AB USIM PATROCHU

 AB USIM PATROCHU

represii za miesiac

Bieźlič sudoŭ

Prychod treciaha tysiačahodździa dy novaha Kryminalnaha kodeksu nie spyniŭ mašyny palityčnych represijaŭ.

Alesiu Abramoviču dali štraf u 500 dalaraŭ za arhanizacyju ŭ listapadzie minułaha hodu šeścia pracoŭnych Barysaŭskaha škłozavodu, što strajkavali.

U Voršy zatrymali Alaksandra Stalarova, staršyniu Svabodnaha prafsajuzu pradprymalnikaŭ Voršy. Jon raspaŭsiudžvaŭ infarmacyjny biuleteń “Za pieramieny”.

Suprać V.Ščukina ŭzbudzili kryminalnuju spravu za chulihanstva.

16 studzienia na centralnaje płoščy Barysava siabry Narodnaje Hramady dy Maładoje Hramady Aleś Abramovič, Alesia Jasiuk, Nadzieja Hračucha, Źmicier Kuźniacoŭ dy Michał Kuźniacoŭ patrabavali medyčnaje ekspertyzy Łukašenki. Apošnim dvum pikietoŭščykam ničoha nie pahražaje, bo jany padletki, a voś inšym “šyjuć kryminał” pavodle art.368 KK (“Źniavaha prezydenta”). Ciapier im pahražaje pazbaŭleńnie voli na dva hady.

Apisali majomaść siabra Hielsynskaha kamitetu Alaksieja Katlarova, adnaho z arhanizataraŭ Maršu Svabody-2000. Zabrali ŭvieś nabytak na zapłatu štrafu ŭ 150 “minimałak”.

U Bieraści zasudzili pravaabaroncaŭ, što adznačali Dzień pravoŭ čałavieka ŭ Bieraści. Jaŭhienu Białasinu, Siarhieju Bachunu, Uładzimieru Vialičkinu, Kiryłu Dańku, Alehu Dydyšku dali štraf. U Viciebsku za toje samaje dali štrafy Alenie Zaleskaj dy Siarhieju Vasienku, a Źmitru Muskamu dy Anatolu Zacharavu — papiaredžańni.

Adziny, chto vyčuchaŭsia z sudu, — Uładzimier Kiškurna. 15 vieraśnia jaho zatrymali milicyjanty, a 10 studzienia sud pryznaŭ ichnyja dziejańni niezakonnymi.

Aleś Kudrycki pavodle infarmacyi PC “Viasna”

medyi

«Narodnaja hazieta»: histeryja z hieahrafijaj

“Narodnaja hazieta” na pieršaj staroncy nadrukavała interviju sa staršyniom padatkovaha kamitetu K.Sumaram pad zahałoŭkam “Nałohi v biełarusi nie vyšie, čiem vo mnohich druhich stranach”. Biełaruś pišuć užo z maleńkaj litary.

Praz dva dni pad rubrykaj “Aficyjna” ŭ “NH” źjaviŭsia zahałovak “Internet jak srodak masavaha paklopu”. A pobač z hetym aficyjnym paviedamleńniem (pra kryminalnuju spravu suprać “Našaj Svabody” za publikacyju dyjahnazu) hazeta nadrukavała interviju z A.Špileŭskim – “V Strasburhie budut zvučať arhumienty”. Adnak žurnalistka “NH” nia viedała, što Strasburh – heta Francyja, tamu zapytała: “Budiet li v Šviejcarii obsuždaťsia problema priezidientskich vyborov?” Sp.Špileŭski, vidać, taksama nia viedaŭ, što jedzie ŭ Francyju. Jahony adkaz na švajcarskaje pytańnie pačynaŭsia hetak: “V Strasburh prihłašieny tri priedstavitiela, nie vošiedšije v parłamient Riespubliki Biełaruś: Hončarik, Domaš i Čihiŕ – tak nazyvajemaja nomienkłaturnaja oppozicija”.

A.Łukašenka, miž inšym, vandroŭki svaich “pałacioraŭ” nie ŭchvalaje dy zajaviŭ, što zekanomlenyja na eŭrapiejskich turne hrošy treba “addać ludziam na leki”. Mo heta reakcyja na znakamituju publikacyju ŭ “Našaj Svabodzie”?

