№ 48 (205), 27 listapada — 4 śniežnia 2000 h.
Ziemlatrus u Azerbajdžanie
Jak i sorak hadoŭ tamu, azerbajdžanskija ŭłady chavajuć kolkaść ludzkich achviaraŭ apošniaha ziemlatrusu j realnyja pamiery razbureńniaŭ.
U noč z suboty na niadzielu ŭ Azerbajdžanie adbyŭsia mocny ziemlatrus. Jahonaje recha prakaciłasia pa ŭsim Uschodnim Kaŭkazie. Pačaŭsia jon uviečary, 25 listapada, za 75 kilametraŭ ad Baku, u akvatoryi Kaśpijskaha mora, dzie mahutnaść šturškoŭ składała da 7 z pałovaju bałaŭ pavodle škały Rychtera. Šturški adčuvalisia i ŭ Dahiestanie, dzie ŭ Machačkale zafiksavali 4 bały, a ŭ Izberbašy - 5 bałaŭ. U samoj azerbajdžanskaj stalicy u 21.15 siła siła ziemlatrusu była ad 5 da 6 bałaŭ.
Ludzi ŭ panicy pakidali šmatpaviarchovyja damy, u jakich šturški adčuvalisia najmacniej. U centry Baku zhasła śviatło j pierarvałasia telefonnaja suviaź. U niadzielu ranicaj ministar achovy zdaroŭja Azerbajdžanu Ali Insanaŭ, vystupajučy ŭ telebačańni ŭ ekstrannym vypusku navinaŭ, paviedamiŭ, što zahinuli 3 čałavieki. Jon ža skazaŭ, što ahułam 53 čałavieki atrymali ranieńni roznych stupieniaŭ, 33 ź ich špitalizavanyja. Insaraŭ abvierhnuŭ paviedamleńni pra toje, što jašče niekalki čałaviek skanali ad infarktaŭ. Jon ža zapeŭniŭ, što bolš padziemnych šturškoŭ nie čakajecca.
Tymčasam niezaležnyja azerbajdžanskija medyi śćviardžajuć, što kolkaść achviaraŭ našmat bolšaja. Pavodle papiarednich źviestak, zahinuli sama mieniej 24 čałavieki. A rasiejskaje ahienctva ITAR-TASS pajedamiła, što pamierli 8 čałaviek.
U ŚMI zhadvajuć hetki ž mahutny ziemlatrus, što adbyŭsia tamsama 40 hadoŭ nazad. Kolkaść zahinułych taksama ličyli dziasiatkami, ale dakładnaje ličby nichto nia viedaje j dasiul. Ułady schavali praŭdu. Hiejdar Alijeŭ tady byŭ prostym aficeram KHB. Napeŭna, spyniać čutki taksama było ŭ jahonaj kampetiencyi. I voś historyja paŭtarajecca. Adno tolki što Alijeŭ ciapier maje našmat bolšyja mahčymaści. Jak prezydent krainy.
Hary Kumaniecki
Kamientary