BT vačyma biełarusa
Čykin – kamunizm ci telebačańnie?
Kiraŭnik Kamunistyčnaj Partyi Biełarusi Viktar Čykin usio jašče znajomicca z abstanoŭkaj na novym froncie pracy — nacyjanalnym telebačańni. Dahetul usie redakcyi (akramia, viadoma, ATN) znachodziacca ŭ «padviešanym» stanie j nia viedajuć dakładna svajoj budučyni. Stała viadoma tolki, što ŭ BT-šnym efiry mohuć źjavicca mienskija naviny ad STV, što vychodziać na 8-m kanale. Značyć, jašče adnoj rasiejskamoŭnaj prahramaj na BT stanie bolš. Naŭrad ci Čykin ź Zimoŭskim zapatrabujuć ad STV dziela vychadu na BT na biełaruskuju movu pierajści.
Cikava, ci budzie jakaja reakcyja Čykina na subotni pakaz (zaplanavany jašče da jaho prychodu) histaryčnaha filmu Martyna Skarseze «Kundun». Choć sam Čykin u kino raźbirajecca mała, ale jak ža bratniaja KPK?! Film ža pra barbarski zachop kamunistyčnym Kitajem niezaležnaha Tybietu!
Prablema nie takaja nadumanaja, jak moža zdacca. Pad čas červieńskaha pakazu ŭ Miensku tajvańskich filmaŭ kitajskaja ambasada spačatku patrabavała mierapryjemstva zabaranić, potym pa kinateatry «Pijaner» usie dni pakazu snavali kitajskija ahienty, sočačy, kab na plakatach ź vidami pryrody nie było słovaŭ «Kitajskaja Respublika Tajvań», a taksama, ci nie zavitaje siudy chto z kitajskich studentaŭ. A tut pa telebačańni «siabroŭskaj krainy», dzie kiraŭnikami — lepšyja idealahičnyja siabry, dzie kujecca dziasiataja častka zbroi dla kitajskaj narodnaj armii, hetkaja antykitajskaja dyversija! Tak što kitajcy heta naŭrad ci spakojna prahłynuć.
U niadzielu vyjšaŭ pieršy blok prahramaŭ Mižnarodnaha Francuskaha Telekanału ŭ pierakładzie na biełaruskuju. Za bratoŭ Lumjer i multfilm pra multfilmy — dziakuj, pra roznych žyviolinaŭ — zaŭsiody cikava, ale, dumaju, śpiavačka taja — małaviadomaja, sastarełaja (u sensie — nie sučasnaja j nie vialikaja muzyka), i ŭ papularnaści na teleekranie pustynnamu katu značna sastupaje. Chacia, jak prykład francuskaha šansonu — moža być. C'est la vie, a praciah budzie.
Arciom Łukjanovič
Ciapier čytajuć
Prapahandysty pakazali mocna schudniełaha Vasila Vieramiejčyka13
Kamientary