Źmicier Kalaradzki

BPSaŭcy schadzili ŭ teatar

25 studzienia kala tryccaci siabroŭ Biełaruskaj Partyi Svabody byli zaŭvažanyja ŭ Kupałaŭskim teatry. Na scenie pakazvali ŭsio jašče aktualnych Kupałavych “Tutejšych” z duškam Manajevym u roli nieŭmiručaha Mikicija Znosiłova. Kali ž naprykancy pjesy z-pad sceničnaha pradońnia pad teatralny kupał uźnialisia try pałatniny koleru nacyjanalnaha ściaha i aktory vyjšli na pakłon, bepeesaŭcy razyhrali svaju scenku: spačatku ŭ parter palacieli listoŭki, potym pad voklič-zaklik “BPS – da baraćby!” i voklič-adkaz “BPS – da pieramohi!” źjavilisia nacyjanalny i partyjny ściahi. Ulotki, treba pryznać, publika raschapała nia ź mienšym impetam, čym jakuju humanitarku, čuvać było i ŭchvalnyja reakcyi na dziejańni junakoŭ. Zdajecca, što pieršaja ŭ hetym hodzie mini-pastanoŭka ŭ vykanańni siabroŭ BPS pakłała pačatak biełaruskamu palityčnamu sezonu.

Mirasłaŭ Čantarycki

Partyzan Internetu

Pisać siońnia pra Internet, ci, jak jašče kažuć purysty, «Sieciva», zdajecca mnie takoj ža nia vielmi ŭdziačnaju pracaju, jak i napisańnie strašna papularnych na pačatku 90-ch artykułaŭ pra NŁA. Usie čytajuć, ale mała chto sutykaŭsia z pradmietam tekstu sam-nasam. Kali biarusia za asadku, to zdradlivaja ruka mimavoli vyvodzić na raźlinavanaj papiery biazhłuździcu kštałtu «Sieciva -- heta adlustravańnie rečaisnaści». U hałavie imkliva pierabirajucca varyjanty, jak tak dastupna, adekvatna, u adnym abzacy rastłumačyć paspalitaj publicy fenomien hipertekstu j specyfiku abmienu źviestkami pamiž kamputarami. Ale ja siabie spyniaju. Chočacca pryvieści miljony cytataŭ ź viadomaha i niastomnaha prapahandystaha siecievaj kultury (i nia tolki jaje) Umberta Eka pra halaktyki Hutenberha. Chočacca prosta j dastupna rastłumačyć pryncyp pracy novaha kantynentu (oj-vej, jakaja zaciortaja metafara) pad nazvaju Internet. Ale ŭ toj ža momant chočacca abyścisia biez pradmovy, napoŭnienaj źviestkami, jakija možna atrymać i biez majoj dapamohi, i z kudy bolš painfarmavanych krynicaŭ.

Tym bolš, što padstavaju dla majoj zaciemki pasłužyła taja nahoda, što 1 lutaha spoŭnicca adzin hod z taho dnia, jak pačaŭ pracu na adrasie http://dt.home.by «Pieršy biełaruski partał i kataloh «Dzied Tałaš»». Arhanizavaŭ pracu hetaha resursu Januk Łatuška. Persona, na prastorach biełaruskaha sektaru piataha kantynentu davoli prykmietnaja, kali nie skazać pa-rasiejsku — pasijanarnaja. Čałaviek, jaki dałučyŭsia samym aktyŭnym čynam da stvareńnia ci nie dziasiatka internetaŭskich prajektaŭ. Prajekt «Dzied Tałaš» stvaraŭsia z davoli šlachietnaju metaju, jakaja była sfarmulavanaja stvaralnikam jak «papularyzacyja biełnetu» i «miesca, adkul, na maju dumku, pačynajecca biełaruski Internet». Što ŭ pryncypie atrymałasia. Na siońnia dzied «Dzied Tałaš» źjaŭlajecca adnym z samych papularnych biełaruskich sajtoŭ i sapraŭdy davoli mocna dapamahaje ŭ raskrutcy novych biełaruskich Internet-prajektaŭ. Za što vialiki dziakuj stvaralniku. I skazać jaho musiać jak šarahovyja karystalniki, tak i veb-majstry, ułasna, stvaralniki biełaruskaha vebu.

