Pazytyvy

Pazytyvy

Ci paceliŭ?

Raspavioŭ mnie ŭ elektryčcy adzin vielmi daśviedčany dziadok, što ŭ Indyi nie pieravialisia jašče sapraŭdnyja johi. To nibyta jahony ziać jeździŭ handlavać i bačyŭ, jak šukajuć jany asałody: vočy zapluščyć, pakładzie palec na kamień, a druhim kamianiom dy pa palcy – jak daść. “A asałoda kali?” — “Asałoda – kali nie paceliš”, — adkazali jamu majstry medytacyi.

Kali paviedamili, što z 14 vieraśnia naš Nacbank “budzie rabić toje, što robić centrabank luboje narmalnaje krainy”, vaš karespandent zadumaŭsia. Atrymlivajecca što: da hetaha času kraina była nienarmalnaj albo Nacbank? Kali ž bank razam z krainaj usio ž aprytomnieli i viarnulisia da naturalnaha stanu, navošta heta abviaščać “liberalizacyjaj”, a nie vypraŭleńniem čyjojści pamyłki, kancom chvaroby?

Darečy, čamu hetkaj “liberalizacyi”, biaz volnaha handlu i pryvatnaje ŭłasnaści na ziamlu, radujucca niekatoryja “abjadnanyja apazycyjanery”? I što z adzinaha kursu mnie i da mianie padobnym abyvatalam?

Tak, zamiežnyja partnery pačnuć lepš razumieć sytuacyju našych pradpryjemstvaŭ. I biełaruski haspadarnik pierastanie pradavać pad prymusam svaje dalary za biascenak, dy nia budzie buhaltar unosić u balans niejkuju chłuśniu zamiest sapraŭdnaha koštu valuty. Mo, krychu pamienšaje barter i źviazanyja ź im kradziažy. Praz heta niekali moža i zarobki pabolšajuć?

Krainie nieabchodnyja efektyŭnyja pradpryjemstvy, aryjentavanyja na ekspart. Kab ekspart u krainie ź pierachodnaj ekanomikaj byŭ plonny, treba mieć nizki kurs nacyjanalnaj valuty, i Nacbank musić kuplać dalary. Imaviernaść taho, što hramadzianie pačnuć raptoŭna pazbaŭlacca svaich dalaraŭ, nievialikaja. Kab kuplać dalary ŭ pradpryjemstvaŭ, Nacbanku treba mieć biełaruskija rubli. A jany ž tak patrebnyja na kałhasy, pałacy, specnazy... Chiba novych nadrukavać.

Čamu kurs dalara paśla liberalizacyi valutnaha rynku musić pačać raści valniej, čym zarobki, a rost cenaŭ zapavolicca da 2,5% na miesiac, niajasna.

Viadomy hety sakret chiba “Navukova-kansultacyjnaj radzie pa pytańniach biaśpieki Sajuzu” (staršynia – były kamsamolec B.Pastuchoŭ, namieśnik jahony, B.Bikinien – namieśnik biełaruskaha ministra pa nadzvyčajnych sytuacyjach). Hety sajuzny siłavy orhan cichieńka źjaviŭsia taksama 14 vieraśnia, kab sarvać “plany ŭtvareńnia bufernaj zony pad ehidaj NATO pamiž Eŭropaj i Rasiejaj” i procidziejničać “destrukcyjnym siłam u dźviuch dziaržavaŭ”. Vo jak: rada — adnaje dziaržavy, a biełaruski pradstaŭnik u joj havoryć pra destrukcyjnyja siły “dźviuch”.

Nivodny joh praŭdy nie daciamić. A to – dalar...

Michał Zaleski