List u redakcyju
La vraie Bérézina!
Zdajecca, što Bérézina — heta adzinaje słova ŭ francuskaj movie, jakoje nahadvaje pra Biełaruś. Jak usio biełaruskaje za miažoj, jano padajecca albo pad polskim, albo pad rasiejskim soŭsam, navat nazva raki vymaŭlajecca na rasiejski kštałt. Vyraz paznačaje žudasnuju parazu, katastrofu. Siońnia hety paniatak moža być vykarystany nia tolki francuzami, ale j biełarusami, kab apisać uzrovień viedaŭ eŭrapiejcaŭ z Zachadu pra Biełaruś i biełaruskuju kulturu.
Kali doŭhi čas znachodzišsia ŭ Francyi j štodzionna sutykaješsia ź jejnymi žycharami, pačynaješ raptam vymaŭlać: “La vraie Bérézina!” Ad taho, što na pošcie paštarka praviaraje ŭ kamputary, ci isnuje hetkaja dziŭnaja kraina z nazvaj “Biełaruś”. Ad taho, što kali j jość knihi biełaruskich aŭtaraŭ, dyk mieściacca jany na palicy rasiejskaj litaratury. Ad taho, što na lekcyi pra ŭnijactva prafesar śćviardžaje, što Bieraście — ukrainskaje miesta, a salidnaja encyklapedyja “Quid 2001”, dajučy infarmacyju ab kanfesijach u Biełarusi, paznačaje, što “biełaruskija sučasnyja ŭnijaty — heta, hałoŭnym čynam, ukraincy, jakija žyvuć u Biełarusi”. Ad taho, što ŭ Strasburhu na čale asacyjacyi rasiejska-francuskaha siabroŭstva staić biełarus. A tutejšyja francuzy prosiać dapamahčy napisać list pa-rasiejsku, bo dla ich “biełarusy j rasiejcy razmaŭlajuć adnoju movaju”.
Hartajučy tutejšuju presu, u hałavie aŭtamatyčna vyskokvaje: “La vraie Bérézina!” Bo, dziakujučy francuskim žurnalistam, daviedvaješsia, što “Jan Čerski — polski paleantolah”, a siarod “navinak sučasnaj rasiejskaj litaratury” fihuruje piśmieńnica Śviatłana Aleksijevič.
U linhvistyčnych encyklapedyjach časta błytajuć“biełuju ruskuju” i “małuju ruskuju” movy. A ŭ encyklapedyi “Mova”, što źjaviłasia ŭ vydaviectvie “Pléiade” možna pračytać, što na “biełaj ruskaj movie” razmaŭlajuć pad 37 młn. čałaviek!
Hetyja razvahi nia jość krytykaj ani ŭ bok fracuzaŭ, jakija ničoha nia viedajuć pra krainu-Biarezinu, ani ŭ bok biełarusaŭ, jakija ničoha nia robiać, kab akramia Biareziny pra ich štości viedali ŭ śviecie. Heta prosta ŭražańni ad toj sytuacyi, jakaja skłałasia vakoł vobrazu našaj krainy (ci chutčej jahonaj adsutnaści) u Francyi.
Karaciej, la vraie Bérézina!
Uładzisłaŭ Harbacki,
Strasburh
Ciapier čytajuć
Ukraina ŭpieršyniu adkazała na rasijskija ataki na składy «Novaj pošty» simietryčnymi ŭdarami pa chabach «Vajłdbieryz». Padmaskoŭny zhareŭ daščentu1010
Kamientary