Kali pasprabavać vyłučyć charakternyja dla hetaha sajtu rysy, to pieršaje, što kidajecca na vočy, heta toje, što stvaralnik vielmi lubić užyvać słovy «pryvatny», «indyvidualny». Tak, heta sajt-hobi, amatarski sajt. Ale prymietnik «amatarski» zusim nie źjaŭlajecca synonimam «dyletanckaha». Jak darečy, i epitytet «prafesijny» nie zaŭsiody roŭny epitetu «jakasny». Heta žyvoje tvoryva, jakoje raźvivajecca, raście, dziakujučy namahańniam, ale zusim nie vysiłkam Januka Łatuški j kamandy stvaralnikaŭ, jakija ŭ volny čas, dla volnych ludziej zajmajucca zasialeńniem pakul jašče volnaj ad dziaržaŭnaha kantrolu prastory. Hetak ža, padłučajciesia: http://dt.home.by.

A.A.

Vovy, Vovy...

Los 15 pres-sakrataroŭ Łukašenki

Pačałosia ŭsio z Uładzimiera Niściuka, jaki byŭ pieršym pres-sakratarom Alaksandra Łukašenki jašče da prezydenckich vybaraŭ. Ciapier sp.Niściuk – namieśnik staršyni Narodnaj Hramady.

Druhim byŭ Uładzimier Jadrancaŭ, jaki praisnavaŭ na hetaj pasadzie ŭsiaho paru dzion u lipieni 1994 h., ale nazaŭždy zapomniŭsia žurnalistam tym, što, kali ahienctva “Interfaks” užo pieradavała bijahrafiju novaha premjera Michaiła Čyhira, admoviŭsia chacia b paćvierdzić fakt pryznačeńnia hetaha kiraŭnika ŭradu. Jadrancaŭ užo amal 7 hadoŭ kiruje ŭsim dziaržaŭnym radyjo.

Tolki trecim byŭ Alaksandar Fiaduta, z prapanovy jakoha i dziela jakoha zamiest narmalnaj pres-słužby stvaryli Ŭpraŭleńnie hramadzka-palityčnaj infarmacyi. Mienavita Fiaduta ŭstalavaŭ praviły składańnia asobnych śpisaŭ žurnalistaŭ na kožnaje mierapryjemstva z udziełam Łukašenki – zamiest zvyčajnaj akredytacyi pry prezydencie. Niejak u śniežni 1994 h. supracoŭniki KDB vykinuli mianie z zali na Kastryčnickaj, 5, kudy pryjechaŭ pramaŭlać Łukašenka i kudy ja trapiŭ biaź śpisaŭ. Paśla ŭ jakaści kampensacyi sp.Fiaduta ŭklučyŭ majo proźvišča ŭ śpis žurnalistaŭ, jakija aśviatlali pieršy zamiežny vizyt biełaruskaha prezydenta – u Kitaj. Hetkim čynam ja zajmieŭ fatazdymak, dzie my z Łukašenkam staim na Vialikaj kitajskaj ścianie. A jašče Fiaduta pryvioŭ u svajo ŭpraŭleńnie HPI Ihara Hukoŭskaha (potym redaktara “Znamieni junosti”, a ciapier supracoŭnika ahienctva “Intierfaks-Zapad”) dy Jahora Rybakova, jakoha niadaŭna zrabili pieršym namieśnikam staršyni dziaržteleradyjokampanii).

Namieśnik Fiaduty — Valery Charaviec — kiravaŭ UHPI paśla adstaŭki šefa, jaki zaplamiŭ siabie “biełymi plamami” na miescy dakłada deputata VS Siarhieja Antončyka.

Dalej načalnikam staŭ Uładzimier Zamiatalin, pad kiraŭnictvam jakoha UHPI stała Hałoŭnym.

Nastupnym byŭ Michaił Padhajny, siońniašni staršynia Dziaržkamdruku. Ale my dajom jamu numar 7, bo paralelna pamočnikam prezydenta pa suviaziach z presaj byŭ prafesar Aleh Słuka, kolišni dekan žurfaku. Pieršym pamočnikam Łukašenki tady byŭ prafesar Urał Łatypaŭ. “Kali Vy, Urale Ramdrakaviču, dumajecie, što ŭsie prafesary takija ž razumnyja, jak Vy, dyk pamylajeciesia”, — skazaŭ tady Łatypavu adzin mienski žurnalist. A praź niekatory čas Słuka arhanizavaŭ interviju Łukašenki niamieckaj hazecie “Handelsblat”, dzie prahučali dobra viadomyja słovy pra Hitlera dy niamiecki paradak. Kažuć, mienavita sp.Słuka nastajaŭ na radyjotranślacyi zapisu hetaha interviju. Paśla hetaha Słuku zrabili namieśnikam ministra adukacyi.

