakim harmanična spałučajucca i palityčnaja aktyŭnaść, i kulturnickija akcyi, i vuličnyja manifestacyi, i infarmacyjnyja kampanii.

Razam z tym siońnia Maładomu Frontu samomu patrebnyja ŭnutranyja p je r a m je n y. Treba vyznačać dalejšyja aryjenciry dy adzinym mahutnym frontam raspačynać n a c y ja n a ł n y r u ch m o ł a d ź i pa ŭsioj krainie.

Nacyjanalny ruch moładzi

Dvanaccać hadoŭ dziejnaści BNF zakłali peŭnuju hramadzkuju bazu idejaŭ niezaležnaści, eŭrapiejskaści, biełarusizacyi. Takija idei ŭspryniatyja, zasvojenyja ci chacia b prysutnyja siarod balšyni moładzi. Siońnia Małady Front paklikany ŭžo raspracoŭvać madeli budučych reformaŭ i abudžać krainu dziela duchovaha Adradžeńnia. Tolki adkryty, mocny j papularny Nacyjanalny Ruch moža stać samim žyćciom i vobrazam dziejańnia siońniašniaje biełaruskaje moładzi.

Nacyjanalny Ruch Moładzi — heta supołki j aktyvisty ŭ kožnaj škole, vučelni, fakultecie; efekt prysutnaści MF u kožnym dvary j miastečku; praniknieńnie ŭva ŭsie maładziovyja asiarodki j sfery, paŭsiul, dzie tolki možna.

Nacyjanalny Ruch Moładzi — heta zaŭsiodnaja kaardynacyja ahulnych dziejańniaŭ pamiž usimi biełaruskimi niezaležnickimi maładziovymi arhanizacyjami, najšyrejšaje supracoŭnictva i ŭzajemadapamoha dziela Biełarusi.

Zadača Nacyjanalnaha Ruchu Moładzi ŭ perspektyvie demakratyčnych reformaŭ — pieratvareńnie ŭ najbujniejšuju, raźličanuju na niekalki socień tysiačaŭ čałaviek systemu nacyjanalnych prahramaŭ i inicyjatyvaŭ ad adukacyi da zaniataści, ad šoŭ-biznesu da ekalohii.

Siońnia asnoŭny ciažar abjadnaŭčaje pracy musić brać na siabie mienavita Małady Front — pryznany arhanizacyjny j idealahičny lider biełaruskaje niezaležnickaje moładzi, front płyniaŭ, strukturaŭ i inicyjatyvaŭ z maksymalnym hieahrafičnym, sacyjalnym i idealahičnym dyjapazonam, abjadnany nacyjanalnaj idejaj, chryścijanskimi kaštoŭnaściami dy imknieńniem da poŭnamaštabnych pieramienaŭ.

Nacyjanalnaja ideja

Nacyjanalnaja ideja — heta misija, nakanavańnie, sens isnavańnia narodu. Spaznańnie hetaha najvyšejšaha, Boham dadzienaha nakanavańnia, uśviedamleńnie svajoj unikalnaści j niepaŭtornaści, svajho pryznačeńnia mienavita na hetaj ziamli, u hety čas i jość nacyjanalnaj idejaj. Z pačućcia nacyjanalnaje samatojesnaści vynikajuć i luboŭ da rodnaje krainy, i pavaha da inšych narodaŭ, i razumieńnie svajoj adkaznaści pierad tymi, chto byŭ, za tych, chto budzie paśla.

Administracyjnaj biełarusizacyi 1992-94 h. akazałasia dla viartańnia nacyjanalnaje śviadomaści niedastatkova. Siońniašni čas vymahaje ad nas našmat bolš hłybokaje j šmatvobraznaje śvietapohladnaje dziejnaści, ažyćciaŭleńnia sapraŭdnaha D u ch o v a h a A d r a d ž e n n ja. Zadača novaha, našaha pakaleńnia niezaležnickaha ruchu — abudzić samaje śviatoje ŭ dušach i sercach moładzi, dajści da pieršakrynicaŭ nacyjanalnaha pačućcia.

Biełaruski nacyjanalny ruch unikalna chryścijanski ŭ svajoj sutnaści. Heta jaskrava vyražana i ŭ našych śviatych symbalach — bieł-čyrvona-biełym ściahu Chrysta, biełaj pałatninie z kryvioju ŭkryžavanaha Isusa, u duchovym himnie «Mahutny Boža», u «Pahoni» z kryžom Eŭfrasińni na ščycie — i ŭ pieramozie biełaruskaha duchu nad złom usich akupacyjaŭ, vojnaŭ, imperyjaŭ i dyktaturaŭ. Hetaje najvyšejšaje vymiareńnie nacyjanalnaje idei viadzie nas i ŭ achviarnym zmahańni za našu krainu, i ŭ štodzionnaj pracy siarod ludziej, nadaje nam tryvałaści, čyścini j viery tam, dzie dla inšych baluča, brudna ci strašna. Voś čamu dla nas BIEŁARUŚ — HETA ŚVIATOJE.

