Пазытывы
Ці пацэліў?
Распавёў мне ў электрычцы адзін вельмі дасьведчаны дзядок, што ў Індыі не перавяліся яшчэ сапраўдныя ёгі. То нібыта ягоны зяць езьдзіў гандляваць і бачыў, як шукаюць яны асалоды: вочы заплюшчыць, пакладзе палец на камень, а другім камянём ды па пальцы – як дасьць. “А асалода калі?” — “Асалода – калі не пацэліш”, — адказалі яму майстры мэдытацыі.
Калі паведамілі, што з 14 верасьня наш Нацбанк “будзе рабіць тое, што робіць цэнтрабанк любое нармальнае краіны”, ваш карэспандэнт задумаўся. Атрымліваецца што: да гэтага часу краіна была ненармальнай альбо Нацбанк? Калі ж банк разам з краінай усё ж апрытомнелі і вярнуліся да натуральнага стану, навошта гэта абвяшчаць “лібэралізацыяй”, а не выпраўленьнем чыёйсьці памылкі, канцом хваробы?
Дарэчы, чаму гэткай “лібэралізацыі”, бяз вольнага гандлю і прыватнае ўласнасьці на зямлю, радуюцца некаторыя “аб’яднаныя апазыцыянэры”? І што з адзінага курсу мне і да мяне падобным абываталям?
Так, замежныя партнэры пачнуць лепш разумець сытуацыю нашых прадпрыемстваў. І беларускі гаспадарнік перастане прадаваць пад прымусам свае даляры за бясцэнак, ды ня будзе бугальтар уносіць у балянс нейкую хлусьню замест сапраўднага кошту валюты. Мо, крыху паменшае бартэр і зьвязаныя зь ім крадзяжы. Праз гэта некалі можа і заробкі пабольшаюць?
Краіне неабходныя эфэктыўныя прадпрыемствы, арыентаваныя на экспарт. Каб экспарт у краіне зь пераходнай эканомікай быў плённы, трэба мець нізкі курс нацыянальнай валюты, і Нацбанк мусіць купляць даляры. Імавернасьць таго, што грамадзяне пачнуць раптоўна пазбаўляцца сваіх даляраў, невялікая. Каб купляць даляры ў прадпрыемстваў, Нацбанку трэба мець беларускія рублі. А яны ж так патрэбныя на калгасы, палацы, спэцназы... Хіба новых надрукаваць.
Чаму курс даляра пасьля лібэралізацыі валютнага рынку мусіць пачаць расьці вальней, чым заробкі, а рост цэнаў запаволіцца да 2,5% на месяц, няясна.
Вядомы гэты сакрэт хіба “Навукова-кансультацыйнай радзе па пытаньнях бяспекі Саюзу” (старшыня – былы камсамолец Б.Пастухоў, намесьнік ягоны, Б.Бікінен – намесьнік беларускага міністра па надзвычайных сытуацыях). Гэты саюзны сілавы орган ціхенька зьявіўся таксама 14 верасьня, каб сарваць “пляны ўтварэньня буфэрнай зоны пад эгідай NATO паміж Эўропай і Расеяй” і процідзейнічаць “дэструкцыйным сілам у дзьвюх дзяржаваў”. Во як: рада — аднае дзяржавы, а беларускі прадстаўнік у ёй гаворыць пра дэструкцыйныя сілы “дзьвюх”.
Ніводны ёг праўды не дацяміць. А то – даляр...
Міхал Залескі
Цяпер чытаюць
Прапаганда прычапілася да «дарагога» гадзінніка Латушкі. Той расказаў, што гэта за мадэль насамрэч18
Каментары