Najlepšym kiraŭnikom presavaj słužby prezydenta mnohija ŭvažajuć Michaiła Šaršavickaha (№ 8), jaki pracavaŭ pieršym na hetaj pasadzie (pryblizna tydzień) dy ničoha zrabić nie paśpieŭ. Jaho vielmi chutka pryznačyli namieśnikam ministra sportu i turyzmu, adkul niadaŭna zvolnili “za razvał turyzmu”. Sp.Šaršavickaha žurnalisty viedajuć z tych časoŭ, kali jon pracavaŭ va ŭpraŭleńni infarmacyi Kiebičavaha Saŭminu. Ciapier jon pracuje niedzie ŭ MZS.

Dziaviatym u śpisie značycca Valery Tałkačoŭ, jaki pieršym zajmaŭ pasadu pres-sakratara prezydenta. Jon kožny aŭtorak ładziŭ u Nacyjanalnym pres-centry bryfinhi, kudy mahli trapić usie achvotnyja žurnalisty. Napeŭna, za heta Tałkačova i “syšli”. Kali ja spytaŭsia Alaksandra Łukašenku, čamu jon zvolniŭ svajho aficyjna pieršaha pres-sakratara, toj adkazaŭ mnie: “Čamu ž zvolniŭ? Jon pajšoŭ na pavyšeńnie – my jaho prarektaram pedinstytutu zrabili...”

Dziasiatym staŭ namieśnik Tałkačova — Uładzimier Niaronski. Kali žurnalisty krychu cyvilizavali sp.Niaronskaha, vykanaŭcu abaviazkaŭ pres-sakratara sasłali ŭ Maskvu, na valutny akład u pres-adździeł biełaruskaha pasolstva.

Adzinaccatym možna ličyć Alaksandra Sałamachu, jaki dahetul zajmaje pasadu načalnika eks-zamiatalinskaha HUHPI. Hetaja struktura zhubiła svoj upłyŭ, adnak mienskaja tradycyja prymušaje ŭklučyć jaho ŭ hety śpis. Kažuć, HUHPI kantraluje pravincyjnuju presu.

Dvanaccatym byŭ Uładzimier Skvarcoŭ, kiraŭnik prezydenckaj pres-słužby. Skvarcoŭ ščaśliva źjechaŭ pasłom Biełarusi ŭ Niamieččynu, što sapraŭdy treba razhladać jak pavyšeńnie.

№ 13 atrymaŭ Michaił Kustoŭski, namieśnik Skvarcova, ale heta nia byŭ “nieščaślivy vypadak”. Žurnalisty nie mahli naradavacca na vychavanaha čynoŭnika, jakomu jany pa staroj zaviadzioncy telefanavali, kab zapisacca na niejkaje mierapryjemstva z udziełam Łukašenki, a ŭ adkaz čuli: “A vy ŭžo jość u śpisie!” Na žal, usio dobraje na Karła Marksa, 38 chutka zakančvajecca. Sp.Kustoŭskamu, jaki dahetul tam pracuje, prysłali novaha načalnika.

Čatyrnaccatym prezydenckim spoŭksmenam staŭ Dźmitry Žuk, kiraŭnik pres-słužby. Jaho kandydaturu prapanavaŭ Łukašenku šef ahienctva “Intierfaks-Zapad” Viačasłaŭ Ziańkovič, jaki prytuliŭ Žuka paśla skaračeńnia jaho sa štatu pres-słužby Nacbanku. Tamara Vińnikava ŭžo ŭ Łondanie skazała mnie, što Žuk jašče ŭ Nacbanku pradavaŭ infarmacyju. Na heta Žuk nijak nie adreahavaŭ. Prostyja namieśniki kiraŭnika administracyi kažuć pra ciesnyja suviazi Žuka ź pieršym namieśnikam – Zamiatalinym.

Piatnaccaty i pakul apošni prezydencki pres-čynoŭnik — Mikałaj Barysievič. Hrupa zamiežnych žurnalistaŭ źviarnułasia da Barysieviča ź piśmovym chadajnictvam zvolnić Žuka jak prafesijna nieprydatnaha i hrubaha čynoŭnika, ale adkazu nie atrymała. Sp.Barysieviču možna tolki paspačuvać dy pažadać jak maha chutčej źjechać kudy-niebudź pasłom. Kab nia stać apošnim spoŭksmenam Alaksandra Łukašenki. Chacia... Paŭtara dziasiatka za niapoŭnyja siem hadoŭ – heta ž niašmat, praŭda? Cikava, što piać ź ich byli Vovami. Budziem čakać novych mocnych kadravych rašeńniaŭ.

Jury Śvirko