Naš vobraz Biełarusi

Małady Front bačyć našuju krainu nia prosta siarednieeŭrapiejskaj i demakratyčnaj. Nam patrebnaja V ja ł i  k a ja B je ł a r u s . Małady Front — ZA BIEŁARUŚ jak stratehičny most pamiž Zachadam i Rasiejaj, miž Eŭropaj i Ŭschodam, navukovy, technalahičny, servisny j infarmacyjny centar suśvietnaha ŭzroŭniu, taki, jak Belhija, Synhapur ci Kalifornija; najbujniejšy finansavy rynak miž Azijaj i Eŭropaj. ZA BIEŁARUŚ — ahmień kultury, upłyvy jakoha siahajuć na pałovu kantynentu, za d u ch o v a je s e r c a Ŭschodniaj Eŭropy, prastoru śviatła, viery j lubovi ŭ miescy sustrečy chryścijanskich kanfesijaŭ.

Maładafrontaŭcy ŭžo siońnia paklikanyja prapanoŭvać hramadztvu vobraz pieramienaŭ u samich sabie, ahitavać ułasnym prykładam. Zaŭtrašniaja Biełaruś — heta my sami. Tamu my pačynajem pieramieny tut i ciapier, kožny ź siabie samoha: budźma ščyrymi j adkrytymi, mocnymi j rašučymi, upeŭnienymi j sumlennymi, i tolki tady stanie realnaściu naš MAŁADY FRONT PIERAMIENAŬ.

Pahrozy

NIANAVIŚĆ. Nianaviść da Łukašenki, Rasiei, amonaŭcaŭ ci svaich «nieśviadomych» suajčyńnikaŭ nie pavinna rabicca asnoŭnym ruchačom maładziovaha supracivu. Sutnaść nacyjanalnaha ruchu moładzi — u svabodzie j praŭdzie, viery j lubovi, i mienavita hetyja siły viaduć nas u zmahańni za nacyjanalnuju ideju. My zmahajemsia nia suprać kahości, a ZA Biełaruś.

ABMIEŽAVANAŚĆ. Abmiežavanaje razumieńnie roli MF u siońniašnim nacyjanalnym ruchu moža pryvieści da imknieńnia ŭładkavacca ŭ «svajoj» utulnaj nišy (naprykład, «my kanservatary», «my kulturniki» abo «my radykały»). Adsiul, ad abmiežavanaści, i nieciarpimaść asobnych hrupaŭ moładzi ŭnutry ruchu, jakoj nieabchodna paźbiahać. Sens ahulnabiełaruskaha nacyjanalnaha ruchu ŭ tym, kab arhanizacyjna j duchova abjadnać usie mahčymyja maładziovyja płyni j hrupy na asnovie nacyjanalnaje idei. MF zajmajecca i hramadzkaj dziejnaściu, i palityčnymi pytańniami; u MF jość miesca ŭsim, ale pry hetym u centry ŭvahi, u stryžni idealohii pavinna stajać vyraznaja systema kaardynataŭ: imknieńnie ŭ Eŭropu, niezaležnaja dziaržava, pieramieny ŭ hramadztvie, chryścijanskija pryncypy. Nijakaja z maładziovych arhanizacyjaŭ, aproč MF, siońnia nia ŭ stanie zadzinočyć biełaruskuju moładź u nacyjanalny ruch. Kali nia my, dyk chto?

ABYJAKAVAŚĆ. Mnohija, śpiarša junyja dy haračyja, rasčaroŭvajucca ŭ adsutnaści chutkaha efektu, robiacca abyjakavymi dy spustošanymi, adychodziać ad spravaŭ albo praciahvajuć kvoła varušycca «pa inercyi» ci «pa zvyčcy»: «usio roŭna ničoha nie mianiajecca». Tym časam Biełaruś mianiajecca — pavoli, ale ŭpeŭniena. Treba staleć i razumieć, što sapraŭdnaja niezaležnaść i duchovaje Adradžeńnie nikoli nie dajucca lohka, za paru hadoŭ. My maładyja, poŭnyja siłaŭ, za nami budučynia, i mienavita na nas lažyć adkaznaść za pieramieny ŭ hramadztvie. Kožnaja chvilina, kožny dzień našaha zmahańnia musiać nabližać nas da pieramohi. U taki čas niedapuščalna rassłablacca, dramać ci spadziavacca na inšych. Budźma ž zaŭždy badziorymi, čujnymi, mocnymi aptymistami — i moładź za nami pojdzie!

Małady Front — napierad!

Pavał Sieviaryniec, staršynia Maładoha Frontu